07/05/2026
စစ်ကောင်စီက ကျင်းပခဲ့သည့် ရွေးကောက်ပွဲရလဒ်ကို အသုံးချ၍ ၎င်းတို့ကိုယ်ကို ဒီမိုကရေစီနည်းကျ ရွေးကောက်ခံအစိုးရဖြစ်သည်ဟု ပုံဖော်ပြောဆိုခဲ့ပြီး နိုင်ငံတကာ၏ စီးပွားရေးပိတ်ဆို့မှုများအပေါ် ဝေဖန်ပြစ်တင်
နေပြည်တော်၌ မေလ ၆ ရက်က ပြုလုပ်သည့် နေပြည်တော်အစိုးရ၏ ပြည်ထောင်စုအစိုးရအဖွဲ့ အစည်းအဝေးတွင် စစ်ခေါင်းဆောင် မင်းအောင်လှိုင်က ၎င်းတို့အုပ်ချုပ်ရေးယန္တရားအား ပြည်သူက ရွေးချယ်ထားသည့် အစိုးရဖြစ်သည်ဟု အမွှမ်းတင် ပြောကြားခဲ့သည်။ အထူးသဖြင့် နိုင်ငံတကာက ၎င်းတို့အပေါ် ချမှတ်ထားသည့် စီးပွားရေးပိတ်ဆို့မှုများနှင့် ဖိအားပေးမှုများကို ဝေဖန်ခဲ့ပြီး ဒီမိုကရေစီနိုင်ငံများအနေဖြင့် စစ်တပ်၏ နိုင်ငံရေးဦးဆောင်မှုကို အသိအမှတ်ပြုရန် ပြောကြားခဲ့ခြင်းဖြစ်သည်။
စစ်ခေါင်းဆောင်က ၎င်းတို့ကျင်းပခဲ့သည့် ရွေးကောက်ပွဲတွင် ဆန္ဒမဲပေးသူ ၅၄ ရာခိုင်နှုန်းကျော်ရှိခဲ့သည်ဟု ဆိုကာ ယင်းမှာ ၎င်းတို့အစိုးရအပေါ် ပြည်သူက ထောက်ခံခြင်းဖြစ်သည်ဟု အဓိပ္ပာယ်ဖွင့်ဆိုခဲ့သည်။ ထို့အပြင် ရွေးကောက်ပွဲတွင် ပါတီပေါင်း ၅၇ ပါတီ ပါဝင်ခဲ့သည့်အတွက် အားလုံးပါဝင်သည့် ဒီမိုကရေစီဖြစ်ကြောင်းနှင့် မဲမသမာမှုမရှိသည့် သိက္ခာရှိသော ရွေးကောက်ပွဲဖြစ်ကြောင်းလည်း ၎င်းက ဆိုသည်။ သို့သော် မြေပြင်တွင်မူ အာဆီယံအပါအဝင် နိုင်ငံတကာအသိုင်းအဝိုင်းက ယင်းရွေးကောက်ပွဲကို အသိအမှတ်ပြုခြင်း မရှိဘဲ ပယ်ချထားဆဲဖြစ်သည်။
စစ်ခေါင်းဆောင် ဦးမင်းအောင်လှိုင်သည် အရပ်ဝတ်လဲကာ သမ္မတအဖြစ် ခံယူထားသော်လည်း ကမ္ဘာ့နိုင်ငံအများစုက ၎င်း၏ အစိုးရအဖွဲ့ကို အသိအမှတ်ပြုရန် ငြင်းဆန်နေခြင်းမှာ နေပြည်တော်အစိုးရအတွက် ကြီးမားသည့် သံတမန်ရေးရာ အရှုံးတစ်ခုဖြစ်သည်။ စစ်ခေါင်းဆောင်၏ ယခုပြောကြားချက်များသည် ၎င်းတို့၏ တရားမဝင်မှုကို ဖုံးကွယ်ရန် ကြိုးပမ်းခြင်းဖြစ်သလို၊ ပြည်တွင်းစီးပွားရေး ကျဆင်းနေမှုများအတွက် နိုင်ငံတကာ ပိတ်ဆို့မှုများအပေါ် အပြစ်ပုံချကာ ဝါဒဖြန့်နေခြင်းသာ ဖြစ်သည်။
#မင်းအောင်လှိုင် #မြန်မာသတင်း
