25/04/2025
Тоон зурхайн ухаан
Хүн амьдралынхаа тодорхой нэгэн үед зурхай, нумерологи зэргийг ихэд сонирхдог. Миний хувьд бас тийм үе байсан. Гэхдээ ямар нэг ер бусын зүйлийг хүлээж, хайгаагүй юм. Өөрийгөө танин мэдэх, байгаль эх надад ямар давуу болон сул талыг өгсөн байж болохыг л ихэд сонирхож, түүндээ ч хариулт авч байлаа. Тэр олсон мэдлэг ухаарал дээрээ хүн ажилвал нилээдгүй үр дүн гардаг юм.
Пифагорын теорем гэдгээр нь та бид сургуульд нэг бус удаа сонсож байсан эрхэм Пифагор бол одоогийн тоон зурхайн үндэслэгчдийн нэг. МЭӨ 532 онд Италийн урд хэсэгт тэр үеийн Грекийн колони байсан Кротонод Питагор өөрийн их сургуулийг байгуулсан байдаг. Хүн, өөрийгөө таньж мэдэх, хөгжүүлэх зорилготой энэ сургуульд тоон зурхайг тусгайлан судалдаг байжээ.
Тоонууд биднийг төрсөн цагаас эхлэн хүрээлж байдаг.
Бидний тухай хамгийн анхны мэдээлэл бол тоон мэдээлэл билээ. Төрсөн өдөр, цаг, өндөр, жин гээд л бидний мэдээлэл тоогоор л эхэлдэг билээ.
Бидний бичиг баримтан дээрх тоо, байшин, орон сууц, утас гэд бид урт наслах тусам илүү олон тоотой холбоотой болж байдаг.
Тоо нь бидний амьдрал, хувь заяанд нөлөөлдөг нь практик дээр удаан хугацааны туршид нотлогдож, батлагдсан бөгөөд энэ бол ид шид биш, харин энэ бол хамгийн ухаалаг эрдэмтдийн нэг Пифагорын гаргасан шинжлэх ухааны арга юм.
Тоон судлал бол зөвхөн тооны шинжлэх ухаан биш, энэ бол хүний тухай шинжлэх ухаан юм: хүний амьдрал, үзэл санаа, үнэ цэнэ, авъяас чадвар, дутагдал тэр бүгдийг зөвхөн таны төрсөн , он, сар, өдрөөр тань тоон зурхайн ухаанаар мэдэх бүрэн боломжтой юм шүү.
