18/10/2025
АНУ-ын зоосны үйлдвэр “American Innovation $1 Coin” хөтөлбөрийн хүрээнд Apple-ийн үүсгэн байгуулагч Стив Жобс-ын хөргийг 1 ам.долларын дурсгалын зоосон дээр мөнхөллөө. Энэхүү хөтөлбөр нь АНУ-ын инновац, шинжлэх ухаан, технологи, инженерчлэл, бүтээлч сэтгэлгээний түүхэн хувь нэмрийг хүндэтгэх зорилготой бөгөөд Жобсын төрөлх нутаг Калифорнийн технологийн хөгжилд оруулсан хувь нэмэр болон дэлхийн соёл, инновацид үзүүлсэн нөлөөг хүндэтгэн ийнхүү мөнхлөх болжээ.
Зоосон дээр царс модоор хүрээлэгдсэн Калифорнийн толгодын дунд хөлөө ачиж суусан залуу Жобсыг дүрсэлжээ.
Түүний бодолд автан суугаа төрх нь “байгаль ба технологийн уялдаа”-г илэрхийлэх бөгөөд технологийг байгалийн жам шиг энгийн, ойлгомжтой болгох Жобсын философийг шингээжээ. Зоосон дээр түүний алдарт “MAKE SOMETHING WONDERFUL” гэсэн ишлэл сийлэгджээ.
Жобс бол Apple II, Macintosh, iPod, iPhone зэрэг бүтээлүүдээрээ хувьсгал авчирсан бөгөөд технологийн түүхэнд хамгийн нөлөө бүхий инноваторуудын нэг билээ. Энэхүү зоос нь гүйлгээнд гарахгүй бөгөөд зөвхөн дурсгалын зориулалттайгаар АНУ-ын зоосны үйлдвэрийн вэбсайтаар 13.25 ам.доллараар худалдаалагдах аж.
Эдгээр нь технологийн сонирхогчид болон зоос цуглуулагчдын хувьд онцгой үнэ цэнтэй дурсгал болох төлөвтэй байна.
