03/07/2025
Уралдааны морин дээр 10 настай хүүхдийг хоёр гуя дээгүүр нь олмоор даруулж бэхэлсний улмаас чирэгдэж нас барсан хэргийг прокурор, шүүх шинжилгээний байгууллага буруу дүгнэсэн гэж үзлээ
Улсын дээд шүүх Я.Цогбадрахад холбогдох хэргийг шүүгдэгчийн өмгөөлөгч Ш.Мөнхцацралын гаргасан гомдлоор хянажээ.
Шүүгдэгч Я.Цогбадрах нь өөрийн азаргыг уралдуулах зорилгоор хөлслөхдөө (уралдах морийг үсэргэж хөлсийг нь шавхрааж сойлгыг тэнцүүлэхийг хэлнэ) амь хохирогч 10 настай А.Сүхбатыг эцэг эхээс нь зөвшөөрөл авалгүйгээр унуулсан байна. Ингэхдээ эмээлгүй морин дээр хоёр гуя дээгүүр нь олмоор даруулсан бөгөөд морь булгин давхихад хохирогчийн хөлийг олмоор даруулж бэхэлсний улмаас чирэгдэж, толгойдоо хүнд гэмтэл авч нас барсан талаарх нотлох баримтууд хэрэгт авагджээ.
Гэтэл хэргийн талаар прокурор болон анхан, давж заалдах шатын шүүхүүд дүгнэлт хийгээгүй, харин хүүхдийг хамгаалалтын хувцас, хэрэгсэлгүйгээр морь унуулснаас болж нас барсан мэт дүгнэлт хийсэн нь хэргийн бодит байдалтай нийцээгүй гэж үзэн шийтгэх тогтоол, магадлалыг тус тус хүчингүй болгож шийдвэрлэжээ.
Мөн энэхүү гэмт хэргийн улмаас хохирогчийн гэр бүлийн гишүүний сэтгэцэд учирсан хор уршгийн зэрэглэл тогтоолгох тухай мөрдөгчийн тогтоолыг Шүүх шинжилгээний байгууллагад хүргүүлсэн боловч дүгнэлт гаргахаас үндэслэлгүйгээр татгалзаж, улмаар шүүх шинжилгээний дүгнэлтгүйгээр сэтгэцийн хор уршгийг мөнгөн хэлбэрээр нөхөн төлүүлэхээр шийдвэрлэсэн нь буруу гэж үзсэн байна.
Иймд хэргийн нотлох баримтад бодит дүгнэлт хийх болон гэмт хэргийн улмаас сэтгэцийн хор уршгийн зэрэглэл тогтоох шинжээчийн дүгнэлтийг гаргуулах байдлаар хэргийг нэг мөр шийдвэрлэх нь хэрэг хянан шийдвэрлэх ажиллагааны эрх ашигт нийцнэ гэж үзлээ.
