30/06/2025
ဆော်ဒီလိဂ်ဟာ ကမ္ဘာ့အကောင်းဆုံးလိဂ်(၅)ခုစာရင်းထဲ ပါဝင်နေပြီလို့ စီရော်နယ်လ်ဒို ပြောကြား
ဆော်ဒီကလပ် အယ်လ်နာဆာအသင်းနဲ့ သက်တမ်းတိုးစာချုပ် ချုပ်ဆိုခဲ့တဲ့ ပေါ်တူဂီတိုက်စစ်မှူး စီရော်နယ်လ်ဒိုက ဆော်ဒီလိဂ်ဟာ ကမ္ဘာ့အကောင်းဆုံးလိဂ်(၅)ခုစာရင်းထဲ ပါဝင်နေပြီလို့ ပြောကြားခဲ့ပါတယ်။
အသက်(၄၀)ရှိပြီဖြစ်တဲ့ စီရော်နယ်လ်ဒိုက အယ်လ်နာဆာအသင်းနဲ့ လမ်းခွဲဖွယ်ရှိတယ်လို့ ပြောကြားခဲ့ပေမဲ့ ပြီးခဲ့တဲ့ ရက်ပိုင်းအတွင်းမှာပဲ ၂၀၂၇ ခုနှစ်အထိ သက်တမ်းတိုးစာချုပ် ချုပ်ဆိုခဲ့တာပါ။
'' ကျွန်တော်တို့(ဆော်ဒီပရိုလိဂ်)က တိုးတက်နေဆဲပါ။ ဒါပေမဲ့ လက်ရှိအခိုက်အတန့်မှာကိုပဲ ကျွန်တော်တို့ ကမ္ဘာ့အကောင်းဆုံးလိဂ်(၅)ခုစာရင်းထဲ ဝင်နေပြီလို့ ယုံကြည်ပါတယ်။ ဆက်ပြီး တိုးတက်နေလိမ့်ဦးမယ်လို့လည်း ယုံကြည်ပါတယ်။ ပြီးခဲ့တဲ့ (၂)နှစ်အတွင်းမှာ သမိုင်းတစ်လျှောက် အမြင့်ဆုံးအဖြစ်လည်း တိုးတက်လာခဲ့ပါတယ်'' လို့ စီရော်နယ်လ်ဒိုက ပြောကြားခဲ့ပါတယ်။
စီရော်နယ်လ်ဒိုက အယ်လ်နာဆာအသင်းနဲ့ သက်တမ်းတိုးခဲ့တာဟာ ဆော်ဒီလိဂ်မှာ ချန်ပီယံဆု ရယူနိုင်မယ်လို့ ယုံကြည်တာကြောင့်ဖြစ်တယ်လို့လည်း ပြောကြားခဲ့ပါတယ်။
ပြီးတော့ ''ကျွန်တော် ဆော်ဒီလိဂ်မှာ ပျော်ရွှင်ပါတယ်။ ဘာကြောင့်လဲဆိုတော့ ဒီလိဂ်က ပြိုင်ဆိုင်မှုအရမ်းပြင်းထန်တယ်ဆိုတာ သိထားလို့ပါ။ ဆော်ဒီမှာ ဘယ်တုန်းကမှ မကစားဖူးတဲ့သူတွေကတော့ ဒါကို နားလည်မှာမဟုတ်ပါဘူး။ သူတို့ကတော့ ကမ္ဘာ့အကောင်းဆုံးလိဂ်(၅)ခုထဲ မပါဘူးလို့ပဲ ပြောမှာပါ။ ကျွန်တော်ကတော့ ကျွန်တော့်စကားကို ၁၀၀ ရာခိုင်နှုန်း ယုံကြည်မှုရှိပါတယ်။ ဒီလိဂ်မှာ ကစားနေတဲ့သူတွေကတော့ ကျွန်တော် ဘာအကြောင်းပြောနေသလဲဆိုတာ သိကြပါတယ်'' လို့ ပြောကြားခဲ့ပါတယ်။
