06/10/2025
Нэг удаа би аав, ээжийнхээ гэрт ороход сэтгэл өвдөм дүр зураг угтсан юм. Аав минь галын өрөөндөө чимээгүйхэн сууж, ээж минь хоосон шахуу ширээн дээр цай аягалж байлаа. Би хэрэглээний мөнгө өгье гэхээр “Үгүй ээ, хэрэггүй дээ миний хүү. Өөртөө л хэрэглэ. Бид чинь зүгээр” гэж байнга хэлдэг. Би ч тэдний үгэнд итгэж, сэтгэл амар буцдаг байв.
Гэвч тэр өдөр ширээн дээр үмх мах ч үгүй, өтгөн сүү ч үгүй сууж байгааг харсан мөчид миний дотор цуурч унасан юм шиг санагдсан. Тэр үед би ухаарсан – эцэг эх хүн үр хүүхдээ хэзээ ч зовлонд унагахгүй гэж өөрсдийгөө зольдог юм байна гэдгийг.
Түүнээс хойш би асуулгүйгээр сар бүр хэрэглээний мөнгө шилжүүлдэг болсон. Ядаж хэрэглээндээ санаа зоволгүй шимтэй хоол идэж, өтгөн сайхан цай ууж суугаа гэж бодохоор сэтгэлд өег. Харин ч бүр тэднийхээ төлөө улам илүү хичээж ажилламаар санагддаг болсон. Тэд “Миний хүү өөрийгөө бод, бидэнд бүү санаа зовоорой” гэж одоо ч хэлдэг.
Залуучууддаа хандаж хэлэхэд:
Эцэг эхийнхээ үгэнд бүү хуурт. Тэд үргэлж өөрсдийгөө зольж, хүүхдээ боддог. Харин бидний хийх ёстой зүйл бол тэдний өгсөн хайрын хариуд халамжаар хариу барих.