27/09/2025
စနေညချမ်းကတော့ ဘောလုံးပရိသတ်တို့အတွက် ပရီးမီးယားလိဂ်ရဲ့ အသင်းကြီးတွေ ကစားမယ့်ပွဲတွေ အပြည့်နဲ့ပါပဲ။ ဒါကြောင့် မြိုင်မြိုင်ဆိုင်ဆိုင်နဲ့ အားပေးကြည့်ရှုရမှာပါ။ ဒီပွဲစဥ်တွေအတွက် ပွဲကြိုသုံးသပ်ချက်တွေကို ဖတ်ရှုနိုင်ဖို့ ဖော်ပြပေးလိုက်ရပါတယ်။
Brentford vs Man United (စနေနေ့ည၊ ၆း၀၀)
နည်းပြဟောင်း သောမက်ဖရန့်ခ် လက်ထက်ကလောက် ဘရန်ဖို့ဒ်တို့ မမာကျောတော့တာ အားလုံးအသိပါပဲ။ ဒါပေမဲ့ ချယ်လ်ဆီးကို နောက်ကျ လက်ပစ်ဘောဂိုးနဲ့ ဂိုးရသွားပြီး သရေသွားကျလိုက်တော့ အသင်းကြီးတွေဆိုရင် အိမ်ကွင်းမှာ ခံကန်တတ်တဲ့ သဘောလေးကိုလည်း သွားတွေ့မိပါတယ်။ မန်ယူကတော့ အိမ်ကွင်း ၂ ပွဲဆက် အနိုင်နဲ့အတူ ယုံကြည်မှု ပြန်ရနေပေမဲ့ အဝေးကွင်းမှာ ဒီရာသီတစ်ပွဲမှ အနိုင်မရသေးတဲ့အတွက် နည်းပြ ရူဗင်အမိုရင်မှာ ဖိအားကတော့ ဆက်ရှိနေမှာပါပဲ။ မထင်မှတ်ဘဲ ကြည့်ကောင်းသွားမယ့် ပွဲလို့ ယူဆပြီး တစ်ဖက်နဲ့တစ်ဖက် ပြန်လှန်သွင်းဂိုးတွေ မြင်တွေ့ရဖွယ်ရှိပါတယ်။ နိုင်နိုင်ချေ နည်းနည်းလေး ပိုများတာကတော့ လူတော်တော်များများ ပြန်စုံနေပြီဖြစ်တဲ့ မန်ယူလို့ပဲ ထင်မြင်မိပါတယ်။
Chelsea vs Brighton (စနေနေ့ည၊ ၈း၃၀)
ဘရန်ဖို့ဒ်ကို နောက်ကျ လက်ပစ်ဘောနဲ့ သရေကျလာပြီးကတည်းက ချယ်လ်ဆီးတို့ Form ပျက်နေတာပါ။ Form ပျက်လာရင် ကွင်းထဲမှာ ပြာယာပြီး အမှားတွေကျူးလွန်မိလို့လည်း မန်ယူနဲ့ပွဲမှာ သုံးမိနစ်မှာတင် ဂိုးသမား အထုတ်ခံရပြီး ရှုံးခဲ့ရပါတယ်။ ဆိုတော့ အိမ်ကွင်းဖြစ်သည့်တိုင် ချယ်စီးနည်းပြ အန်ဇိုမာရက်စကာတစ်ယောက် သေချာပေါက် ခံစစ်ပြင်ဆင်ပြီး အမှားနည်းအောင် လုပ်ဆောင်လာမှာပါ။ ဘရိုက်တန်ကတော့ ယုံကြည်မှုပြန်ရနေတဲ့ အခြေအနေမှာရှိနေပါတယ်။ ဘယ်လောက်ပဲ ယုံကြည်မှုရရ စတန်းဖို့ဒ်ဘရစ်ကွင်းမှာတော့ လာပြီး ဖွင့်ကန်မယ်လို့တော့ မထင်ပါဘူး။ မီတိုးမားတို့ မင်းတက်ချ်တို့ရဲ့ တိုးအားနဲ့ ကောင်တာပဲ ချောင်းကစားမှာပါ။ အမှားမခံမယ့် အသင်းရယ်၊ ထိန်းကန်ပြီးချောင်းကစားမယ့် အသင်းရယ် ကန်ကြမှာဆိုတော့ ဖျော်ဖြေမှုဆန်တဲ့ ဂိုးတွေ မမြင်တွေ့ရဘဲ ပျင်းစရာကောင်းတဲ့ ပွဲတစ်ပွဲအဖြစ် အဆုံးသတ်သွားလိမ့်မယ် ထင်ပါတယ်။
Crystal Palace Vs Liverpool (စနေနေ့ည၊ ၈း၃၀)
လက်ရှိ ပရီးမီးယားလိဂ်မှာ ရှုံးပွဲမရှိထားတဲ့ နှစ်သင်းရှိပါတယ်။ ဒါက ပဲလေ့စ်နဲ့ လီဗာပူးလ်ပါ။ ဒီနှစ်သင်းက ရာသီအစ ကွန်မြူနတီဒိုင်းမှာ တွေ့ဖူးပြီး သရေရလဒ် ထွက်ပေါ်ခဲ့ပါတယ်။ အဲ့တုန်းက ဝမ်ဘလေကွင်းမှာ ဖြစ်ပြီး ဒီတစ်ခါက ပဲလေ့စ်အသင်းရဲ့ အိမ်ကွင်းမှာပါ။ ဂလတ်စနာရဲ့ ရာသီ တာထွက် ကောင်းတယ်လို့ ပြောလို့ရပြီး ပြိုင်ပွဲစုံ (၉) ပွဲဆက် ရှုံးပွဲမရှိထားပါဘူး။ ခံစစ်ကစားပုံကောင်းပြီး ပရီးမီးယားလိဂ်မှာ အာဆင်နယ်နဲ့ တန်းတူ ပေးဂိုး (၂) ဂိုးသာ ရှိပါသေးတယ်။ တိုက်စစ်စွမ်းဆောင်ရည်ကတော့ ငါးပွဲမှာ ခြောက်ဂိုးဆိုတော့ ပရီးမီးယားလိဂ်မှာ တစ်ပွဲကို တစ်ဂိုးနှုန်းလောက် သွင်းတယ် ပြောရမှာပါ။ လီဗာပူးလ်အကြောင်းပြောရင် ရာသီအဖွင့် (၅) ပွဲဆက် နိုင်ထားပြီး တိုက်စစ်က (၁၁) ဂိုးသွင်းထားပါတယ်။ ဒီနေရာမှာ ပြောချင်တာ လီဗာပူးလ်က ဒီပွဲပြီးရင် ဘင်ဖီကာကို ချန်ပီယံလိဂ်ပွဲစဥ်အဖြစ် ကစားဖို့ ရှိပါတယ်။ ဆိုတော့ လူချန်ကစားလာမလား စောင့်ကြည့်ရပါမယ်။ အီခီတီကီလည်း ပွဲပယ်ထိထားလို့ အီဆက်ခ်နဲ့ ပွဲထွက်မှာပါ။ ပဲလေ့စ်အိမ်ကွင်းဖြစ်တဲ့အပြင် ဖွင့်ကစားလာမှာ မဟုတ်လို့ ဘန်လေနဲ့ပွဲကလို ကြိုးကြာတို့ ရုန်းကန်ရဦးမှာပါ။ ဒါကြောင့် လင်းယုန်ကို အားပေးချင်ပြီး ခံစစ်အသားပေးမယ့် ပွဲမှာ ဂိုးတွေလည်း အများကြီး မြင်ရမယ် မထင်ပါဘူး။
Leeds vs Bournemouth (စနေနေ့ည၊ ၈း၃၀)
ဘုန်းမောက်အသင်းက Form အရမ်းကောင်းပြီး ဇယားအဆင့် ၄ မှာတောင် လက်ရှိ ရပ်တည်နေတာပါ။ ဒါဆို လိဒ်စ်တို့ကလည်း အိမ်ကွင်းမှာ အဲဗာတန်ကိုနိုင်၊ နယူးကာဆယ်ကို သရေ ကစားထားလို့ အထင်ကြီးစရာ ကောင်းပါတယ်။ ဆိုတော့ ဘုန်းမောက်ရဲ့ ဆာမန်းညောနဲ့ အီဗာနယ်ဆင်တို့ရဲ့ တိုးအားရုန်းအားက လိဒ်စ် နောက်တန်းကို ထိုးဖောက်နိုင်မလား သံသယရှိနေပါတယ်။ နောက်ပြီး လိဒ်စ်တို့အနေနဲ့ တန်းတင်ကျန်ရစ်ချင်ရင် ဒီလိုအိမ်ကွင်းပွဲတွေမှာ အမှားခံလို့ မရတဲ့အတွက် အသည်းပေါက်မတတ် အားပေးတတ်တဲ့ လိဒ်စ်အိမ်ကွင်းပရိသတ်တွေကို အသင်းသားတွေ စိတ်ပျက်စေမှာမဟုတ်ဘူးလို့ ယူဆမိပါတယ်။
Man City Vs Burnley (စနေနေ့ည၊ ၈း၃၀)
မန်စီးတီးတို့ ဘရိုက်တန်ကို ရှုံးပြီး (၄) ပွဲဆက် ရလဒ်ကောင်း ထွက်အောင် ကစားထားနိုင်ခဲ့ပါတယ်။ လက်ရှိမှာ လိဂ်ရဲ့ နံပတ်တစ် ဂိုးသွင်းရှင် ဖြစ်တဲ့အထိ ဟာလန်း ဂိုးသွင်းကောင်းနေပါတယ်။ ဒါပေမဲ့ နောက်ကျောဒဏ်ရာ ရနေလို့ ဒီပွဲမှာ ပါ၊ မပါ မသေချာတဲ့ အနေအထားပါ။ ဒါပေမဲ့လည်း ဖိုဒန် ခြေစွမ်းပြ ဂိုးသွင်းနေလို့ တိုက်စစ်အတွက် ပူစရာတော့ မရှိပါဘူး။ ဘန်လေက လက်ရှိ ပရီးမီးယားလိဂ် (၅) ပွဲကစားပြီးချိန်မှာ လေးမှတ်အထိ ရထားပြီး မန်ယူ၊ လီဗာပူးလ်၊ နောတင်ဟမ်တို့ကို ဒုက္ခပေး ကစားနိုင်ခဲ့ပါတယ်။ လီဗာပူးလ်နဲ့ ရှစ်မှတ်လောက် ပြတ်နေလို့ မန်စီးတီး အမှတ်ထပ်လျော့လို့ မရပါဘူး။ ပြီးရင် ဘန်လေက မန်စီးတီး တရေးနိုး ထကန်တောင် နိုင်တဲ့အသင်းပါ။ ဒါကြောင့် မန်စီးတီးရဲ့ နိုင်ပွဲကို သေချာပေါက် မြင်ရမယ့်ပွဲဖြစ်ပြီး ဂိုးများများ သွင်းနိုင်ဖို့ကိုလည်း အားထုတ်လာမှာပါ။ ဘန်လေကလည်း မထင်ရင် မထင်သလို ဂိုးသွင်းတတ်လို့ သွင်းဂိုးတွေကိုပဲ အတူတူ ရေတွက်ချင်ပါတယ်။
Nottm Forest Vs Sunderland (စနေနေ့ည၊ ၁၁း၀၀)
သစ်တောစောင့် ပြောင်းထားတဲ့ နောတင်ဟမ်က သစ်တောမဟုတ်ဘဲ လမ်းဘေးက ကိုင်းကွင်းသာသာ ဖြစ်နေပါတယ်။ အန့်ချ်ရဲ့ ထုံးစံအတိုင်း တိုက်စစ်က ဂိုးတွေရနေပေမဲ့ နောက်ကတော့ ဟောင်းလောင်းပါ။ ဒါပေမဲ့ ပြိုင်ပွဲစုံ လေးပွဲကစားပြီးချိန်မှာ နိုင်ပွဲမရသေးတာက အန့်ချ်အတွက် ဖိအားပါ။ ဆန်းဒါးလန်းက တန်းတက်ဆိုပေမဲ့ (၈) မှတ်ရထားပြီး အဆင့် (၇) ပါ။ ရီနယ်ဒို ပွဲပယ်ခံရတာ ဆန်းဒါးလန်းခံစစ်ကို သက်ရောက်မှု ရှိလာနိုင်လား စောင့်ကြည့်ရမယ်။ လူစာရင်းပိုင်းကတော့ နှစ်သင်းစလုံး ကျစ်ကျစ်လစ်လစ် ရှိပြီး နောတင်ဟမ်အနေနဲ့ အန့်ချ်လက်အောက်မှာ နိုင်ပွဲတစ်ပွဲ ဖော်ဆောင်ဖို့ လိုအပ်နေပါတယ်။ ဒါကြောင့် ပရီးမီးယားလိဂ်မှာ ကြွယ်ပြနေတဲ့ ဆန်းဒါးလန်းအစား ကိုင်းကွင်းလေးကို သစ်တောလေး ပြန်ဖြစ်အောင် တယုတယ အပင်စိုက်ပါမယ်။
Tottenham Vs Wolves (စနေနေ့ည၊ ၁း၃၀)
သောမတ်ဖရန့်ခ်လက်အောက်မှာ ကြက်ဖက ရိုးရိုးမဟုတ်တော့ဘဲ တိုက်ကြက်ဖြစ်နေပါပြီ။ မနှစ်က အဓိက ကစားသမားတွေ ဒဏ်ရာရနေတာတောင် စပါးစ်ရဲ့ လူစာရင်းက ရှယ်ဖြစ်နေတာကြည့်ရင် ဘယ်လောက် အားဖြည့်ထားလဲ သိနိုင်ပါတယ်။ ရီချာလီဆင် ဂိုးသွင်းကောင်းနေပြီး ကွင်းလယ်က ပယ်လင်ဟာ၊ ဘန်တန်ဂါ၊ ဘာ့ဂယ်လ် အချိတ်အဆက်မိပါတယ်။ ဝုဗ်က နောက်ဆုံးပွဲမှာ အဲဗာတန်ကို EFL မှာနိုင်ခဲ့ပြီး ပရီးမီးယာားလိဂ်မှာတော့ တစ်မှတ်မှ မရသေးပါဘူး။ ဒီပွဲလည်း ပုံစံကောင်းရနေတဲ့ ကြက်ဖကြီးတို့ကိုတော့ ပြန်လှန်ဖို့ မလွယ်ပါဘူး။ ဒါပေမဲ့ စပါးစ်က ချန်ပီယံလိဂ် အဝေးကွင်းကစားဖို့ ရှိနေပါတယ်။ ဝုဗ်လည်း ခြောက်ပွဲကန်ပြီး တစ်မှတ်မှ မရဘူးဆိုရင် အခြေအနေမကောင်းနိုင်လို့ ဒီပွဲကိုတော့ ရှိတဲ့အားလေးနဲ့ တင်းခံလာမှာပါ။ ဒါကြောင့် စပါးစ်နိုင်ရင်တောင် ဂိုးပြတ်ဖို့ မသေချာလို့ ဝံပုလွေလေး အားရှိအောင် အသားများများကျွေးပြီး အားပေးပါမယ်။
