24/10/2025
တိတိကျကျပြောရရင်တော့
မေလ ၂၃ ရက်နေ့တုန်းကပါ။
မလေးရှားနိုင်ငံ ကွာလာလမ်ပူမြို့မှာ
နှစ်စဉ်ကျင်းပတဲ့ KL International Bookfair ကို
ဒုတိယအကြိမ်မြောက်ပါဝင်ဖြစ်ပါတယ်။
သူတို့ ဖိတ်လို့ပါ။
အဆိုပါ စာအုပ်ပွဲရဲ့ အစီအစဉ်များစွာထဲက
အစိတ်အပိုင်းတစ်ခုမှာ
IPA လို့ခေါ်တဲ့ International Publisher Association ရဲ့ အခမ်းအနားတစ်ခုပါဝင်ပါတယ်။
ဘာလို့ပါတာလဲဆိုတော့
IPA ရဲ့ နှစ်စဉ်ကျင်းပတဲ့
Congress ကို
2026 ခုနှစ် ဇူလိုင်လ၊
ကွာလာလမ်ပူမြို့မှာ ကျင်းပဖို့ ရှိလို့ပါ။
အဲ့ဒီအတွက် ဒေသတွင်းက
ထုတ်ဝေသူအသင်းအဖွဲ့တွေကို
ကိုယ်စားလှယ်ခန့်အပ်လွှာတွေပေးပါတယ်။
ကမ္ဘာဒီယား၊ လာအိုတို့ကစလို့
အရှေ့တောင်အာရှနိုင်ငံများအားလုံး
ပါဝင်တက်ရောက်ပါတယ်။
မပါတာကတော့ မြန်မာပါ။
ဘာလို့ မြန်မာမပါတာလဲလို့
နိုင်ငံတကာက
မိတ်ဆွေတွေကို မေးပါတယ်။
မြန်မာကို သူတို့ဖိတ်ပါတယ်။
ပါလည်း ပါစေချင်ပါတယ်တဲ့…
ဒါပေမယ့် မြန်မာဘက်က မလာတာပါတဲ့…
လွန်ခဲ့တဲ့ ရက်ပိုင်းက
ဂျာမဏီနိုင်ငံ ဖရန့်ဖတ်မြို့မှာ
Frankfurt Bookfair လုပ်ပါတယ်။
ဖိလစ်ပိုင်နိုင်ငံက Guest of Honor ဖြစ်တဲ့အတွက်
အရှေ့တောင်အာရှ နိုင်ငံများအားလုံးနီးပါး
သွားကြပါတယ်။
ကျွန်တော့်ကိုလည်း ဆွေးနွေးပွဲခေါင်းစဉ်
နှစ်ခုမှာ ဆွေးနွေးဖို့ ဖိတ်ပါတယ်။
ဒါပေမယ့် ဒီလထဲမှာ
ကျွန်တော့်မှာ ဘယ်လိုမှ မအားလပ်တဲ့အတွက်
ငြင်းလိုက်ရပါတယ်။
ဒီတော့ မြန်မာနိုင်ငံက ဘယ်သူမှ မပါတော့ပါဘူး။
နိုင်ငံတကာမှာ စာပေအသိုင်းအဝိုင်းဟာ
တစ်သီးတစ်ဖွဲ့သဘောမျိုး
မလုပ်တော့ပါဘူး။
အစုအဖွဲ့လိုက် သွားပါတယ်။
အလုံးအရင်းလိုက် သွားပါတယ်။
ဒေသတွင်းမှာ
စင်ကာပူ၊ မလေး၊ အင်ဒိုတို့လို
နိုင်ငံကြီးတွေ မပြောနဲ့
လာအိုတို့ ကမ္ဘာဒီးယားတို့တောင်
နိုင်ငံတကာနဲ့ စုဖွဲ့လုပ်ကိုင်နေပါပြီ။
ကျွန်တော်တို့ တတွေ ကျန်ရစ်ခဲ့ရတာ
စိတ်မကောင်းစရာပါပဲ။
နောက်ပြီး နိုင်ငံတကာပွဲတွေမှာ
ကျွန်တော်တစ်ယောက်တည်း လှည့်ပတ်သွားနေတာဟာ
အကျိုးထိရောက်မှုနည်းပါတယ်။
ကိုယ်ကျိုးအတွက်ကောင်းပေမယ့်
တစ်ယောက်တည်း အဆင်ပြေနေလို့လည်း
မရပြန်ပါဘူး။
ပြည်တွင်းက စာပေတွေ
နိုင်ငံတကာကို ပြန့်နှံ့ချင်ရင်
ကိုယ်ကလည်း အဲ့ဒီအသိုင်းအဝိုင်းထဲ
ဝင်ဖို့ သေချာပေါက်လိုအပ်ပါတယ်။
ဒါ့အပြင် လက်ရှိ ပြည်တွင်း
စာအုပ်ထုတ်ဝေရေးကလည်း
တအိအိနဲ့ ကျဆင်းနေပါတယ်။
တခြားသော အထွေထွေ
ပြသနာတွေလည်း အများကြီးရှိပါတယ်။
ကျွန်တော် သိပါတယ်။
တချို့ကိစ္စတွေကတော့
ကျွန်တော့် အစွမ်းအစနဲ့
ဖြေရှင်းနိုင်စွမ်း မရှိပါဘူး။
ဒါပေမယ့် တချို့ကိစ္စတွေကိုတော့
အားလုံး စုစုစည်းစည်းနဲ့
လုပ်ကိုင်မယ်ဆိုရင်
ဖြေရှင်းနိုင်မှာပါ။
ဒါကြောင့်
မြန်မာနိုင်ငံ စာအုပ်ထုတ်ဝေသူနှင့်ဖြန့်ချိသူများ
အသင်းရဲ့ ဥက္ကဌတာဝန်ကို
ကျွန်တော်လက်ခံရယူပါတယ်။
အသင်း ကော်မတီအသစ်ဖွဲ့ပါတယ်။
အများစုက လူလတ်ပိုင်းနဲ့
လူငယ်တွေပါ။
ခေတ်ရေစီးကြောင်းကို သိကြပြီး
နည်းပညာကိုလည်း မစိမ်းကြသူတွေပါ။
position တစ်ခုကို တာဝန်ယူရတာ
ကျွန်တော့်အတွက် ဝန်ထုပ်ဝန်ပိုးပါပဲ။
ဒုက္ခတစ်ခုပါပဲ။
ဒါပေမယ့် ဒီလို အခြေအနေမျိုးမှာ တစ်ကိုယ်ရေ ကိုယ်လွတ်ရုန်းတာမျိုးထက်
ကိုယ်လုပ်နိုင်တာလေး ပြန်လုပ်ပေးချင်ပါတယ်။
တစ်သက်လုံး ကျွန်တော့်ကို
ထမင်းကျွေးထားတာ စာအုပ်အသိုင်းအဝိုင်း
မဟုတ်လား။
သေချာတာ တစ်ခုရှိပါတယ်။
အသင်းမှာ ဝင်လုပ်တာ ကိုယ်ကျိုးစီးပွါး
တစ်ခုမှ မမျှော်ကိုးပါ။
အသင်းဟာ Independent Body ဖြစ်ပြီး
မည်သည့် ပုဂ္ဂိုလ်၊ မည်သည့်အဖွဲ့အစည်းရဲ့
လက်အောက်ခံမဟုတ်ပါဘူး။
လုပ်စရာတွေအများကြီး
ရှိနေပါတယ်။
စိတ်ပါလို့
ပူးပေါင်းပါဝင်ချင်တဲ့
စာပေအသိုင်းအဝိုင်းက
ထုတ်ဝေသူတွေ၊ စာအုပ်ဆိုင်ရှင်တွေ၊ ဖြန့်ချိရေးသမားတွေ အားလုံးကို
ကြိုဆိုပါတယ်။
လာရောက်ပူးပေါင်းနိုင်ပါတယ်။
စွမ်းသလောက်လေး
ရုန်းကြည့်တာပါပဲ။
မြေမှုန်လွင်
(ပုံတွေကတော့ Frankfurt Bookfair မှာ ထုတ်ဝေသူ အလုံးအရင်းနဲ့ နိုင်ငံအလိုက်လာဖွင့်ကြတဲ့ စင်ကာပူ၊ ထိုင်း၊ ဗီယက်နမ်တို့နဲ့ သူတို့ကြားမှာ မြန်မာအလံသေးသေးလေးနဲ့
တစ်ကိုယ်တော် ဖွင့်ခဲ့ရတဲ့ ကျွန်တော့်နေရာလေးပေါ့)
