https://www.facebook.com/631485410038569/

Mouk Pao Nai, Yangon (2025)

01/08/2025

SNA ဦးဆောင်မှုဖြင့် ဗန်းမောက်မြို့မှာ ၁၀နှစ်အောက် ကလေးငယ်များအတွက် ကာကွယ်ဆေး ထိုးပေး
=====================================

Mouk Pao Nai News Agency
သြဂုတ် ၁၊ ၂၀၂၅။

ရှမ်းနီအမျိုးသားများတပ်မတော် (SNA) ဦးဆောင်မှုဖြင့် စစ်ကိုင်းတိုင်းဒေသကြီး အထက်ပိုင်း ဗန်းမောက်မြို့မှာ မိခင်နဲ့ ကလေး ကျန်းမာရေးအတွက် ၁၀ နှစ်အောက် ကလေးငယ်တွေကို သြဂုတ်လ ၁ရက်နေ့ ဒီကနေ့ ကာကွယ်ဆေးများထိုးနှံပေး နေတယ်လို့ သိရပါတယ်။

မနက် ၈ နာရီစပြီး ညနေ ၃ နာရီအထိ ထိုးပေးသွားဖို့စီစဉ်ထားတယ်လို့ သိရပြီး ဗန်းမောက် အနောက်ခြမ်းရှိ ကျေးရွာတွေမှာလည်း အလှမ်းသင့်သလို ကျေးရွာအုပ်စုအလိုက် ကာကွယ်ဆေးထိုးနှံဖို့ လုပ်ဆောင်သွားမယ်လို့ သိရပါတယ်။

SNA ဦးဆောင်မှုနဲ့အတူ ပြီးခဲ့တဲ့ ဇူလိုင် ၁ ရက်နေ့မှ ဇူလိုင် ၃ ရက်နေ့အထိ ဗန်းမောက်မြို့ပေါ်က ပြည်သူလူထုတွေကို ငှက်ဖျားနဲ့ တုတ်ကွေး ကာကွယ်ဆေးထိုးနှံပေးခဲ့တယ်လို့လည်း သိရပါတယ်။

အဆိုပါကျန်းမာရေးအစီစဥ်များကို ဗန်းမောက်မြို့ လုံခြုံရေးတာဝန်ယူထားသည့် (SNA)၊ တပ်မဟာ (၆၁၄) စဝ်ဆမ်တာစစ်ကြောင်းမှ ငွေအား၊ လူအားအကုန်အကျခံကာ တာဝန်ယူဆောင်ရွက်နေတယ်လို့သိရပါတယ်။

ဗန်းမောက်မြို့နယ်ရှိ SNA ထိန်းချုပ်ထားတဲ့ နယ်မြေတွေမှာ ပြည်သူလူထုအတွက် ကျန်းမာရေး၊ ပညာရေး၊ လမ်းပန်းဆက်သွယ်ရေးတွေမှာ ကူညီထောက်ပံ့မှုတွေ လုပ်ဆောင်လျက်ရှိနေတယ်လို ဒေသခံတွေထံမှ သိရပါတယ်။

တဖက်မှာလည်း SNA ကို ကချင်လွတ်မြောက်ရေးတပ်မတော် (KIA) နဲ့ ပူးပေါင်းတပ်ဖွဲ့တွေက မကြာခဏ ဆိုသလို ထိုးစစ်ဆင် တိုက်ခိုက်လျက်ရှိနေပြီး ဗန်းမောက်မြို့သိမ်းတိုက်ပွဲဖော်ဆောင်ရေး လူအင်အားတွေ စုဆောင်းလျက်ရှိနေတယ်လို့ သိရပါတယ်။

#ဗန်းမောက်မြို့

#တပ်မဟာ၆၁၄
#စဝ်ဆမ်တာစစ်ကြောင်း

31/07/2025

အရေးပေါ်အခြေအနေကြေညာခဲ့သော နိုင်ငံတော်အာဏာလွှဲဆောင်ရွက်စေခဲ့သည့်အမိန့်အား စစ်ကောင်စီပယ်ဖျက်ကြောင်း ကြေညာ
===================================
Mouk Pao Nai News Agency
ဇူလှိုင် ၃၁၊ ၂၀၂၅။

၂၀၂၁ခုနှစ်၊ ဖေဖော်ဝါရီလ ၁ရက်နေ့မှာ ၂၀၀၈ အခြေခံဖွဲ့စည်းပုံဥပဒေပုဒ်မ (၄၁၇) အရဟုဆိုကာ အာဏာသိမ်းယူပြီး နိုင်ငံတော်ကို စစ်ကောင်စီက အရေးပေါ်အခြေအနေ ကြေညာခဲ့ခြင်းဖြစ်ပါတယ်။ ထိုအရေးပေါ်အခြေအနေ ကြေညာခဲ့တဲ့ နိုင်ငံတော်အာဏာလွှဲဆောင်ရွက်စေခဲ့သည့် အမိန့်အား ပယ်ဖျက်ကြောင်း စစ်ကောင်စီက ဇူလှိုင်လ ၃၁ရက်နေ့ ဒီကနေ့မှာ ထုတ်ပြန်ကြေညာခဲ့ပါတယ်။

၂၀၂၀ အထွေထွေရွေးကောက်ပွဲမှာ မဲစာရင်းမှားယွင်းမှုကို ဖြေရှင်းဖို့ ငြင်းပယ်ခြင်း၊ အရေးယူ ဆောင်ရွက်မှုမပြုခြင်း၊ ပြည်သူ့လွှတ်တော်နှင့် အမျိုးသားလွှတ်တော်အစည်းအဝေးတွေကို ရွှေ့ဆိုင်းပေးဖို့ တောင်းဆိုမှုကိုရွှေ့ဆိုင်းမှုမရှိခြင်း၊ ပြည်သူ့လွှတ်တော်အစည်းအဝေး အစီအစဉ်များထုတ်ပြန်ကာ ဆက်လက်ဆောင်ရွက်ခြင်းတို့ဟာ ဖွဲ့စည်းပုံအခြေခံဥပဒေပါ ပုဒ်မ (၄၁၇) အရ နိုင်ငံတော်ရဲ့ အချုပ်အခြာအာဏာကို အဓမ္မနည်းဖြင့်ရယူဖို့ဆောင်ရွက်ခြင်းဖြစ်ပြီး တိုင်းရင်းသားစည်းလုံးညီညွတ်မှုကို ပျက်ပြားစေတယ်ဟုဆိုကာ စစ်ကောင်စီက နိုင်ငံတော်အာဏာကို ရယူခဲ့တာဖြစ်ပါတယ်။

အဲ့ဒီနောက်မှာ ၂၀၂၁ခုနှစ်၊ ဖေဖော်ဝါရီ ၁ရက်နေ့မှာ နိုင်ငံတော်ကို အရေးပေါ်အခြေအနေကြေညာခဲ့ပြီး ဒုသမ္မတ ဦးမြင့်ဆွေကယာယီသမ္မတအဖြစ် တာဝန်ယူခဲ့ပါတယ်။ ၂၀၀၈ ဖွဲ့စည်းပုံအခြေခံဥပဒေ ၄၁၈၊ ပုဒ်မခွဲ (က) အရဟုဆိုကာ နိုင်ငံတော်ရဲ့ အုပ်ချုပ်ရေး၊ ဥပဒေပြုရေးနှင့် တရားစီရင်ရေးအာဏာတို့ကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ထံ လွှဲအပ်ပြီး အရေးပေါ်အခြေအနေကို တစ်နှစ်သတ်မှတ်ခဲ့တာဖြစ်ပါတယ်။ အဆိုပါအရေးပေါ်အခြေအနေ တစ်နှစ်ကြေညာပြီးနောက်မှာလည်း နိုင်ငံတော်တည်ငြိမ်အေးချမ်းမှုအတွက်ဟုဆိုကာ တစ်ကြိမ်လျှင် သက်တမ်း(၆)လဖြင့် သုံးနှစ်အတွင်း အကြိမ်ကြိမ်သက်တမ်းတိုးပြီးနောက် ဇူလှိုင်လ (၃၁)ရက်မှာ သက်တမ်းပြည့်တာဖြစ်ပါတယ်။
ယခုသက်တမ်းပြည့်ချိန် ၂၀၂၅ခုနှစ် ဇူလှိုင်လ ၃၁ရက်နေ့ နံနက်ပိုင်းမှာ နိုင်ငံတော်ကို အရေးပေါ်အခြေအနေ ကြေညာ၍ နိုင်ငံတော်အာဏာကို လွှဲအပ်ဆောင်ရွက်စေသည့်ကိစ္စနှင့် စပ်လျဉ်း၍ တာဝန်ပြီးမြောက်အောင် ဆောင်ရွက်ပြီးဟုဆိုကာ နိုင်ငံတော်အာဏာ လွှဲအပ်ဆောင်ရွက်စေသည့် အမိန့်အား ပယ်ဖျက်ကြောင်း ကြေညာခဲ့တာဖြစ်ပါတယ်။
လက်ရှိမှာလည်း စစ်ကောင်စီဟာ ၂၀၀၈ ဖွဲ့စည်းပုံ အခြေခံဥပဒေ ပုဒ်မ၄၂၇၊ ပုဒမခွဲ (ခ) အရဟုဆိုကာ ပြည်ထောင်စု အစိုးရအဖွဲ့ကို ဇူလှိုင်လ ၃၁ရက်နေ့ ဒီကနေ့မှာပဲ ဖွဲ့စည်းခဲ့တယ်လို့ သိရပါတယ်။

30/07/2025

သဲဖြူဆရာတော်ဘုရားကြီး၏ဦးဆောင်မှုဖြင့် ဟုမ္မလင်းမြို့ ကုတင်(၁၀၀)ဆံ့ ပြည်သူ့ဆေးရုံတွင် မျက်စိရောဂါဝေဒနာရှင်ပေါင်း (၂၄၃၀)ဦးကို အခမဲ့ စစ်ဆေးကုသပေးနိုင်ခဲ့
====================================
Mouk Pao Nai News Agency
ဇူလှိုင် ၃၀၊ ၂၀၂၅

သဲဖြူဆရာတော်ဘုရားကြီး၏ ဦးဆောင်မှုဖြင့်
ဟုမ္မလင်းမြို့ ကုတင်(၁၀၀) ဆံ့ပြညသူ့ဆေးရုံမှာ
ဇူလှိုင်လ ၂၅ရက်နေ့ မှ ဇူလှိုင်လ ၃၀ရက်နေ့ ဒီကနေ့ အထိ ငါးရက်တိုင်တိုင် မျက်စိရောဂါဝေဒနာရှင် မိဘ ပြည်သူများကို အခမဲ့ စစ်ဆေးကုသပေးခဲ့တာဖြစ်ပါတယ်။
အဆိုပါ (၅)ရက်အတွင်းမှာ မျက်စိရောဂါဝေဒနာရှင်ပေါင်း (၂၄၃၀)ဦးကို အခမဲ့စစ်ဆေးကုသနိုင်ခဲ့တယ်လို့ သိရပါတယ်။ အကြီးစားခွဲစိတ်လူနာပေါင်း (၂၆၄)ဦး၊ အသေးစားခွဲစိတ်လူနာပေါင်း (၅၆)ဦးနှင့် ခွဲစိတ်ရန်မလိုသည့် လူနာပေါင်း (၂၄၃၀)ဦးတို့ကို အခမဲ့ကုသမှုများဆောင်ရွက်နိုင်ခဲ့တယ်လို့ဆိုပါတယ်။

ထိုအခမဲ့ မျက်စိစစ်ဆေးကုသမှုများအတွက်ရှမ်းနီ အမျိုးသားများတပ်မတော် (SNA) ၊ ဗဟိုစစ်ဌာနချုပ် (မိန်းဆိုင်တိုင်းနိုင်း)မှလည်း အလှူငွေ သိန်း (၁၅၀)ကျပ် အားဖြည့်ပါဝင်လှူဒါန်းထားသည့်အပြင် မိန်းဆိုင်တိုင်းနိုင်းမှ အရာရှိငယ်များ စဝ်ဟန်၊နန်းဟန်များ(ရဲဘော်၊ရဲမေများ)မှလည်း နေ့ရောညပါ လုပ်အားပါဝင်ကူညီခဲ့ကြတယ်လို့ သိရပါတယ်။

#ဟုမ္မလင်း
#မိန်းဆိုင်တိုင်းနိုင်း
#မျက်စိအခမဲ့စစ်ဆေးကုသ

29/07/2025

ချင်းတွင်းမြစ်မှ အထက်ဆန်တက်လာတဲ့ စစ်ရေယာဉ်အုပ်စု ဟုမ္မလင်းမြို့သို့ ရောက်ရှိ
====================================

Mouk NaiPao News Agency
ဇူလှိုင် ၂၉၊ ၂၀၂၅။

ချင်းတွင်းမြစ်ကြောင်းအတွင်းဆန်တက်လာတဲ့ စစ်ရေယာဉ်အုပ်စု နှင့် ရာနှင့်ချီသော ကုန်တင်ယာဉ်များသည် ဒီနေ့ ဇူလိုင်လ ၂၉ ရက်နေ့ ညနေပိုင်းမှာ ဟုမ္မလင်းမြို့ကို ရောက်ရှိလာတယ်လို့ သိရပါတယ်။

အဆိုပါ စစ်ရေယာဉ်အုပ်စုနဲ့ ကုန်တင်ယာဉ်တွေဟာ ဇူလှိုင်လ (၁၃)ရက်နေ့မှာ မုံရွာမှစတင်ထွက်ခွာခဲ့ပြီး (၁၀) ရက်ကျော်အကြာမှာ ဟုမ္မလင်းမြို့ကိုရောက်ရှိခဲ့တာဖြစ်တယ်လို့ သိရပါတယ်။

ချင်းတွင်းမြစ်ကမ်းဘေးတလျှောက်မှာ တိုက်ခိုက်ခံရမှုအနည်းငယ်သာရှိခဲ့ပြီး ဟုမ္မလင်းမြို့ဒီကနေ့ ရောက်ရှိနိုင်ခဲ့တာဖြစ်တယ် လို့ သိရပါတယ်။

ထို့အပြင် ဖောင်းပြင်မြို့နယ် အနီး ပိတ်မိနေတဲ့ ကုန်တင်ရေယာဉ်တွေလည်း အဆိုပါစစ်ရေယာဉ်အုပ်စုနဲ့အတူ လိုက်ပါလာခဲ့တယ်လို့ ဒေသခံတွေက ပဆိုပါတယ်။

ပြီးခဲ့တဲ့ ၂၀၂၄ ခုနှစ် စစ်ရေယာဉ်အုပ်စု ဆန်တက်မှုမှာ မင်းကင်း ၊ ကလေးဝ ၊ ကနီ နဲ့ ဟုမ္မလင်းမြို့နယ်အတွင်းမှာ တိုက်ခိုက်ခံခဲ့ရပြီး ရေယာဉ်တချို့ထိခိုက်ပျက်စီးမှုတွေရှိခဲ့တယ်လို့ သတင်းမှတ်တမ်းတွေအရ သိရပါတယ်။

ဟုမ္မလင်းသို့ရောက်ရှိလာတဲ့ ရေယာဉ်အချို့ကိုတွေ့ရစဥ်

Credit Jao Osadha

#ဟုမ္မလင်း
#ရေယာဥ်

28/07/2025

သဲဖြူဆရာတော် ဘုရားကြီး၏ ဦးဆောင်မှုဖြင့် ပြုလုပ်သော အခမဲ့မျက်စိစစ်ဆေးကုသမှုတွင် (SNA)ဗဟိုစစ်ဌာနချုပ် (မိန်းဆိုင်တိုင်းနိုင်း) မှ ငွေ သိန်း(၁၅၀)ကျပ် အားဖြည့်ပါဝင်လှူဒါန်း
====================================
Mouk Pao Nai News Agency
ဇူလှိုင် ၂၈၊ ၂၀၂၅။

သဲဖြူဆရာတော်ဘုရားကြီး၏ ဦးဆောင်မှုဖြင့် ဟုမ္မလင်းမြို့ ကုတင် (၁၀၀)ဆံ့ပြည်သူ့ဆေးရုံတွင် မျက်စိရောဂါဝေဒနာရှင် မိဘပြည်သူများအတွက်ရည်ရွယ်ပြီး အခမဲ့ မျက်စိစစ်ဆေးကုသမှုများကို ဇူလှိုင်လ ၂၅ရက်နေ့မှ စတင်ပြီး ဆောင်ရွက်ပေးနေတာဖြစ်ပါတယ်။

အဆိုပါအခမဲ့ မျက်စိ စစ်ဆေးကုသပေးမှုကို ရှမ်းနီအမျိုးသားများတပ်မတော် (SNA)၊ ဗဟိုစစ်ဌာနချုပ်၊ မိန်းဆိုင်တိုင်းနိုင်းမှ အလှူငွေ သိန်း(၁၅၀)ကျပ် အားဖြည့်ပါဝင် ကူညီလှူဒါန်းခဲ့တယ်လို့ သိရပါတယ်။ ထို့အပြင် မိန်းဆိုင်တိုင်းနိုင်းမှ အရာရှိငယ်များ၊ စဝ်ဟန်၊နန်းဟန်(ရဲဘော်၊ ရဲမေများ) မှလည်း လုပ်အားဖြင့် အားဖြည့်ပါဝင်ကူညီနေကြတယ်လို့သိရပါတယ်။

" မျက်စိအခမဲ့စစ်ဆေးကုသမှုတွေကို ၂၅ရက်နေ့က စပြီးလုပ်ခဲ့တာ ၃၀ရက်နေ့အထိတော့ရည်ရွယ်ထားတယ်။ တကယ်လို့ လူနာတွေများနေရင်တော့ ရက်ထပ်တိုးပြီး ကုသမှုတွေဆောင်ရွက်ပေးသွားမှာပါ" ဟု တာဝန်ရှိသူတစ်ဦးမှဆိုပါတယ်။

#ဗဟိုစစ်ဌာနချုပ်
#မိန်းဆိုင်တိုင်းနိုင်း
#မျက်စိအခမဲ့စစ်ဆေးကုသ

27/07/2025

ဟုမ္မလင်းမြို့နယ်နှင့် ဗန်းမောက်မြို့ရှိ စာသင်ကျောင်းများတွင် ရှမ်းနီအမျိုးသားများတပ်မတော် (SNA)မှ စာအုပ်နှင့် စာရေးကိရိယာများ ထောက်ပံ့လှူဒါန်း
==================================

Mouk Pao Nai News Agency
ဇူလှိုင်လ ၂၇၊ ၂၀၂၅။

ဇူလှိုင်လ ၂၆ရက်နေ့ မနေ့က ဟုမ္မလင်းမြို့နယ်အတွင်းရှိ ခေါ်ကြူဝရွာနှင့် ပုတ်သိုရွာရှိ စာသင်ကျောင်းများတွင် ရှမ်းနီအမျိုးသားများတပ်မတော် (SNA)၊ တပ်မဟာ (၈၉၁) တပ်ရင်း (၄)မှ စာအုပ်နှင့် စာရေးကိရိယာများ ထောက်ပံ့ လှူဒါန်းခဲ့တယ်လို့ သိရပါတယ်။ ထိုနေ့မှာပဲ (SNA) တပ်မဟာ (၆၁၄) စဝ်ဆမ်တာစစ်ကြောင်းမှလည်း ဗန်းမောက်မြို့ပေါ်ရှိ စာသင်ကျောင်းတွေမှာ စာအုပ်နှင့် စာရေးကိရိယာများ လှူဒါန်းခဲ့သည့်အပြင် အဟာရဒါန ကျွေးမွေးလှူဒါန်းမှုများလည်းပြုလူပ်ခဲ့တယ်လို့ သိရပါတယ်။
(SNA) တပ်မဟာ (၈၉၁)တပ်ရင်း (၄)ဟာ ဟုမ္မလင်းမြို့နယ်အတွင်း အခြေပြုလှုပ်ရှားနေတဲ့ တပ်ရင်းတစ်ခုဖြစ်ပြီး စဝ်ဆမ်တာစစ်ကြောင်းမှာ ဗန်းမောက်မြို့ပေါ်မှာ လုံခြုံရေးတာဝန်ယူဆောင်ရွက်နေတဲ့ (SNA) တပ်မဟာ (၆၁၄) ရဲ့ စစ်ကြောင်းတစ်ကြောင်းဖြစ်တယ်လို့ သိရပါတယ်။

#ပညာရေး

24/07/2025

စစ်ကိုင်းတိုင်းဒေသကြီး ဟုမ္မလင်းမြို့တွင် မျက်စိနှင့်ပတ်သက်သော ရောဂါများ အခမဲ့စစ်ဆေးခြင်း ကုသခြင်းများ ဆောင်ရွက်ပေးသွားမည် ဟုဆို
==================================

Mouk Pao Nai News Agency
ဇူလှိုင် ၂၄၊ ၂၀၂၅

စစ်ကိုင်းတိုင်းဒေသကြီးဟုမ္မလင်းခရိုင်၊ ဟုမ္မလင်းမြို့နယ်နှင့် စစ်ကိုင်းအထက်ပိုင်းဒေသရှိ မျက်စိဝေဒနာရှင် မိဘပြည်သူများအတွက် ရည်ရွယ်၍ (၂၆)ရက် ဇူလှိုင်လမှစတင်ပြီး (၃၁)ရက် ဇူလှိုင်လအထိ မျက်လုံးစစ်ဆေးခြင်း၊ ကုသခြင်းများကို အခမဲ့ဆောင်ရွက်ပေးသွားမယ်လို့သိရပါတယ်။ အဆိုပါစစ်ဆေးကုသခြင်းများအတွက် သဲဖြူဆရာတော်ဘုရားကြီးမှ ဦးဆောင်လမ်းညွှန်ပြီး ဟုမ္မလင်းမြို့ သာသနာ့ဇောတိက မြို့မကျောင်းဆရာတော် ဘုရားကြီး၏ ကြီးကြပ်ကွပ်ကဲမှုဖြင့် ဟုမ္မလင်းမြို့ ကုတင်(၁၀၀)ဆံ့ပြည်သူ့ဆေးရုံတွင် ပါရဂူဆရာဝန်များမှ လာရောက်ကုသပေးမှာဖြစ်တယ်လို့ သိရပါတယ်။

မျက်စိစစ်ဆေးကုသလိုသော မိဘပြည်သူများအနေဖြင့် ဟုမ္မလင်းမြို့ ချင်းတွင်းဉရုရှမ်းနီလူငယ် ပါရမီစာကြည့်တိုက်တွင် လာရောက်စာရင်းပေးနိုင်ပြီး လာရောက်ကုသရာတွင် အဆင်ပြေစေရန် သီတဂူ စက္ခုဒါနဆေးရုံတော်ဝင်းအတွင်းတည်းခိုနိုင်တယ်လို့သိရပါတယ်။ တည်းခိုနေချိန်တွင်လည်း စားသောက်စရိတ်များ ကျခံပေးသွားမည်ဖြစ်သည့်အပြင် ဆေးကုသချိန်တွင် သွားလာမှုအဆင်ပြေစေရန် အကြိုအပို့ကားများလည်း စီစဉ်ထားတယ်လို့ ဆိုပါတယ်။
အဆိုပါ အခမဲ့စစ်ဆေးကုသမှုအတွက် ပါရမီလူမှုကူညီရေးအသင်း၊ ချင်းတွင်းဉရု ရှမ်းနီလူငယ်ကွန်ယက် နှင့် ဟုမ္မလင်းမြို့ရှိ ဌာနဆိုင်ရာများမှ လုပ်အားပူးပေါင်းပါဝင်ကူညီဆောင်ရွက်ပေးနေတယ်လို့သိရပါတယ်။

ယခင်ကတည်းကလည်း ပါရမီလူမှုကူညီရေးအသင်းနှင့် ချင်းတွင်းဉရုရှမ်းနီလူငယ်ကွန်ယက်တို့မှပူးပေါင်းပြီး ဟုမ္မလင်းမြို့သီတဂူ စက္ခုဒါနဆေးရုံတော်တွင်မျက်စိအပြင် အခြားအထွေထွေ ရောဂါများကို ပါရဂူဆရာဝန်ကြီးများဖြင့် (၂၀၁၉) ခုနှစ်အထိ (၁၁)ကြိမ်တိုင်တိုင် အခမဲ့ စစ်ဆေးကုသခြင်းများဆောင်ရွက်ခဲ့တယ်လို့ သိရပါတယ််။
"(၆)နှစ်ကျော်ကြာပြီးမှ ကျနော်တို့ဒေသမှာရှိတဲ့ မိဘပြည်သူများအပေါ် အခုလို စစ်ဆေးကုသပေးမှုတွေမှာ ပြန်လည်ပါဝင်ကူညီခွင့် ရတဲ့အတွက် အတိုင်းမသိ ဝမ်းမြောက်ပါတယ်။ ရှေ့ဆက်လည်း နှစ်တိုင်း ခုလိုဆောင်ရွက်ဖို့လည်းကြိုးစားနေမှာပါ" လို့ ချင်းတွင်းဉရု ရှမ်းနီလူငယ်ကွန်ယက် မှ လူငယ်ခေါင်းဆောင်တစ်ဦးဖြစ်တဲ့ စိုင်းခွန်ဆေမှ Mouk Pao Nai News Agency သို့ ပြောကြားခဲ့ပါတယ်။

#ဟုမ္မလင်း
#ပါရမီလူငယ်စာကြည့်တိုက်
#ချင်းတွင်းဥရုရှမ်းနီလူငယ်ကွန်ယက်
#မျက်စိအခမဲ့စစ်ဆေးကုသ

23/07/2025

KIA နှင့် PDF တို့၏ လိင်ကျွန်ပြုအမြတ်ထုတ်မှုများကိုအင်းတော်ကြီးဒေသရှိ ရှမ်းနီအမျိုးသမီးများခံစားနေရ
===================================

Mouk Pao Nai News Agency
ဇူလှိုင် ၂၃၊ ၂၀၂၅ယ

အင်းတော်ကြီးဒေသရှိ ရှမ်းနီအမျိုးသမီးများသည် KIA နှင့် အပေါင်းအပါများဖြစ်သည့် PDF /KPDF လက်နက်များ၏ အတင်းအဓမ္မလိင်ကျွန်ပြု အမြတ်ထုတ်ခြင်းများကို ခံစားနေရတယ်လို့ ဒေသခံများထံမှ သိရှိရပါတယ်။ အင်းတော်ကြီးဒေသတွင် စခန်းအထိုင်ချတပ်စွဲထား သော KIA/PDF တို့၏အဖွဲ့အတွင်းရှိ အရာရှိများ၏ အပျော်မယားအဖြစ် ပြုလုပ်ရန် ဒေသခံ ရှမ်းနီအမျိုးသမီးများအား အတင်းအကြပ် မဲနှိုက်ကာ ရွေးချယ်မှုများပြုလုပ်နေတယ်လို့ ဆိုပါတယ်။

အင်းတော်ကြီးဒေသရှိ ရွာများတွင် အပျိုမိန်းကလေးများအား အတင်းဆွဲခေါ်ပြီး မဲနှိုက်ခိုင်း‌ကြောင်း ၊ မဲပေါက်သူများကို သုံးလခံကိုယ်ဝန်တားဆေး ထိုးပေးကာ အပျော်မယားအဖြစ် အတင်းအကြပ် ပြုလုပ်ခိုင်းကြောင်း၊ သုံးလပြည့်ပြီးပါက ပြန်လွှတ်ပေး ကြောင်း၊ ထိုကဲ့သို့ ပြုလုပ်နေခြင်းသည် ဒေသခံရှမ်းနီလူမျိုးများနှင့် ဒေသအပေါ် စော်ကားနေသလို ခံစားရ ကြောင်း အမည်မဖော်လိုသူ ဒေသခံတစ်ဦးမှ Mouk Pao Nai News Agency သို့ ပြောကြားခဲ့ပါတယ်။

အင်းတော်ကြီးဒေသတွင် ရှမ်းနီအမျိုးသားများတပ်မတော် (SNA) နှင့် KIA/PDF ပူးပေါင်းတပ်ဖွဲ့တို့ အကြား တိုက်ပွဲများ ဖြစ်ပွားလျက်ရှိပြီး SNA မှအင်းတော်ကြီးဒေသရှိ ကျေးရွာအချို့ကို ပြန်လည်ရယူထားနိုင်ခဲ့တယ်လို့လည်း သိရပါတယ်။

#အင်းတော်ကြီးဒေသ

22/07/2025

ရှမ်းနီအမျိုးသားများတပ်မတော် (SNA) မှ ဟုမ္မလင်းမြို့နယ်အတွင်းရှိ စာသင်ကျောင်းများတွင် ဗလာစာအုပ်နှင့် စာရေးကိရိယာများ လှူဒါန်း
====================================
Mouk Pao Nai News Agency
ဇူလှိုင် ၂၂၊ ၂၀၂၅

ရှမ်းနီအမျိုးသားများတပ်မတော် (SNA) တပ်မဟာ (၈၉၁) တပ်ရင်း(၄) မှ ဟုမ္မလင်းမြို့နယ် အတွင်းရှိ စာသင်ကျောင်းများတွင် ဗလာစာအုပ်နှင့် စာရေးကိရိယာများကို ကျောင်းသူကျောင်းသားများထံ ဇူလှိုင်လ (၂၁)ရက်နေ့ မနေ့က သွားရောက်လှူဒါန်းခဲ့တယ်လို့ သိရပါတယ်။
ကောယားကျေးရွှာအုပ်စု အတွင်းရှိ
မကျည်းကုန်းကျေးရွှာ၊တုံမန်ဟဲကျေးရွှာ နှင့် မောင်ခမ်းအုပ်စု အတွင်းရှိ ချောင်းဆုံကျေးရွှာ၊သဲနန်ကျေးရွှာ စသောကျေးရွာ (၄)ရွာရှိ စာသင်ကျောင်းများတွင် သွားရောက်လှူဒါန်းခဲ့ကြခြင်းဖြစ်ပြီး နောက်ထပ်လိုအပ်နေတဲ့စာသင်ကျောင်းတွေမှာလည်း အခုလို ဆက်လက်လှူဒါန်းမှုများ လုပ်ဆောင်သွားမယ်လို့ (SNA) တပ်မဟာ (၈၉၁)မှ တာဝန်ရှိအရာရှိတစ်ဦးမှဆိုပါတယ်။

"ကျနော်တို့ ဒေသမှာ ကျန်းမာရေး၊ ပညာရေးနဲ့ပတ်သက်လာရင် အစစ၊ အရာရာနှိမ့်ကျနေတာ ပညာရေးဆိုတာ လူမျိုးတစ်မျိုး တိုင်းပြည်တစ်ပြည်ရဲ့အနာဂတ်ပဲလေ။ အဲ့တော့ ပညာသင်နေတဲ့ ကျောင်းသားလူငယ်တွေဟာလည်း ကျနော်တို့ရဲ့အနာဂတ်ပဲပေါ့။ ဒါကြောင့် ပညာရေးနဲ့ ပတ်သက်လာရင် ကျနော်တို့တတ်စွမ်းသလောက် ကူညီပံ့ပိုးပေးသွားမှာပါ" ဟု အဆိုပါအရာရှိမှ Mouk Pao Nai News Agency သို့ ပြောကြားခဲ့ပါတယ်။

#တပ်မဟာ(၈၉၁)
#ပညာရေး

17/07/2025

အင်းတော်ကြီး အနောက်ဘက်ကမ်းရှိ လုံးတုံရွာအထိ (SNA) ပြန်လည်ရယူထိန်းချုပ်ထား
===================================

Mouk Pao Nai News Agency

ဇူလှိုင် ၁၇၊ ၂၀၂၅ခုနှစ်

အင်းတော်ကြီးဒေသ နမ့်မွန်းကျေးရွာမှ စတင်ပြီး ရွှေလက်ပန်၊ မိုင်းနောင်၊ မမုန်ကိုင် နှင့် လုံးတုံရွာအထိ ရှမ်းနီအမျိုးသားများတပ်မတော် (SNA) မှ အကြမ်းဖက် (KIA)၊ (PDF) နှင့် NDF ပူးပေါင်းတပ်ဖွဲ့တို့ကို ဇူလှိုင်လ၊ ၁၇ ရက်နေ့ ဒီကနေ့မှာ တိုက်ခိုက်မောင်းထုတ်လိုက်နိုင်ပြီး နေရာယူထိန်းချုပ်ထားတယ်လို့ သိရပါတယ်။
ပြီးခဲ့တဲ့ ဇူလှိုင်လ ၁၃ ရက်နေ့ ညသန်းခေါင်အချိန်မှာ ရှမ်းနီအမျိုးသားများတပ်မတော်(SNA) ကျားဖြူစစ်ကြောင်းမှ (KIA)နှင့် ပူးပေါင်းတပ်ဖွဲ့တို့ ခြေကုပ်ယူထားသော မိုင်းနောင်ဘက်ကို စတင်ထိုးစစ်ဆင်တိုက်ခိုက်ခဲ့ပြီးနောက် အခုလိုထိန်းချုပ်ထားနိုင်ကြောင်းသိရပါတယ်။
"ယခုလို (SNA) မှ ရှမ်းနီကျေးရွာများကို ပြန်လည်ရယူထိန်းချုပ်နိုင်ခြင်းအတွက် ရှမ်းနီလူမျိုးတစ်ဦးအနေဖြင့် ဂုဏ်ယူစွာကြိုဆိုကြောင်း၊ KIA နှင့်ပူးပေါင်းအဖွဲ့များ မိမိတို့ကျေးရွာများကိုထိန်းချုပ်စဉ်က များစွာ အနိုင်ကျင့်ဗိုလ်ကျမှုများပြုလုပ်ကြောင်း၊ မတန်တဆ အခွန်များကောက်ကာ ထိုမှရရှိသောငွေများဖြင့် သုံးဖြုန်းသောက်စားမှုများ၊ ရမ်းကားမှုများပြုလုပ်နေကြောင်း၊ (SNA) မှထိုးစစ်ဆင် လာချိန်မှာတောင် သောက်စားမူးယစ်နေ၍ မသိလိုက်ကြောင်း၊ အခုလည်း လုံးတုံရွာအထိ (SNA) မှထိန်းချုပ်ထားနိုင်သည်ကို များစွာဝမ်းသာပြီး ရှမ်းနီလူမျိုးအများစု နေထိုင်သော အင်းတော်ကြီးဒေသတစ်ခုလုံးကို ရှမ်းနီလူမျိုးများကို ကိုယ်စားပြုသည့် (SNA)မှ ထိန်းချုပ်ထားနိုင်စေချင်ကြောင်း" အမည်မဖော်လိုသူ ဒေသခံတစ်ဦးမှ Mouk Pao Nai News Agency သို့ ပြောကြားခဲ့ပါတယ်။
"ကျနော်တို့က သူများနယ်မြေတွေကို မတရားသဖြင့် သိမ်းပိုက်နေတာမဟုတ်ပူး ကိုယ့်ဒေသ ကိုယ့်လူမျိုးကို ကာကွယ်နိုင်ဖို့ပဲ ဆောင်ရွက်နေတာ။ ခုလိုရှမ်းနီရွာတွေကို မတရားသိမ်းပိုက် အနိုင်ကျင့်နေတဲ့ အဖွဲ့ အစည်းတွေလက်ကနေ လွတ်မြောက်နိုင်ဖို့ အစွမ်းကုန် ပြန်ပြီးတိုက်ထုတ်မှာပါ။ မကြာသေးခင်အချိန်က ညောင်ပင်ရွာမှာ (KIA)နှင့် (PDF) ရဲဘော်တွေ သဘောထားကွဲလွဲမှုတွေဖြစ်ပြီး စကားများကြတယ်လို့ ကြားတယ်။ (KIA) မတရားလုပ်တာကို မကြိုက်ရင်၊ လူမျိုးစုတစ်စုအပေါ် မတရားသဖြင့် အနိုင်ကျင့်နေတာဟာ မမှန်မကန်လုပ်ရပ်လို့ အသိတရားဝင်ပြီး မှန်တာတွေလုပ်ဖို့ (SNA) ထံ အလင်းဝင်လာလိုရပါတယ် နွေးထွေးစွာ ကြိုဆိုနေမှာပါ" လို့ (SNA) မှ တာဝန်ရှိအရာရှိတစ်ဦးမှ Mouk Pao Nai News Agency သို့ ပြောကြားခဲ့ပါတယ်။

#အင်းတော်ကြီးဒေသ
#ကျားဖြူစစ်ကြောင်း

16/07/2025

မိုင်းနောင်မြို့အား အကြမ်းဖက်များလက်မှ ပြန်လည်ရယူသိမ်းပိုက်ခြင်း

===================================
သတင်းဆောင်းပါး

Mouk Pao Nai
ဇူလှိုင်လ ၁၆ရက်၊ ၂၀၂၅

ယမန်နေ့က ရှမ်းနီအမျိုးသားများတပ်မတော် (SNA) ကျားဖြူစစ် ကြောင်းမှ (KIA)၊ (KPDF)၊ (NDF) စတဲ့ အဖွဲ့တွေကို ပြင်းပြင်းထန်ထန်ထိုးစစ်ဆင်တိုက်ခိုက်ပြီး မိုင်းနောင် မြို့နှင့် မမုံကိုင် ကျေးရွာတို့ကို အပြီးသတ် သိမ်းပိုက်လိုက်ကြောင်း ကြားသိရသည်။

ရှေးဟောင်း မိန်းနောင်ခေါ် မိုင်းနောင်မြို့သည် ယနေ့အခါအင်းတော်ကြီး(အင်း)၏ ထင်ရှားသော မြို့/ရွာပေါင်း (၃၀) ကျော်ထဲမှတစ်ခုဖြစ်ပါသည်။
ရှေးယခင် က အလွန်စည်ကားခဲ့ သော ရှမ်းနီတို့၏စည်ခမ်းမြို့တော်မှာ ယနေ့ အင်းတော်ကြီး အင်း၏ရေပြင်အောက်တွင် ရောက်ရှိသွားခဲ့ကြောင်း စာပေမှတ်တမ်းများအရလည်းကောင်း၊ ရှေးခေတ်အဆက်ဆက်လူကြီးသူမများပါးစပ်ရာဇဝင် အရ ပါ သိရှိရသည်။

ရှမ်းနီတွေဟာ အင်း၏ ဝဲယာတွင် အခြေပြုနေထိုင်လာခဲ့ကြသည်မှာ လွန်ခဲ့သော နှစ်ပေါင်း သုံးထောင် ကျော် ရှိပြီဖြစ်ပြီး မြို့၊ ရွာအမည်များ၊ တောတောင် ချောင်း မြောင်းများကို ရှမ်းနီဘာသာဖြင့် မှည့်ခေါ်ခဲ့မှတ်သားခဲ့ကြပါသည်။
ယနေ့ ခေတ်အချိန်ထိ ရှမ်းနီဘာသာစကားနှင့် စာပေများကို အသုံးပြုနေကြဆဲ ဖြစ်ပြီး ရှမ်းနီ ဓလေ့စရိုက်များကို မပျောက်မပျက် တွေ့မြင်နိုင်သော ထင်ရှားသည့် နယ်မြေဒေသဖြစ်ပါသည်။

အဆိုပါ နယ်မြေ ဒေသအား ရန်သူ အကြမ်းဖက်အဖွဲ့များမှ အကြိမ်ကြိမ် လာရောက် ဖိနှိပ်လျက်ရှိသည်။ မြို့ရွာအားလုံးနီးပါးအား လက်နက်အားကိုးဖြင့် မတရားသိမ်းပိုက်ထားကြပြီး ဒေသခံရှမ်းနီလူထုအား ဖမ်းဆီးခြင်း၊အဓမ္မ စစ်မှုထမ်းစေခြင်း ၊ လယ်ယာလုပ်ငန်းနှင့် ရောင်းဝယ်ခြင်းများအား မတရားစည်းကြပ်ခွန်များ ကောက်ခံခြင်းများကို စိတ်တိုင်းကျ စီမံဆောင်ရွက်လျက်ရှိကြသည်။
အင်းတော်ကြီးဒေသတွင် နေထိုင်သော ဒေသခံ ရှမ်းနီလူမျိုးများမှာ အများအားဖြင့် တောင်သူသမားများဖြစ်ကြပြီး အကြမ်းဖက်များ၏ဖမ်းဆီးမှုများကြောင့် လယ်ယာလုပ်ငန်းခွင်သို့ ကောင်းမွန်စွာလုပ်ကိုင်ဆောင်ရွက်ရန် အခက်အခဲဖြစ်လျက်ရှိသည်။

ထို့အပြင် တွေ့ရာလူ ကျားမ မရွေး စစ်မှုထမ်းရန် မတရားဖမ်းဆီးပြီး အချို့ အား ငွေကြေး အဆမတန်နူန်းဖြင့် ပြန်လည်ရွေးကြရကြောင်းလည်းသိရှိရသည်။

ယခုအခါ အဆိုပါကဲ့သို့ မတရားသိမ်းပိုက်ခံထားရသည့် ရှမ်းနီ မြို့ပြ ကျေးရွာ နယ်မြေများအား ပြန်လည်ရရှိရေးအတွက် ရှမ်းနီအမျိုးသားများတပ်မတော်(SNA)မှ ထိုးစစ်ဆင်တ်ိုက်ထုတ်လျက်ရှိသည်။

မတရားသိမ်းပိုက်ထား သော ရန်သူ့လက်တွင်းမှ ပြန်လည်ရရှိနိုင်ရေး အတွက် ရှမ်းနီအမျိုးသားများတပ်မတော် (SNA) ၏ ကာကွယ် ရေး ထိုးစစ်အား ယခုဇူလှိုင်လ (၁၃)ရက်နေ့တွင် ထိုးစစ်ဆင် စတင်တိုက်ထုတ်ခဲ့သည်။
(SNA) ကျားဖြူစစ်ကြောင်း မှ ဇူလှိုင် (၁၄ )ရက် နေ့တွင် မိုင်းနောင်မြို့အား မတရားသိမ်းပိုက်ထားခြင်းမှ ပြန်လည်ရရှိနိုင်ရန် ဆက်လက် ထိုးစစ်ဆင် တိုက်ခိုက်ခဲ့သည်။

၂၀၂၅ခုနှစ် ဇူလှိုင်လ (၁၅)ရက်နေ့တွင် မိုင်းနောင်အား ရန်သူ (KIA၊ KPDF၊ NPDF) တို့ လက်မှ အပြီးသတ် ပြန်လည်သိမ်းပိုက်လိုက်ကြောင်း သိရပါသည်။

ထို့အတူ အင်းတော်ကြီး အင်း ဝဲယာရှိ ရှမ်းနီကျေးရွာများအား (KIA/KIO)၏ မတရားသိမ်းပိုက်ထားသည့် အခြေအနေမှ ပြန်လည်ရရှိရေးအတွက် (SNA)ကျားဖြူစစ်ကြောင်းမှ ဆက်လက် ထိုးစစ်ဆင်လျက်ရှိကြောင်းသိရှိရသည်။

စည်ခမ်းသား ရေးသားသည်

15/07/2025

အင်းတော်ကြီးဒေသမှာ SNA နဲ့ KIA ပူးပေါင်းတပ်တို့ အကြား တိုက်ပွဲဖြစ်ပွား
===================================

Mouk Pao Nai News Agency
ဇူလိုင် ၁၅၊ ၂၀၂၅။

မိုးညှင်းခရိုင် အင်းတော်ကြီးဒေသ မိုင်းနောင်ကျေးရွာမှာ ရှမ်းနီအမျိုးသားများ တပ်မတော် (SNA) နဲ့ ကချင်လွတ်လပ်ရေးတပ်မတော် (KIA) ပူးပေါင်းတပ်တို့အကြား တိုက်ပွဲ ဖြစ်ပွားခဲ့တယ်လို့ သိရပါတယ်။

ရှမ်းနီအမျိုးသားများတပ်မတော် (SNA) ကျားဖြူစစ်ကြောင်းမှ ဇူလိုင်လ၊ ၁၄ ရက် မနက် ၅ နာရီခန့်အချိန်တွင် စတင်ထိုးစစ်ဆင် တိုက်ခိုက်ခဲ့ကြောင်းသိရပြီး (KIA) စခန်းတစ်ခု သိမ်းပိုက်ရရှိခဲ့တယ်လို့သိရပါတယ်။ (SNA)မှ အလောင်း နှစ်လောင်း နဲ့ သေနတ်သုံးလက် ရရှိခဲ့တယ်လို့ ဆိုပါတယ်။

မိုင်းနောင်ကျေးရွာမှာလည်း အဆိုပါတိုက်ပွဲအတွင်း လက်နက်ကြီးကျ၍ နေအိမ်တစ်လုံး ထိမှန်သွားတယ်လို့ ဒေသခံတစ်ဦးက ပြောပါတယ်။

"လမ်းတွေ ပိတ်ထားပြီး မမုံကိုင် နဲ့ လုံးတုံကတော့ စစ်ရှောင်ခွင့်ရသွားကြောင်း၊ မိုင်းနောင်ကတော့ ရှောင်လို့ မရသေးကြောင်း၊ မိုင်းနောင်ရွာထဲ လက်နက်ကြီး ကျလို့ အိမ်တစ်အိမ်ထိသွားကြောင်း" ဒေသခံတစ်ဦးထံမှ သိရပါတယ်။

အင်းတော်ကြီးအရှေ့ခြမ်း ဆနွင်းကုန်းမှာလည်း SNA နဲ့ KIA ပူးပေါင်းတပ်တို့အကြား ပြီးခဲ့တဲ့ လပိုင်းအတွင်းက နှစ်ဖက်တိုက်ပွဲတွေ ဖြစ်ပွားခဲ့တယ်လို့သိရပါသေးတယ်။

KIA နဲ့ ပူးပေါင်းတပ်ဖွဲ့က အင်းတော်ကြီးဒေသမှာ မကြာခဏ လူသစ်စုဆောင်းမှုတွေ လုပ်ဆောင်နေတယ်လို့သိရပါတယ်။

#အင်းတော်ကြီး
#မိုးညှင်း
#ရှမ်းနီ
ဓါတ်ပုံ - SNJ

Mouk Pao Nai

01/08/2025

31/07/2025

30/07/2025

29/07/2025

28/07/2025

27/07/2025

24/07/2025

23/07/2025

22/07/2025

17/07/2025

16/07/2025

15/07/2025

Address

Website

Alerts

Shortcuts

Share

Category