17/07/2025
ЧОЙРЫН БОГД УУЛААР АЯЛАХУЙ
Чоно хүртэл амиа даатгадаг Чойрын богд уул мину хэмээдэг. Үнэхээр л хиймор сүлдний голомт болсон хайрхан. Өдгөө тус ууланд 300 гаруй Аргал угалз тааваараа бэлчиж байна. Энэ ууланд очвол их зүйл үзнээ. Хотоос тийм ч хол биш. Яаралгүй сайхан аялаад амраад ирэх 2 хоногийн маршрутад их тохирох газар шүү.
Хэрхэн очих вэ.
Налайхын наагуур урагшаа салсан засмал замд нийлэн Замын үүд чиглэлд давхихад 230 км дээр Говьсүмбэр аймгийн төв Чойр хот угтах болно. Аливаа аймгийн төвд очвол музейг нь үзчихвэл их зүгээр байдаг /Такс 2000 төгрөг/. За ингээд аймгийн төвд түр саатан хоол унд идэж ходоодоо дүүргэж, дэлгүүр орж тороо дүүргэж, колонк орж банкаа дүүргэж аваад цааш хөдөлнө.
Чойр хүртэл засмал зам эвдрэлтэй учир хурдаа тохируулж яваарай. Харин Чойроос цааш засмал зам эрс сайжирна. Чойр хотоос Чойрын богд уул 37 км зайтай. Үүний 20 км-ыг нь засмалаар давхин зүүн гар тийш эргэсэн шороон замаар салж 17 км явж зорьсон ууландаа очно. /Салах хэсэгт тэмдэглэгээ байдаг/
Ингэж очихын наахан талд Цоорхой рашаан хэмээх гэдэс дотор, сахарт их сайн алдартай газар бий. Зочлоод гараарай. Очиж үзэхэд үнэ төлбөргүй ээ.
Чойрын богд ууланд үзэх юмс их бий. Очоод үзвэл илүү сонирхолтой. Орон нутгийн хөтөч /94541825/ авбал энэ дугаарт холбогдоорой. Хэзээд танд туслахад бэлэн нэгэн бий. Үнэ ханшаа тохироод замчлуулан, тайлбарлуулах боломжтой.
За ингээд амарч яваа хүмүүс байна даа тухлан саатах газар хэрэгтэй бол тус уулнаас холгүйхэн Боржигин голомт нэртэй амралтын газар бий. Уртаашаа өргөөшөө тэнд ганц л бааз байдаг эднийх юм. Эзэн нь гэж их сүрхий уриалгахан эгч бий. Нэг ээлждээ 40 хүн хүлээн авах хүчин чадалтай ба 4 ортой нэг гэр нь 100.000 төгрөг, 2 ортой модон байшин нь 120.000 төгрөг гэхээр үнэ их боломжийн байгаа биз. Мөн шөлтэй хоол нь 12.000 төгрөг, 2 дугаар хоол 15.000 төгрөг, салад 7.000 төгрөг, цай 1.000 төгрөг гээд бас л хямд талдаа шүү. Эднийх зөвхөн Монгол хоолоороо үйлчилдэг юм билээ. Чойроос Чойрын богд явах замд чинь зүүн талд засмалаас 3 км зайд харагддаг. /Баазтай холбогдох утас 95541825, 99592000, 99301229/
Энэ баазад байрлахын нэг гоё зүйл нь нэг ч хадаас ордоггүй Боржигин байшин болон 100 гаруй биет өвийг үзэх боломжтой. Бичил музейнүүдтэй гэсэн үг юм. Музей үзэхэд нэг хүний 10.000 төгрөг байдаг шүү. За тэгээд олуулаа бол хямдруулаад л өгчихдөг сэтгэл нь өег газар даа.
Шатахууны хувьд 100 кмт 10 литр идэх машинтай гэж тооцвол хэлбэлзэх дүнгээр дунджаар 160,000 төгрөгт шатахуунаа хийнэ. Тэр орчимд Моби, Юнителийн сүлжээ барина.
ЧОЙРЫН БОГД УУЛЫН ТУХАЙ
• Байршил: Говьсүмбэр аймаг Сүмбэр сум
• Солбицол: 46°17'47.1” N; 108°44'44.7” E;
• Гурван үгт хаяг: ///гэгээг.дээлэнд.еэвэн
Товч мэдээлэл: Чойрын богд уул нь д.т.д 1686 метр өндөрт монгол орны төвийн бүсийн боржингийн тархац, илэрцийн өмнөд хэсэгт оршдог. Буддын гүн ухаан судлалыг “Чойр” хэмээх агаад Чойрын хийдэд шашны өндөр боловсролтой лам нар цуглаж ном хаялцдаг уламжлалтай, Боржигончуудын шүтээн хайрхан юм. Чойрын Богд уулын ойр орчимд түүх соёлын дурсгалт газрууд, зураг дүрслэлүүд бий. Дагвасүндэл бурхан, Зүүн Жанжин Чойрын хийдийн туурь, түүний дэргэд Цагаан дарь эх бурхан, Хүслийн хад, Хүүхдийн овоо, Илдний зурагтай хад, эртний хятадын төмөр утасны хорооны туурь, Дугар Мээрэнгийн хөшөө гэх мэт газруудтай. Тус хайрханыг орон нутгийн тусгай хамгаалалтанд 1997 онд, 2011 онд байгаль орчны тэнцвэрийг хангах, унаган төрхийг хадгалах, хамгаалах болон байгалийн аялал жуулчлалыг хөгжүүлэх зорилгоор байгалийн нөөц газрын ангиллаар улсын тусгай хамгаалалтад авсан байна
#СоёлтойАялъя
Жич: Аяллын эхлэл цэг: Улаанбаатар хот
