Yesagyo Township Info Committee

02/10/2026

02/10/2026

🇲🇲 NEW: Myanmar military airstrikes on civilian areas in Rakhine State may constitute war crimes, says Fortify Rights. A September 28 airstrike on a crowded market in Kyauktaw Township reportedly killed at least 50 civilians and wounded more than 50 others, including children, Rakhine and Rohingya residents, and a nine-month pregnant woman whose unborn baby was also killed.

The Myanmar junta should be held accountable for war crimes before the International Criminal Court and other possible venues. Governments should also cut off weapons and jet-fuel supplies enabling these attacks.

“The Myanmar military junta's deliberate bombing of a crowded market and civilian areas is an open commission of a war crime. Countries supplying weapons and jet fuel must cut off their supplies, which enable these attacks," said Lynn Htet, Human Rights Specialist at Fortify Rights.

Read the full news release: https://www.fortifyrights.org/mya-inv-2026-10-02/

02/10/2026

သဘာဝဘေးသင့် တနင်္သာရီကို ဗုံးကြဲရုံမက ကူညီရေးအဖွဲ့ကိုလည်း ပစ်ခတ် ဖမ်းဆီး

ဧရာဝတီ၊ အောက်တိုဘာ ၂၊ ၂၀၂၆

တောင်ပြိုမှု နှင့် ရေကြီးမှု သဘာဝဘေးဒဏ် ဆိုးဆိုးရွားရွား ကြုံနေရသည့် တနင်္သာရီတိုင်း ထားဝယ်ခရိုင်သို့ စစ်တပ်က ဗုံးကြဲရုံသာမက ကူညီရေးအဖွဲ့များကိုလည်း ပစ်ခတ်ဖမ်းဆီးနေသည်ဟု ဒေသခံများထံမှ သိရသည်။

စက်တင်ဘာလကုန်ပိုင်း၌ မိုးသည်းထန်စွာ ရွာသွန်းသဖြင့် ထားဝယ်ခရိုင် လောင်းလုံးမြို့နယ်အတွင်း တောင်ပြိုကျကာ မြေအောက်ရောက်သွားသည့် ကျေးရွာများသည် လမ်းများပိတ်ဆို့နေ၍ ကူညီကယ်ဆယ်ရေးများ အချိန်မီ မရောက်ရှိနိုင်သောကြောင့် သေဆုံးမှု တိုးနေသလို ကူညီကယ်ဆယ်ရေးအဖွဲ့များကိုလည်း စစ်တပ်က ဖမ်းဆီးမှုများ ပြုလုပ်နေသည်။

လောင်းလုံမြို့နယ် တောကျဲ ရွာဘက်မှ ကျောက်နီမော်ဘက်ကို လှေဖြင့်သွားသည့် ကယ်ဆယ်ရေးအဖွဲ့ကို ယနေ့ နံနက် ၁၁ နာရီတွင် စစ်သင်္ဘောက ပစ်ခတ် ဖမ်းဆီးခဲ့ကြောင်း သိရသည်။

တနင်္သာရီတိုင်း စစ်ဌာန၊ နည်းဗျူဟာ ၃၃ မှ နည်းဗျူဟာမှူး စောဒါးကို က “ရေလမ်းက သွားကူတဲ့အဖွဲ့တွေ၊ လူဦးရေက ၁၀ ကျော်လောက်ပါတယ်။ ဒေသခံတွေ အများအားဖြင့် ပါတယ်။ သတင်းရတာကတော့ သူတို့က ( စစ်တပ်)က ပစ်ခတ်ခေါ်လိုက်ပြီး စစ်ဆေးနေတယ်။ အခုချိန်ထိ ပြန်မလွှတ်သေးဘူး။ ကယ်ဆယ်ရေးအတွက် သူတို့ ပိတ်ဆို့တာကတော့ တော်တော်ဆိုးတယ်။ ပြည်သူတွေ ဒီလောက်ခံစားနေရတာ လုပ်သင့်လား၊ မလုပ်သင့်လားဆိုတာ လူဆိုရင် စဉ်းစားတတ်တယ်”ဟု ပြောသည်။

ထို့ပြင် လွန်ခဲ့သည့်ရက်ကလည်း ရေဘေးသင့် သရက်ချောင်းမြို့နယ် ကျေးရွာများကို ၂ ရက်ဆက်တိုက် ဗုံးကြဲခဲ့သလို လက်ရှိ စစ်ကြောင်းထိုးရန် ပြင်ဆင်နေသည်ဟု ၎င်းက ပြောသည်။

လောင်းလုံး၊ သရက်ချောင်းနှင့် ထားဝယ်မြို့နယ်တို့၌ မိုး အဆက်မပြတ် ရွာသွန်းမှုကြောင့် စက်တင်ဘာ ၂၆ ရက်မှစ၍ မြေပြိုမှု နှင့် ရေကြီးမှုဒဏ်များကို ခံစားနေရကာ လမ်းပန်းဆက်သွယ်ရေး ခက်ခဲမှု၊ ပိတ်ဆို့ တားမြစ်မှုများကြောင့် ကူညီကယ်ဆယ်ရေး မရောက်နိုင်သေးသည့် ကျေးရွာများစွာရှိနေပြီး သေဆုံးသူ ၄၀ ကျော်ထိ တိုးလာသလို စားနပ်ရိက္ခာပြတ်တောက်မှုများနှင့် ကြုံနေရသည်ဟု ဒေသခံများက‌ ပြောသည်။

01/10/2026

ရန်ကုန်မြို့မှာ အဖမ်းဆီးခံရတဲ့ လူငယ်အရေအတွက်က နောက်ဆုံး ၅ လတာ အတွင်း တလမှာ လူငယ် ၈၀၀ နဲ့ ၁,၀၀၀ အကြား ရှိနေတယ်လို့ မတရားဖမ်းဆီးမှုတွေကို စောင့်ကြည့် စာရင်းပြုစုနေတဲ့ Yangoon Scout Network - YSN က ထုတ်ပြန်လာပါတယ်။

အောက်တိုဘာ ၁၊ ၂၀၂၆

ဘဏ်ပိတ်ချိန်ရောက်ဖို့ မိနစ်ပိုင်း​လောက်လို ​တော့တဲ့အတွက် ငွေသွင်း ၊ငွေထုတ်သူ သိပ်မရှိတော့ပဲ လူရှင်းနေချိန်မှာ ဝင်​လာသူနှစ်ယောက်က အခန်းထဲရောက်တာနဲ့ အသင့်ဝှက်ယူလာတဲ့ သေနတ်နဲ့ ဓါး ကိုထုတ်လိုက်ပြီး ဘဏ်ဝန်ထမ်းတွေဖက် ချိန်ရွယ်ဝေ့ရမ်းရင်း လေသံမာမာနဲ့ ငြိမ်ငြိမ်နေဖို့ သတိပေးလိုက် ပါတယ်။

​လက်ထဲကအိတ်ကို ကိုင်မြှောက်​ပြီး အော်ဟစ် ၊ခုခံရင် ဗုံးဖောက်လိုက်မယ်လို့လည်း ခြိမ်းခြောက်ထားတဲ့အတွက် ဘဏ်ထဲရှိနေသူတွေ ထိတ်လန့်စိတ်နဲ့ ခြေမကိုင်မိ လက်မကိုင်မိ ဖြစ်နေကြချိန်မှာ ကောင်တာ​ပေါ်က ပိုက်ဆံထည့်ထားတဲ့ ဆာလာအိတ်ကိုဆွဲယူပြီး ဘဏ်အ​ပြင်ဖက် ပြေးထွက်သွား​ကြပါတယ်။

ပိုက်ဆံထုပ် ယူပြေးပြေးချင်းပဲ ဘဏ်ထဲရှိနေသူတွေ အော်ဟစ်အကူအညီတောင်း​သံတွေကြောင့် ပတ်ဝန်းကျင်မှာ ရှိနေသူတွေ သိသွား​ပြီး ဝိုင်းဖမ်းကြလို့ ပိုက်ဆံသယ်ပြေးတဲ့ ဓါးကိုင်သူကို လက်ရဖမ်းဆီးမိ လိုက်ပါတယ်။

တဒင်္ဂအတွင်း စိတ်လှုပ်ရှား တုန်လှုပ်ခဲ့ကြရတဲ့ ဒီဖြစ်ရပ်က ဘဏ်ဓါး​ပြတိုက်တဲ့ ရုပ်ရှင် ရိုက်ကွင်း တခု မဟုတ်ပဲ မကြာခင်ရက်ပိုင်းကမှ ရန်ကုန်မြို့လယ် ဗိုလ်တထောင်မြို့နယ်၊ ယူနိူက်တက်အမရာ (UAB)ဘဏ်မှာ ဖြစ်သွား ခဲ့တဲ့ လုယက်မှု မြင်ကွင်း ဖြစ်ပါတယ်။

“တကယ်ကို မထင်မှတ်ထားတဲ့ အဖြစ်ပျက်ပဲ။ တဒင်္ဂလေးအတွင်း လူစည်ကားတဲ့ နေရာမှာ ဖြစ်သွားတာ” လို့ အခင်းဖြစ်ချိန်က UABဘဏ် အနီးဝန်းကျင်မှာ ရှိနေသူတဦးက ပြောပါတယ်။
သူထပ်ပြောလိုက်တဲ့ မှတ်ချက်စကားက ပကတိမြေပြင်မှာ ဖြစ်ပျက်နေတာတွေနဲ့ ပတ်သက်ပြီး ချိတ်ဆက်သတိပြုစရာတွေ ပါဝင်လာပါတယ်။

" ရန်ကုန်မှာ အမှုအခင်းတွေ ဆိုးလာတာ။ လုံခြုံမှု တကယ်မရှိတော့တာလား၊ လုံခြုံမှု ပေးနိူင်သူ မရှိတာလား " လို့ သူက စိတ်မသက်မသာဟန်အနေ အထားနဲ့ ပြောရင်း မေးခွန်းထုတ်သွားပါတယ်။

ရန်ကုန်မြို့မှာ မှုခင်းတွေ တကယ်ပဲ ဆိုးရွားနေတာလားဆိုတဲ့ အချက်ကို ကြည့်မယ်ဆိုရင် ငြင်းမရအောင် ဖြစ်ရပ် မှတ်တမ်းတွေက သက်သေခံနေတာ တွေ့ရပါတယ်။

ရန်ကုန်​မြို့လယ်​ခေါင်မှာ ဘဏ်ဓါးပြတိုက်မှု ဖြစ်ခဲ့တဲ့ စက်တင်ဘာ၂၂ ရက် မတိုင်ခင် သုံးရက်အလိုလောက်က ဆိုရင် စမ်းချောင်းမြို့နယ်ထဲ အုပ်စုဖွဲ့ ရန်ဖြစ်ကြလို့ လူငယ်တဦး သေဆုံးရတာ၊ အဲဒီ​မြို့နယ်မှာပဲ စက်တင်ဘာ ၂၅ ရက်က ကားပါကင်ကိစ္စ အချင်းများရာကနေ ယာဉ်မောင်းတဦး ဓါးနဲ့ထိုး သတ်ခံရတာတွေ ရှေ့ဆင့်၊နောက်ဆင့် ပေါ်ပေါက်ခဲ့ပါတယ်။

ဒါတင်မကပဲ သြဂုတ်လကုန်ပိုင်းနဲ့ စက်တင်ဘာလဆန်းပိုင်းတွေမှာ ဗိုလ်တထောင်၊ဗဟန်းမြို့နယ်တို့က သက်ကြီးပိုင်း အမျိုးသမီးနှစ်ဦး နေအိမ်ထဲ ပစ္စည်းလုယူ သတ်ဖြတ်ခံရတာ ၊ မင်္ဂလာတောင်ညွန့်မြို့နယ်မှာ လူတဦးက ရွှေဆိုင်ပိုင်ရှင်ရဲ့ ခေါင်းကို တူနဲ့ထုပြီး လုယက်ပြေးတာ၊ မရမ်းကုန်း မုဒိတာ အိမ်ရာထဲမှာ အမျိုးသမီး တဦးကို ဓါးထောက်လုယက်တဲ့အတွက် ပတ်ဝန်း ကျင်က ဝိုင်းဖမ်းခဲ့ရတာ စတဲ့ ထိတ်လန့်စရာ အမှုအခင်းတွေကို ဆက်တိုက် ကြားလာရပါတယ်။

မေလ ပထမအပတ်ကလည်း မြောက်ဥက္ကလာပ မြို့နယ်မှာရှိတဲ့ ​နေအိမ်တခုမှာ သေနတ်နဲ့ ဓါးကိုင်ဆောင်ပြီး လူသုံးဦး ဝင်ရောက်ဓါးပြတိုက်ခဲ့​ပြီး ကျူးလွန်သူတွေကို ရပ်ကွက်က ဝိုင်းဖမ်ခဲ့ရသလို ဇွန်တတိယအပတ်ကမြောက်ဥက္ကလာပမြို့နယ် ၊ ဝေဘာဂီမြို့သစ်မှာ လူတစုက လင်မယားနှစ်ဦးကို ဝင်ရောက် ရိုက်နှက်ပြီး ဆိုင်ကယ်နဲ့ ကားကို မီးရှို့ ဖျက်ဆီးသွားတာ ၊မြို့လယ်ခေါင် ရွှေဘုံသာလမ်းမှာ လုပ်ငန်းရှင်တဦး ပြန်ပေးဆွဲခံရတဲ့ အကြမ်းဖက်မှုတွေလည်း ရှိခဲ့ပါတယ်။

ဒီဖြစ်ရပ်တွေက ရန်ကုန်မြို့မှာ ခြောက်လတာ ကာလအတွင်း ဖြစ်ခဲ့တဲ့ အမှုအခင်း များစွာထဲကမှ လူ အများ အထိတ်တလန့်နဲ့ သတိထားမိစရာ တချို့ဖြစ်ပါတယ်။

အခုလို ရန်ကုန်လို အထင်ကရ မြို့ကြီးမှာ ရာဇဝတ်မှုတွေ မကြားဝံ့မနာသာ ကြုံတွေ့နေရချိန် မြို့တော်ရဲ့ အကြီးဆုံး အုပ်ချုပ်ရေး တာဝန်ကို ယူထားသူဟာ တချိန်က ရဲတပ်ဖွဲ့ရဲ့ ထိပ်ပိုင်းခေါင်းဆောင်တဦးလည်းဖြစ် ဒုရဲချုပ်အဖြစ်လည်း တာဝန်ထမ်းဆောင်ခဲ့ဖူးသူတဦး ဖြစ်နေတာဟာ ပိုပြီး မေးခွန်းထုတ်စရာ အခြေအနေ ဖြစ်လာနေပါတယ်။ဟုတ်ပါတယ် ။ စစ်တပ်အာဏာသိမ်းပြီး နောက်ပိုင်းကာလမှာ ရန်ကုန်တိုင်းရဲ့ တတိယမြောက် ဝန်ကြီးချုပ်အဖြစ် စစ်အစိုးရက ဒုရဲချုပ်ဟောင်း ဦးအောင်နိုင်သူကို တာဝန်ပေးထားခဲ့တာပါ။

🔷ဦးအောင်နိုင်သူ ဆိုတာ ဘယ်သူလဲ

သူ့ကို ၂၀၁၉ ခုနှစ်က လူထုအကြား အထူးစိတ်ဝင်စားခံရတဲ့ သက်ငယ်မုဒိန်းမှု တခုဖြစ်တဲ့ ဗစ်တိုးရီးယားအမှု့မှာ နာမည်ဆိုးနဲ့တွဲပြီး လူတွေ သတိထားမိခဲ့ကြတာပါ ။ ကျုးလွန်သူတွေဖက်ကို အကာအကွယ်ပေးလို့ဆိုပြီး လူထုက အကြီးအကျယ် ဝေဖန်မှုတွေနဲ့အတူ သူနာမည်က လူသိများခဲ့ပါတယ်။ ဦးအောင်နိုင်သူဟာ ဒုရဲချုပ် ၊ ဗိုလ်ချုပ်အဆင့် ရာထူးနဲ့ အနားယူပြီး စစ်အစိုးရရဲ့ ရွေးကောက်ပွဲမှာ ကြံ့ခိုင်ရေး ပါတီကိုယ်စားလှယ် အဖြစ် တယောက်တည်း ပြိုင်ရတဲ့ ကိုကိုးကျွန်း မဲဆန္ဒနယ်ကနေ အနိုင်ရပြီး ရန်ကုန်တိုင်း ဝန်ကြီးချုပ်အထိ ဖြစ်လာခဲ့သူပါ။

နေပြည်တော် ပေါ်လာပြီး အုပ်ချုပ်ရေး မြို့တော်အဆင့်ကနေ လျှော့ကျသွားခဲ့ပေမယ့်
အနယ်နယ်၊အရပ်ရပ်က ရွှေ့ပြောင်း အခြေချ စီးပွားလုပ်ကိုင်ကြသူတွေရဲ့ ဗဟိုချက်မ ဖြစ်နေသေးတဲ့ ရန်ကုန်ဟာ ၂၀၂၁ အာဏာသိမ်းမှုနောက်ပိုင်း ပိုပြီးတောက်လောင်လာတဲ့ ပြည်တွင်းစစ်မီးကြောင့် စစ်ဘေးရှောင် ဦးရေ ပိုမို တိုးပွားလာနေပြီး လူဦးရေ ၈ သန်းနီးပါးအထိ ရှိလာနေပါတယ်။ဒါကြောင့် သာမန် လူမှုဘဝ အကြပ်အတည်းတွေက နေ့စဉ်ဘဝ စိန်ခေါ်မှုတွေတင် မကပဲ ဒုစရိုက်မှု ၊ ရာဇဝတ်မှု ပြသနာတွေပါ ရှင်သန် ပေါက်ဖွားရာ ရေခံမြေခံ အရပ်ဒေသ တခုလို ဖြစ်လာနေတာ ဖြစ်ပါတယ်။

ဒီလိုအချိန်မှာ စစ်အစိုးရကို မနှစ်မြို့လည်း ကင်းလွတ်ခွင့်မရသေးတဲ့ ကာလမှာ ရန်ကုန်တိုင်းကို အဓိက စီမံခွင့်ရသူက ရဲထိပ်တန်းအရာရှိ ဖြစ်လာတဲ့အတွက် သူ့ရဲ့အတွေ့အကြုံနဲ့ လုပ်ရပ်တွေကနေ ရာဇဝတ်မှုတွေ ချိုးနှိမ်၊ဟန့်တားနိုင်မလားလို့ မြို့ခံတချို့က မျှော်လင့်ခဲ့ကြပါသေးတယ်။

“မျှော်လင့်တာထက် ယူဆမိလိုက်တာ။ ရန်ကုန်မှာ ဖြိုးမင်းသိန်းကလွဲရင် တပ်ကသူတွေပဲ နေရာယူခဲ့တော့ ဘယ်လို လာမလဲပေါ့ ဆိုပြီးလေ " လို့ အငြိမ်းစားရဲအုပ်တဦးက ပြောပါတယ်။ဒါပေမယ့် အဲဒီ အငြိမ်းစားရဲအုပ်ကပဲ သူသတိထား စောင့်ကြည့်ရတဲ့ သဘောအမြင်နဲ့ ပတ်သက်ပြီး အခုလို ဖြည့်ဆွက် မှတ်ချက် ပေးပါတယ်။

“မစွံပါဘူး။ အခုအထိ သူလုပ်နေတာ ဘာမှမဟုတ်” လို့ ပြောပါတယ်။

အာဏာသိမ်းကာလမှာ ရန်ကုန်တိုင်း ဝန်ကြီးချုပ် နေရာကို ဦးအောင်နိုင်သူက တတိယမြောက် ရယူတာဖြစ်ပြီး သူ့မတိုင်ခင်မှာ ဒုဗိုလ်ချုပ်ကြီးဟောင်း ဦစိုးသိန်းက တာဝန်ယူခဲ့ပါတယ်။
အာဏာသိမ်း ကာလရဲ့ ပထမဆုံး ရန်ကုန်တိုင်းဝန်ကြီးချုပ် အဖြစ် ဦးလှစိုးကို ခန့်အပ်ခဲ့ပြီး သက်တမ်းခြောက်လ ပြည့်ချိန်မှာ မြေနေရာချထားမှုနဲ့ ပတ်သက်ပြီး အဂတိ လိုက်စားတယ်ဆိုကာ ထောင် ၁၅ နှစ် ချခံရသလို သူ့နောက်လိုက်တွေဖြစ်တဲ့ ရန်ကုန်တိုင်း စီးပွားရေးဝန်ကြီး၊ တိုင်းအစိုးရအဖွဲ့ အတွင်းရေးမှူးတို့လည်း ဖမ်းဆီးထောင်ဒါဏ် ချခံခဲ့ရပါတယ်။

အခု တတိယမြောက် ဖြစ်လာတဲ့ ဝန်ကြီးချုပ်နဲ့ ပတ်သက်လို့က သက်တမ်းခြောက်လတာ ရှိလာတဲ့အထိ လောက်လောက်လားလား လုပ်ပြနိုင်တာ မတွေ့ရသေးဘူးလို့ ရန်ကုန်မြို့က စီးပွားရေးသမား တချို့ကလည်း ကောက်ချက်ချပါတယ်။

“ပွဲလိုက်တက်နေတာပဲ များတယ်။ တရားဥပဒေ စိုးမိုးရေးကတော့ မပြောနဲ့ မကြားဖူးတဲ့ မှုခင်းတွေ မြင်လာ၊ကြားလာ ရတာပဲကြည့် " လို့ ရန်ကုန်မြို့ စီးပွားရေး လုပ်ငန်းရှင်တဦးက ပြောပါတယ်။

ရဲဖက်ကလာတဲ့ ဦးအောင်နိုင်သူ အနေနဲ့ သူရဲ့ ကျင်လည်ကျွမ်းကျင်မှုကို ဒုစရိုက်မှု ကျဆင်းရေးမှာ အသုံးချဖို့ထက် အာဏာသိမ်းတာကို ဆန့်ကျင်တဲ့ လူထုကို ဖော်ထုတ်၊ဖမ်းဆီးမယ့် နေရာတွေမှာ အသုံးချလိုတဲ့စိတ် ရည်ရွယ်ထားပုံ ရတယ်လို့လည်း မြို့ခံတချို့က သုံးသပ်ကြပါတယ်။

“မန္တလေးက သူ့အိမ်တောင်သူ မကာကွယ်နိုင်လို့ ဗုံးနဲ့နှစ်ကြိမ်တောင် အပစ်ခံရတာပဲ ကြည့်လေ”လို့လည်း ရန်ကုန်မြို့နေ လူငယ်တဦးက မှတ်ချက်ပေးပါတယ်။

ရန်ကုန်မြို့မှာ တရားဥပဒေ စိုးမိုးမှု ဆုတ်ယုတ်ပျက်ယွင်းနေတာကို ဒုစရိုက်မှု ၊ ရာဇဝတ်မှုတွေ ပေါများလာတာက သက်သေပြနေတဲ့အပြင် တပူပေါ် နှစ်ပူဆင့် မြို့လူထုအတွက် ရင်မအေးစရာ ပြသနာက လူငယ်တွေ ပေါ်တာအဆွဲခံနေကြရတာ ဖြစ်ပါတယ်။

ရန်ကုန်လို မြို့ကြီးပေါ်မှာ နေထိုင်ရင်း စိတ်မလုံခြုံရတဲ့ ခံစားချက်နဲ့ အချိန်တိုင်း စိတ်ခြောက်ခြားနေရတယ်လို့ အရွယ်ရောက် သားသမီးတွေ မွေးထားတဲ့ မိဘတချို့က ပြောပါတယ်။

“ကလေးကလည်း စစ်မှုထမ်း ကိစ္စနဲ့ စိတ်ဒဏ်ရာ ဖြစ်နေတယ်။ လူငယ်တယောက်လို စိတ်မတက်ကြွ နေတော့ဘူး။မိဘဆိုလည်း ကိုယ့်သားကို ရပ်ကွက်က လာခေါ်မှာလား ၊ လမ်းမှာ ခေါ်သွားမလားဆိုတဲ့ စိတ်နဲ့နေ့တိုင်း ပူလောင်ရတာ”လို့ အသက် ၂၁ နှစ်အရွယ် သားတယောက်ရှိတဲ့ မှော်ဘီမြို့နယ်က မိခင်တဦးက မှတ်ချက်ပေးပါတယ်။
မြန်မာ စစ်တပ်ရဲ့ ပြည်သူ့စစ်မှုထမ်း ဥပဒေနဲ့ စစ်သားသစ်စုဆောင်းမှုက အစကတည်းက သမာသမတ် မကျသလို နောက်ပိုင်းမှာ သတ်မှတ် အင်အား မပြည့်ပြည့်အောင် လူစားထိုး ဝယ်တဲ့ တရားမဝင် လူမှောင်ခို ဈေးကွက်တခု ဖြစ်လာတဲ့အပြင် စစ်သားသစ် စုဆောင်းတာ၊ လူပြန်ပေးဆွဲတာ ၊ မိသားစုဆီက ငွေညစ်တဲ့ ပုံစံတွေပါ ရောထွေးလာနေပါတယ်။

အဲဒီလို ရန်ကုန်မြို့မှာ အဖမ်းဆီးခံရတဲ့ လူငယ်အရေအတွက်က နောက်ဆုံး ၅ လတာ အတွင်း တလမှာ လူငယ် ၈၀၀ နဲ့ ၁,၀၀၀ အကြား ရှိနေတယ်လို့ မတရားဖမ်းဆီးမှုတွေကို စောင့်ကြည့် စာရင်းပြုစုနေတဲ့ Yangoon Scout Network - YSN က ထုတ်ပြန်လာပါတယ်။

ဒီလို တရားလက်မဲ့ ဖြစ်နေတဲ့ အခြေအနေမှာ ဝန်ကြီးချုပ်အပါအဝင် တိုင်းအစိုးရအဖွဲ့ရဲ့ အရည်အချင်းက မေးခွန်းထုတ်စရာ ဖြစ်နေပြီး ရန်ကုန်နေ ပြည်သူတွေရဲ့ အခြေအနေက သူခိုးကို ဘဏ္ဏာစိုးအပ်ထားရတဲ့ အခြေအနေ ဖြစ်နေပါတယ်။ ဒီအခြေအနေကို လှိုင်သာယာဖြစ်ရပ်က ပိုပြီး သက်သေခံနေပါတယ်။

အမှတ် (၁) ရပ်ကွက်မှာ ရပ်ကွက်အုပ်ချုပ်ရေးမှူးနဲ့ အဖွဲ့က လူငယ်တဦးကို စစ်မှုထမ်းအတွက် ဖမ်းဆီးခေါ်သွားပြီး ရုံးခန်းထဲမှာပဲ ရိုက်နှက်ကြရင်း လက်လွန် သေဆုံးသွားခဲ့ပါတယ်။ဒီအခြေအနေကို အချင်းချင်းစကားများကြရာကနေ ဖေါ်ကောင်လုပ်ရင်း ဝန်ခံလို့ အမှုက ပေါ်ပေါက်ခဲ့တာ ဖြစ်ပါတယ်။ အခုတော့ အုပ်ကြီးအပါအဝင် ယာအိမ်မှူးအဖွဲ့ဝင် ၆ ယောက်ကို ဖမ်းမိထားပါတယ်။

အခုလို စစ်အစိုးရရဲ့ စီမံအုပ်ချုပ်မှု့အဆင့် အခြေခံအကျဆုံးနေရာမှာ ရှိနေတဲ့ ရပ်ကျေးအုပ်ချုပ်ရေး အဖွဲ့တွေ ကိုယ်တိုင်က ထင်တိုင်းကြဲ နေတဲ့ခေတ်မှာ ပြည်သူတွေအတွက် တရားဥပဒေ စိုးမိုးရေးဆိုတာ အလှမ်းဝေးနေဦးမှာ ဖြစ်ပါတယ်။

Delta News Agency

#ရန်ကုန် #အထိပ်တလန့်မြို့တော် #ဦးအောင်နိုင်သူ #သတင်းဆောင်းပါး
#ရန်ကုန် #ပဲခူး #ဧရာဝတီ #မြစ်ဝကျွန်းပေါ်

01/10/2026

ရခိုင်ပြည်သူ ၅၀ ဦးသေဆုံးစေခဲ့သော စစ်တပ်၏ လေကြောင်းတိုက်ခိုက်မှုကို ပြင်းပြင်းထန်ထန်ရှုတ်ချပြီး AA အပါအဝင် မဟာမိတ်များဖြင့် လက်တွဲ၍ စစ်တပ်ကို အရှိန်မြှင့်တိုက်ခိုက်မည်ဟု ချင်းပြည်သူ့တပ်မတော် ကြေညာ

အောက်တိုဘာ ၁၊ ၂၀၂၆

ရခိုင်ပြည်နယ်၊ ကျောက်တော်မြို့တွင် စစ်တပ်၏ လေကြောင်းတိုက်ခိုက်မှုကြောင့် အရပ်သားပြည်သူ ၅၀ ဦးအထိ သေဆုံးခဲ့မှုအပေါ် ပြင်းပြင်းထန်ထန် ကန့်ကွက်ရှုတ်ချပြီး အာရက္ခတပ်တော် (AA) အပါအဝင် မဟာမိတ်တော်လှန်ရေးအင်အားစုများနှင့် လက်တွဲကာ စစ်တပ်ကို အရှိန်အဟုန်မြှင့် တိုက်ပွဲဝင်သွားမည်ဖြစ်ကြောင်း ချင်းပြည်သူ့အစည်းအရုံး/ချင်းပြည်သူ့တပ်မတော်က ယနေ့ ထုတ်ပြန်ကြေညာသည်။

စက်တင်ဘာလ ၂၈ ရက် နေ့လယ် ၁၂ နာရီဝန်းကျင်အချိန် စစ်တပ်က ရခိုင်ပြည်နယ်၊ ကျောက်တော်မြို့ရှိ လူမျိုးဘာသာပေါင်းစုံ ဝင်ထွက်သွားလာသည့် အိန္ဒိယဈေးအနီးနှင့် ကစ္ဆပနဒီတံတားအနီးဝန်း ကျင်ကို ဂျက်တိုက်လေယာဉ်ဖြင့် ဗုံးကြဲတိုက်ခိုက်ခဲ့သည်။

အဆိုပါ လေကြောင်းတိုက်ခိုက်မှုသည် စစ်ရေးပစ်မှတ်နှင့် သက်ဆိုင်ခြင်းမရှိဘဲ အိန္ဒိယဈေးအတွင်း ရောင်း ဝယ်ဖောက်ကားသွားလာနေသည့် လူမျိုးဘာသာပေါင်းစုံမှ အရပ်သားပြည်သူများကို ရည်ရွယ်ချက်ရှိရှိ ပစ်မှတ်ထားတိုက်ခိုက်ခြင်းဖြစ်ကြောင်း ချင်းပြည်သူ့တပ်မတော်က ပြောဆိုထားသည်။

ယင်းတိုက်ခိုက်မှုအတွင်း ကလေးသူငယ်များနှင့် ကိုယ်ဝန်ဆောင်အမျိုးသမီးများအပါအဝင် အရပ် သားပြည်သူ ၅၀ ဦးအထိ သေဆုံးခဲ့ပြီး ထိခိုက်ဒဏ်ရာရရှိသူ ၆၀ ဦးဝန်းကျင်ရှိကြောင်း၊ ထိုကဲ့သို့ လူအများအပြား သေဆုံးခဲ့ရမှုအပေါ် ကျန်ရစ်သူမိသားစုဝင်များနှင့် အာရက္ခပြည်သူများနှင့်အတူ ထပ် တူထပ်မျှ စိတ်နှလုံးထိခိုက် ကြေကွဲဝမ်းနည်းရပြီး အရပ်သားပြည်သူများကို ပစ်မှတ်ထားတိုက်ခိုက်မှုအပေါ် ပြင်းပြင်းထန်ထန် ကန့်ကွက်ရှုတ်ချကြောင်း ချင်းပြည်သူ့အစည်းအရုံး/ချင်းပြည်သူ့တပ်မတော်က ပြောသည်။

အကြမ်းဖက် မြန်မာ စစ်တပ်အနေဖြင့် အာရက္ခတပ်တော်နှင့် ထိတွေ့ရင်ဆိုင်နေသည့် စစ်မျက်နှာများတွင် ထိခိုက်ဆုံးရှုံးမှုများဖြင့် တပ်လန်ဆုတ်ခွာနေရသဖြင့် ရခိုင်ဒေသရှိ မြို့များနှင့် ကျေးရွာများကို လေကြောင်းမှ ဗုံးကြဲတိုက်ခိုက်ကာ စစ်ရာဇဝတ်မှုများ ကျူးလွန်နေသည်ဟု ချင်းပြည်သူ့တပ်မတော်က ပြောဆိုသည်။

ချင်းပြည်သူ့အစည်းအရုံး/ချင်းပြည်သူ့တပ်မတော်က မိမိတို့၏ “သွေးချင်းမဟာမိတ်” ရက္ခိုင်အမျိုး သားအဖွဲ့ချုပ်/အာရက္ခတပ်တော်နှင့် တလုံးတဝတည်း ဆက်လက်ပူးပေါင်းကာ စစ်ကောင်စီကို အင်တိုက်အားတိုက် ခုခံတွန်းလှန် တိုက်ပွဲဝင်သွားမည်ဖြစ်ကြောင်း တရားဝင်ကြေညာသည်။

ထို့အပြင် စစ်အာဏာရှင်စနစ်အပါအဝင် အခြားမည်သည့် အာဏာရှင်စနစ်မဆို အပြီးတိုင်ချုပ်ငြိမ်းရေး၊ ချင်းပြည်သူလူထု၏ ကိုယ်ပိုင်ပြဋ္ဌာန်းခွင့်ရရှိရေးနှင့် လွတ်လပ်ခြင်း၊ တန်းတူညီမျှခြင်း၊ တရားမျှတခြင်းတို့ကို ဖော်ဆောင်နိုင်မည့် ဖက်ဒရယ်ဒီမိုကရေစီ ပြည်ထောင်စုပေါ်ပေါက်ရေးတို့အတွက် ရည်မှန်းချက်တူညီသည့် မဟာမိတ်တော်လှန်ရေးအင်အားစုများနှင့် ဆက်လက်လက်တွဲပြီး လှုပ် ရှားမှုများကို အရှိန်အဟုန်မြှင့် ဆောင်ရွက်သွားမည်ဖြစ်ကြောင်း ချင်းပြည်သူ့အစည်းအရုံး/ချင်းပြည်သူ့တပ်မတော်က ဆိုသည်။

Khit Thit Media

01/10/2026

သရက်ချောင်းတွင် ရေဘေးသင့်နေချိန် လေတပ်က ပစ်ခတ်ဗုံးကြဲ

အောက်တိုဘာ ၁၊ ၂၀၂၆

ရေဘေးသင့်နေသော တနင်္သာရီတိုင်း ထားဝယ်ခရိုင် သရက်ချောင်းမြို့နယ်တွင် ယနေ့၊ (အောက်တိုဘာလ ၁ ရက်) ညနေတွင် လေယာဉ်များက ဗုံးကြဲ၊ ပစ်ခတ်ခဲ့သည်ဟု ဒေသအခြေစိုက် တော်လှန်ရေးတပ်ဖွဲ့များထံက သိရသည်။

စစ်လေယာဉ်နှစ်စီးက သရက်ချောင်းမြို့တောင်ဘက် ငါးမိုင်ခန့်အကွာ အမှတ် (၈) ပြည်ထောင်စုလမ်းမကြီးဘေးမှ တဆက်တည်း တည်ရှိသည့် ဆင်ကျွန်း၊ ကျောက်ပြင်၊ လဘ၊ ပိတိုင် စသည့်ရွာများအနီး ဗုံး ငါးလုံးကြဲချခဲ့သည်ဟု ဆိုကြသည်။

“လေယာဉ်နဲ့ ကြဲသွားတယ်၊ စက်သေနတ်နဲ့လည်း ပစ်သွားတယ်။ အခုကတော့ ဆက်သွယ်ရေးလိုင်းတွေ ပြတ်တောက်နေတော့ အဆက်အသွယ်မရ ဖြစ်နေတယ်” ဟု ပြည်သူ့ကာကွယ်ရေးတပ်မတော် (PDF) တနင်္သာရီတိုင်းစစ်ဌာန၊ နည်းဗျူဟာ (၃၃) ၏ နည်းဗျူဟာမှူး ရဲဘော်စောဒါးကိုက ပြောသည်။

ပြီးခဲ့သည့် ရက်များက ထားဝယ်ခရိုင် လောင်းလုံး၊ သရက်ချောင်း၊ ထားဝယ်၊ ရေဖြူ လေးမြို့နယ်တွင် ရေဘေးသင့်ခဲ့ပြီး လူ သုံးဒါဇင်နီးပါး သေဆုံးကာ ရာနှင့်ချီ ပျောက်ဆုံးနေသည်။ ယင်းအပြင်ဖုန်းလိုင်း၊ အင်တာနက်လိုင်းများ ပြတ်တောက်လျက်ရှိပြီး စစ်တပ်လေကြောင်းတိုက်ခိုက်မှုကြောင့် ထိခိုက်သည့် အခြေအနေများကို အတည်ပြုရန် ခက်ခဲနေသည်ဟု တော်လှန်ရေးတပ်ဖွဲ့ဝင်များက ပြောကြသည်။

ယနေ့ ဗုံးကြဲမှုအတွင်း ရေဘေးကယ်ဆယ်ရေးရောက်နေသည့် လူမှုကူညီရေးအဖွဲ့တစ်ဖွဲ့ လက်မတင်လေး လွတ်မြောက်ခဲ့ကြောင်း ကယ်ဆယ်ရေးအဖွဲ့ဝင်တစ်ဦးက ဆိုသည်။

ကရင်အမျိုးသားအစည်းအရုံး (KNU)ကလည်း စစ်တပ်သည် သရက်ချောင်းနယ်မြေအတွင်း ဆင်ကျန်း‌ကျေးရွာနှင့် လဘကျေးရွာဝန်းကျင်တို့ကို ညနေ ၃ နာရီဝန်းကျင်တွင် ဗုံးကြဲပြီး စက်သေနတ်ဖြင့်ပစ်ခတ်ကာ လေကြောင်းတိုက်ခိုက်မှုကျူးလွန်ခဲ့ကြောင်း ထုတ်ပြန်ထားသည်။

ဗုံးကြဲခံရသော ကျေးရွာများသည် KNU ၏ အုပ်ချုပ်ရေးနယ်မြေသတ်မှတ်ချက်အရ တပ်မဟာ (၄) နယ်မြေ မြိတ်ထားဝယ်ခရိုင်အတွင်း ပါဝင်နေပြီး ရေဘေးသင့်နေချိန် စစ်တပ်က လူမဆန်သော လေကြောင်းတိုက်ခိုက်မှုများ ကျူးလွန်ခဲ့ခြင်း ဖြစ်ကြောင်း KNU က ဖော်ပြထားသည်။

စက်တင်ဘာလ ၂၆ ရက်မှ ၂၈ ရက်အတွင်း မိုးသည်းထန်စွာ ရွာသွန်းမှုများကြောင့် တောင်ပြို၊ ရေကြီး ရေလျှံမှုများဖြစ်ပေါ်ခဲ့သော သရက်ချောင်းမြို့နယ်အပါအဝင် မြို့နယ်လေးခုတွင် ကယ်ဆယ်ရေးနှင့် ပြန်ထူထောင်ရေးလုပ်ငန်းများကို အရပ်ဘက်လူမှုကူညီရေးအဖွဲ့များက ခက်ခဲစွာ ဆောင်ရွက်နေရသည်။

တနင်္သာရီတိုင်း ထားဝယ်ဒေသအခြေစိုက်တော်လှန်ရေးအဖွဲ့များကလည်း ရေဘေးသင့်ပြည်သူများကို ကူညီနေကြောင်း ဆိုကြသည်။

ထိုသို့ လူထု ကပ်ဘေးဆိုက်နေချိန် စစ်တပ်က အခွင့်ကောင်းယူ၍ စစ်ကြောင်းထိုးခြင်း၊ လေကြောင်း တိုက်ခိုက်ခြင်းနှင့် ရေဘေးအပေါ် နိုင်ငံရေးအရ အသုံးချနေခြင်းများသည် လူမဆန်သော လုပ်ရပ်သာ ဖြစ်သည်ဟု နည်းဗျူဟာ (၃၃/၃၄) မဟာမိတ်ဆက်ဆံရေးတာဝန်ခံ ကိုမင်းထက်က ပြောသည်။

၎င်းတို့အနေဖြင့် ထားဝယ်ခရိုင်အတွင်းရှိ စစ်တပ်၏ တပ်ရင်းဌာနချုပ်များ၊ တပ်စခန်းများ ရေဖုံးလွှမ်းခံရပြီး ပျက်စီးဆုံးရှုံးနေချိန်တွင် ပြည်သူများ၏ မေတ္တာရပ်ခံချက်၊ လူသားချင်းစာနာထောက်ထားမှုများအရ စစ်တပ်စခန်းများကို ဝင်ရောက်တိုက်ခိုက်ခြင်းအပါအဝင် စစ်ရေးလှုပ်ရှားမှု မပြုခဲ့ကြောင်း ၎င်းက ဆိုသည်။

“ပြည်သူလူထုရဲ့ မေတ္တာရပ်ခံချက်အရ ကျွန်တော်တို့ဘက်က ကိုယ်ပိုင်အသိအတွေးအခေါ်အရ ဒီကာလမှာ အခွင့်ကောင်းယူပြီးတော့ မလုပ်သင့်မလုပ်ထိုက်တဲ့ အပြုအမူလို့ပဲ မြင်တယ်။ ကျွန်တော်တို့ဘက်က အခွင့်ကောင်းယူပြီးတော့ စစ်ရေးချဲ့ထွင်တာ၊ နယ်မြေချဲ့ထွင်တာတွေ မရှိပါဘူး”

ယမန်နေ့ (စက်တင်ဘာလ ၃၀ ရက်) ကလည်း ထားဝယ်မြို့အရှေ့ဘက် ပကာရီကျေးရွာအုပ်စု၊ ရေဝိုင်းကျေးရွာအနီး လေကြောင်း ဗုံးကြဲတိုက်ခိုက်မှု ရှိခဲ့ပြီး အထိအခိုက်မရှိကြောင်း သိရသည်။

လက်ရှိတွင် စစ်တပ်က သရက်ချောင်းမြို့တောင်ဘက်တွင် ရေဘေးကယ်ဆယ်ရေး အကြောင်းပြ၍ စစ်ကြောင်းထိုးလျက်ရှိပြီး ရေဘေးသင့်မှုကို အခွင့်ကောင်းယူ၍ ဒေသအတွင်း စစ်ရေးလှုပ်ရှားမှုများ ပြုလုပ်လာပါက လက်တုံ့ပြန်သွားမည်ဟု ကိုမင်းထက်က ပြောသည်။

ထားဝယ်ဒေသအတွင်း လေကြောင်းတိုက်ခိုက်မှုဖြစ်စဉ်နှင့် ပတ်သက်၍ ယနေ့ ညနေအထိ စစ်တပ်ဘက်မှ သတင်းထုတ်ပြန်ထားခြင်း မရှိသေးသလို ဆက်သွယ်မေးမြန်းနိုင်ခြင်းလည်းမရှိသေးပေ။ သို့ရာတွင် ထားဝယ်မြို့ပေါ်၊ သရက်ချောင်းမြို့နှင့်အချို့နေရာများတွင် ကယ်ဆယ်ရေးများ လုပ်ဆောင်နေကြောင်း စစ်တပ်က ထုတ်ပြန်ထားသည်။

ရေဘေးသင့်နေသော ရေဖြူမြို့နယ်တွင်လည်း စစ်တပ်က စစ်ကြောင်းထိုးလာမှုများကြောင့် စက်တင်ဘာလ ၂၅၊ ၂၆ နှင့် ၂၉ ရက်တို့တွင် ဒေသအခြေစိုက်တော်လှန်ရေးအဖွဲ့များနှင့် တိုက်ပွဲအပြင်းအထန် ဖြစ်ခဲ့သေးသည်။

ရေဘေးကြောင့် အထိအခိုက် အများဆုံးဖြစ်ခဲ့သော လောင်းလုံးမြို့နယ်သည် တော်လှန်ရေးတပ်ရင်းတပ်ဖွဲ့များ အားကောင်းသည့်ဒေသ ဖြစ်သည်။

ထို့ကြောင့် ရေဘေးသင့်မှုကို အခွင့်ကောင်းယူ၍ စစ်တပ်က တော်လှန်ရေးထိန်းချုပ်ဒေသများအတွင်း ဒေသခံများအဖြစ်အသွင်ယူ စိမ့်ဝင်လျက်ရှိသည်ဟုလည်း PDF နည်းဗျူဟာ ၃၃ က ယနေ့ ညနေတွင် သတိပေးထုတ်ပြန်ထားသည်။

စစ်တပ်ရန်ကြောင့် လောင်းလုံ၊ သရက်ချောင်းမြို့နယ်များသို့ လာရောက်သည့် ကယ်ဆယ်ရေးအဖွဲ့များ၊ ကယ်ဆယ်ရေး ယာဉ်များ၊ ထောက်ပံ့ရေးယာဉ်များအနေဖြင့် အလံဖြူထောင်၍ သွားလာခြင်း မပြုကြရန် တော်လှန်ရေးအဖွဲ့များက မေတ္တာရပ်ခံထားသည်။

ရေဘေးသင့်နေချိန် စစ်တပ်က လေကြောင်းတိုက်ခိုက်မှုများ ပြုလုပ်ခဲ့၍ အရပ်သား သေဆုံး၊ ဒဏ်ရာ ရရှိမှုများ ယခုနှစ် နှစ်လယ်တွင် ရခိုင်ပြည်နယ်၊ ချင်းပြည်နယ်နှင့်စစ်ကိုင်းအတွင်း ဖြစ်ပေါ်ခဲ့သည်။

ယခုနှစ် ဇူလိုင်လအတွင်း မိုးအဆက်မပြတ်ရွာသွန်းနေမှုကြောင့် ရခိုင်ပြည်နယ်နှင့် ချင်းပြည်နယ်တွင် ရေဘေးသင့်နေချိန် စစ်တပ်က လေကြောင်းတိုက်ခိုက်မှုများ ပြုလုပ်ခဲ့ရာ သုံးနှစ်ကလေး အပါအဝင် ခုနစ်ဦး သေဆုံးခဲ့ပြီး ရွာပေါင်း ၂၀၀ ကျော်မှ ဒေသခံများ ဘေးလွတ်ရာသို့ ထွက်ပြေးခဲ့ရသည်။

အလားတူ ဩဂုတ်လအတွင်း မြန်မာနိုင်ငံအနောက်မြောက်ဖက် စစ်ကိုင်းတိုင်းအတွင်း ရေဘေး အကြီးအကျယ်သင့်နေချိန် စစ်တပ်က လေကြောင်းတိုက်ခိုက်မှုများ ဆက်တိုက်ပြုလုပ်နေသဖြင့် အရပ်သား နှစ်ဦး သေဆုံးပြီး တစ်ဒါဇင်နီးပါး ဒဏ်ရာရရှိခဲ့သည်။

Myanmar Now

01/10/2026

SCEF ကိုယ်စားလှယ်အဖွဲ့ ဩစတြေးလျ နိုင်ငံခြားရေးဝန်ကြီး Penny Wong နှင့် ကင်ဘာရာမြို့၌ တွေ့ဆုံဆွေးနွေး

အောက်တိုဘာ ၁၊ ၂၀၂၆

ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) ကိုယ်စားလှယ်အဖွဲ့သည် ဩစတြေးလျနိုင်ငံခြားရေးဝန်ကြီး Penny Wong နှင့် ၂၀၂၆ ခုနှစ်၊ စက်တင်ဘာလ ၂၈ ရက်နေ့တွင် ဩစတြေးလျနိုင်ငံ၊ ကင်ဘာရာမြို့ရှိ လွှတ်တော်အဆောက်အအုံ၌ တွေ့ဆုံဆွေးနွေးခဲ့ကြကြောင်း သိရသည်။

အဆိုပါ တွေ့ဆုံမှုတွင် SCEF အတွင်းရေးမှူးအဖွဲ့ဝင်နှင့် အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်ဇင်မာအောင် က ဦးဆောင်ခဲ့သည်။

တွေ့ဆုံပွဲသို့ SCEF နိုင်ငံခြားရေးရာအဖွဲ့ဝင်များဖြစ်ကြသည့် ကရင်နီအမျိုးသားတိုးတက်ရေးပါတီ (KNPP) အတွင်းရေးမှူး (၁) နဲနယ်ပလို၊ ကရင်အမျိုးသားအစည်းအရုံး (KNU) နိုင်ငံခြားရေးဌာန အတွင်းရေးမှူး စောနီးမရော့ဒ် နှင့် SCEF ဘဏ္ဍာရေးလုပ်ငန်းအဖွဲ့ဝင်၊ NUG စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာန ပြည်ထောင်စုဝန်ကြီး ဦးတင်ထွန်းနိုင်တို့ တက်ရောက်ခဲ့ကြသည်။

ဆွေးနွေးပွဲအတွင်း မြန်မာနိုင်ငံနှင့် ဒေသတွင်း၏ လက်ရှိ အခြေအနေများ၊ မကြာသေးမီက ဖြစ်ပေါ်တိုးတက်မှုများနှင့် ပတ်သက်၍ ရင်းနှီးပွင့်လင်းစွာ အမြင်ချင်းဖလှယ်ခဲ့ကြပြီး အပြုသဘောဆောင်သည့် ဆွေးနွေးမှုများ ပြုလုပ်နိုင်ခဲ့ကြသည်။

ထို့အပြင် တွေ့ဆုံဆွေးနွေးမှု၏ နောက်ဆက်တွဲအဖြစ် မြန်မာ့ရေးရာ နောက်ဆုံးဖြစ်ပေါ်တိုးတက်မှု အချက်အလက်များကို ထပ်မံပေးပို့သွားရန် သဘောတူညီခဲ့ကြပြီး ဝန်ကြီး Penny Wong နှင့် တွေ့ဆုံဆွေးနွေးခွင့်ရရှိခဲ့သည့်အတွက် SCEF ကိုယ်စားလှယ်အဖွဲ့က ကျေးဇူးတင်ရှိကြောင်း ဖော်ပြခဲ့သည်။

Khit Thit Media

01/10/2026

ပေါက်တော၊ ရသေ့တောင်၊ သံတွဲ၊ ကျောက်တော်မြို့နယ်တို့ကို စစ်တပ်က လေကြောင်းဖြင့် ဆက်တိုက်ဗုံးကျဲ တိုက်ခိုက်မှု ပြည်သူ ၁ ဦး သေဆုံးပြီး ၈ ဦး ဒဏ်ရာရ

အောက်တိုဘာ ၁၊ ၂၀၂၆

ရခိုင်ပြည်၊ ကျောက်တော်၊ ပေါက်တော၊ ရသေ့တောင်နှင့် သံတွဲမြို့နယ်များအပါအဝင် စစ်ရေးပစ်မှတ်မဟုတ်သော မြို့ရွာများနှင့် လူနေရပ်ကွက်များကို အကြမ်းဖက် စစ်ကောင်စီတပ်က ဂျက်ဖိုက်တာများနှင့် Y-12 လေယာဉ်များဖြင့် ဆက်တိုက် ဗုံးကျဲ တိုက်ခိုက်လျက်ရှိရာ အရပ်သားပြည်သူ ၁ ဦး သေဆုံးကာ ၈ ဦး ဒဏ်ရာရရှိပြီး ဘုန်းကြီးကျောင်းနှင့် လူနေအိမ်များ ပျက်စီးခဲ့ကြောင်း ဒေသသတင်းရင်းမြစ်များထံမှ သိရသည်။

ပေါက်တောမြို့နယ်တွင် ယနေ့ အောက်တိုဘာ ၁ ရက်နေ့ နံနက် အစောပိုင်း ၁၂ နာရီကျော်ခန့်တွင် အကြမ်းဖက် စစ်တပ်က ဂျက်ဖိုက်တာ ၃ စီးဖြင့် ဗုံးများ အဆက်မပြတ် ကျဲချတိုက်ခိုက်ခဲ့သလို မကွေးလေတပ်မှ တက်လာသော Y-12 လေယာဉ်တစ်စီးဖြင့်လည်း ဒရော့ဗုံး ၁၄ လုံးခန့် ထပ်မံကြဲချခဲ့သည်။

ယင်းတိုက်ခိုက်မှုကြောင့် ဒေါ်လှကျော့ယှဉ် (၅၄) နှစ်၊ ဒေါ်မသန်းယဉ် (၆၆) နှစ်၊ ဒေါ်မနွယ်စိုး (၄၃) နှစ်၊ မခင်ခင်ဌေး (၂၆) နှစ်နှင့် ဒေါ်မချေ (၄၀) နှစ်တို့ ထိခိုက်ဒဏ်ရာရရှိခဲ့ပြီး လူနေအိမ်များ ပျက်စီးခဲ့ကြောင်း၊ ဒဏ်ရာရရှိသူများအနက် ဒေါ်လှကျော့ယှဉ်မှာ ညာဘက်တင်ပါးတွင် ဗုံးစထိမှန်ကာ ပြင်းထန်စွာ ဒဏ်ရာရရှိခဲ့သည်။

ရသေ့တောင်မြို့နယ်တွင် စက်တင်ဘာလ ၃၀ ရက်နေ့ ည ၁၀ နာရီခန့်က မူစဲကျွန်း ကူတောင်ကျေးရွာသို့ စစ်ကောင်စီက ဂျက်ဖိုက်တာဖြင့် ပေါင် ၅၀၀ ဗုံး ၂ လုံး ကြဲချခဲ့ရာ ဇနီးမောင်နှံနှစ်ဦး ကျည်စထိမှန်ခဲ့သည်။

ယင်းတိုက်ခိုက်မှုကြောင့် အမျိုးသားဖြစ်သူ ဦးအောင်ထွန်းသိန်း (ခ) ဒူးကြီး (၅၁) နှစ်မှာ သေဆုံးသွားခဲ့ပြီး ဇနီးဖြစ်သူ ဒေါ်ဝင်းနု (၄၁) နှစ်မှာ ဒဏ်ရာရရှိခဲ့သည့်အပြင် ကျေးရွာအတွင်းရှိ လူနေအိမ်များလည်း ပျက်စီးသွားခဲ့သည်။

သံတွဲမြို့နယ်တွင် အောက်တိုဘာလ ၁ ရက်နေ့ မွန်းလွဲ ၁ နာရီ ၄၅ မိနစ်ခန့်တွင် အမှတ် (၆) ရပ်ကွက် ဗောဓိကုန်းဈေးလမ်းကို စစ်ကောင်စီတပ်က ဂျက်ဖိုက်တာဖြင့် ဗုံးတစ်လုံး ကျဲချ တိုက်ခိုက်ခဲ့ရာ ဒေသခံများဖြစ်ကြသည့် ကိုစည်သူ (၄၆) နှစ် (ခြေခုံထိမှန်) နှင့် မေသန္တာဝင်း (၃၈) နှစ် (ဘယ်ဘက်ကျောကုန်းထိမှန်) တို့ ဒဏ်ရာရရှိခဲ့သည်။

ကျောက်တော်မြို့နယ်တွင်လည်း ယနေ့ မွန်းလွဲ ၁၂ နာရီခွဲခန့်မှစ၍ လေကြောင်းမှ ဗုံး ၁၀ လုံးထက်မနည်း ကျဲချတိုက်ခိုက်ခဲ့သည်။ မွန်းလွဲ ၁ နာရီကျော်တွင် သကြားရွာရှိ ဘုန်းကြီးကျောင်းကို ဂျက်ဖိုက်တာဖြင့် ဗုံးကျဲခဲ့သဖြင့် ဘုန်းကြီးကျောင်းမှာ ပြိုကျပျက်စီးခဲ့ရပြီး ရဟန်းသံဃာတစ်ပါးမှာ အချိန်မီ ထွက်ပြေးလွတ်မြောက်ခဲ့သည်။ ထို့အပြင် စိုက်ခင်းခြံတစ်ခုအတွင်းသို့ Y-12 လေယာဉ်ဖြင့် ဗုံး ၃ လုံး ကျဲချခဲ့သဖြင့် စိုက်ပျိုးပင်များ ပျက်စီးခဲ့ရသည်။

ပြီးခဲ့သည့် စက်တင်ဘာ ၂၈ ရက်နေ့ကလည်း ကျောက်တော်မြို့ အိန္ဒိယဈေးနှင့် ကစ္ဆပနဒီတံတား အနီးဝန်းကျင်ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့သဖြင့် အရပ်သားပြည်သူ ၅၀ ဦး အစုလိုက်အပြုံလိုက် သေဆုံးပြီး ၅၇ ဦး ဒဏ်ရာရရှိခဲ့သည့် ဖြစ်စဉ်များလည်း ရှိခဲ့သည်။

စစ်ကောင်စီသည် မြေပြင်တွင် အရေးနိမ့်နေချိန်တိုင်း အာရက္ခပြည်အနှံ့ရှိ အရပ်သားပြည်သူများ နေထိုင်ရာ ရပ်ကွက်၊ ကျေးရွာ၊ ဘုန်းကြီးကျောင်းနှင့် ဈေးများကို ပစ်မှတ်ထား၍ လေကြောင်းမှ ရက်စက်စွာ ဗုံးကြဲတိုက်ခိုက်မှုများကို ဆက်တိုက် ပြုလုပ်လျက်ရှိသည်။

Photo credit - ONE NATION NEWS
Khit Thit Media