12/08/2026
ကျွန်မနဲ့ ကျွန်မရည်းစားက ပြတ်သွားတာ ၁ နှစ်ကျော်ပါပြီ။ ဖောက်ပြန်လို့ မဟုတ်ပါဘူး။ သူက အင်မတန် ရိုင်းလို့ပါ။ စကားကိုရိုးရိုးတန်းတန်းပြောရင်တောင် အဆဲလေးနဲ့ပြောပါတယ်။ အစက ကျွန်မက ပြင်ပေးရင် သူက ဆောရီးဆိုပြီး သတိထားပါတယ်။ နောက်ရန်ဖြစ်ရင်လည်း ဆဲတာ တအားပါပဲ။ ပြန်အဆင်ပြေချိန်ကျရင် ကျွန်မက ဆဲတာကို မကြိုက်ကြောင်း၊ ကျွန်မတို့ မိဘတွေက အဲ့လို ဆဲတတ်ရင် လက်မခံကြောင်း သေချာ ရှင်းပြပါတယ်။
အစပိုင်းတော့ သူပြင်မယ် ဆိုပြီးပြောပေမယ့် နောက်ပိုင်းကြာလာတော့ ကျွန်မက ဒါက သူ့ဝသီ သူမပြင်နိုင်ဘူး မင်းမကြိုက်ရင် ဆက်မတွဲနဲ့ ဆိုပြီး ပြောရာကနေ စကားတွေ အကြီးအကျယ်များပြီး ပြတ်ကြစဲကြတဲ့ အဆင့်ရောက်တာပါ။
သူ့ကို ဆဲတာ တစ်ခုလက်မခံနိုင်ပေမယ့် ကျွန်မ ချစ်နေဆဲပါပဲ။ ခုပြဿနာက သူက ကျွန်မ ညီမနဲ့ ကြိုက်နေတာပါ။ သူနဲ့ ရည်းစားဖြစ်တာက ၆ လကျော်ကျော်လေးပဲ ကြာခဲ့တာပါ။ ညီမလေးကိုလည်း သူနဲ့ကျွန်မ ရည်းစားဖြစ်ကြောင်းမပြောပြထားဖူးပါဘူး။ သူကတော့ ဒါ ကျွန်မ ညီမမှန်းသိပါတယ်။
ကျွန်မ ညီမမှန်းသိလျက်နဲ့ လုပ်တာလား၊ တကယ်ပဲ သူချစ်လို့ လုပ်တာလား ဆိုတာ အဖြေကိုရှာမရ ပါဘူး။ ညီမလေးကိုပဲ ဖွင့်ပြောပြီးတားရမှာလား၊ သူ့ကိုပဲ သွားတားရမှာလားလည်း မသိတော့ပါဘူး။
