22/09/2025
ЭЛСЭГЧДИЙН ЭЕШ-ЫН ДУНДАЖ ОНОО 40 НЭГЖЭЭР АХИСАН
📌Монгол Улсын боловсролын ууган байгууллагуудын нэг Үндэсний Батлан Хамгаалахын Их сургуулийн 2025-2026 оны хичээлийн шинэ жил эхэлсэнтэй холбогдуулан Сургалтын хэлтсийн дарга хурандаа Н.ЦОГТГЭРЭЛ-тэй ярилцав.
📌Шинэ хичээлийн жилдээ ҮБХИС-ийн хийж хэрэгжүүлэх шинэлэг үйл ажиллагаануудын тухай танилцуулна уу?
-Биднийг онцлог үйл явдлаар арвин жил угтаж байна. Үндэсний аюулгүй байдлын гадаад орчин, геополитикийн нөхцөл байдал тодорхойгүй, бүс нутгийн байдал тогтвортой бус, их гүрнүүдийн стратегийн сөргөлдөөн хурцдаж байгаа энэ үед эх орноо батлан хамгаалах, үндэсний сөрөн тэсвэрлэх чадавхыг бэхжүүлэх үйлсэд хүчин зүтгэх ирээдүйн офицер, ахлагч нарт тавигдах шаардлага улам өндөр болж байна.
Ялангуяа олон улсын болон үндэсний аюулгүй байдлын талаар гүнзгий ойлголттой, шинэ техник, технологийн талаар өндөр мэдлэгтэй нарийн мэргэжлийн инженер, техникийн офицер, ахлагч нарын эрэлт хэрэгцээ нэмэгдэх нь дамжиггүй болж байна. Эдгээр нөхцөл байдалтай уялдуулан Цэргийн нэгдсэн сургуулийн харьяанд Кибер аюулгүй байдлын тэнхимийг шинээр байгуулж Программ хангамж, сүлжээний инженер мэргэжлээр шинээр элсэлт авлаа. Энэхүү хөтөлбөрөөр элсэн суралцагчид нь цаашид Кибер аюулгүй байдлын цэрэг төдийгүй Зэвсэгт хүчний анги салбаруудад чухал хэрэгцээтэй боловсон хүчин болох юм. Ирээдүйн манлайлагч, офицеруудын гадаад хэлний мэдлэг, бие бялдар, сэтгэл зүйн бэлтгэлжилтэд онцгой анхаарч “Сонсогч бүр тамирчин байх” зарчмыг хэрэгжүүлнэ. Өөрөөр хэлбэл сонсогч бүр суралцах хугацаандаа биеийн тамирын хичээлээс гадна спортын аль нэг төрлийг сонгон дөрвөн жил тасралтгүй хичээллэх, бэлтгэл хийх боломжийг бүрдүүллээ.
📌Гадаад хэлний хэрэгцээ аль ч салбарт чухал байр суурьтай. Энэ хүрээнд ямар ажлууд хэрэгжүүлж байгаа вэ?
-Англи хэлний сургалтын хугацааг нэмэгдүүлэн төгсөхдөө англи хэлний дунд шатны мэдлэг эзэмшсэн байх шаардлага тавина. Ингэхдээ зөвхөн багш заах бус сонсогчид бие даан суралцах, идэвх чармайлтыг дэмжих замаар хэрэгжүүлэх юм. Их сургуулийн номын санд сонсогч, оюутны бие даан суралцах танхимын тоог нэмэгдүүлэн нэг танхимыг гадаад хэлний бие даан суралцах төв болгон тохижууллаа. Мөн сонсогчдын судалж буй ерөнхий суурь хичээлийн багц цагийг нэмэгдүүлсэн. Ялангуяа байгалийн ухааны хичээлийг анги дэвшин суралцах шалгуурт хамруулсан. Гадаад хэл, биеийн тамирын бэлтгэлжилтийн төвшнийг жил бүр тогтоож, байгалийн ухааны хичээлүүдийн үнэлгээ, шалгуурыг зайлшгүй давж гарсны үндсэн дээр анги дэвших тогтолцоог бүрдүүлэхээр төлөвлөж байна.
Сургалтын орчныг сайжруулах ажлын хүрээнд Ахлагчийн политехникийн коллежийн хичээлийн байрны бүтээн байгуулалтыг Батлан хамгаалах яамны дэмжлэгтэйгээр хийж ирэх 10 дугаар сараас шинэ байранд хичээл, сургалтын үйл ажиллагаагаа эхлүүлэхээр болсон.
📌Шинэ элсэгчдэдээ ямар шалгуур шаардлага тавьсан бэ?
-Их сургуулийн нэр хүнд, үйл ажиллагаа жилээс жилд сайжирч элсэхийг хүсэгч иргэдийн тоо нэмэгдэж байна. Энэ жилийн хувьд шинээр зарим хөтөлбөрүүдийг нээсэн, дөрвөн жилийн цэргийн сургалтын тогтолцоонд шилжсэн, нийгэмд Зэвсэгт хүчний нэр хүнд өндөр байгаа зэрэг олон шалтгаанаар их сургуульд элсэн суралцахаар хандсан иргэдийн өрсөлдөөн их байлаа. Бид элсэгчдэд Элсэлтийн ерөнхий шалгалтын (ЭЕШ) онооны шалгуураас гадна эрүүл мэнд, бие бялдрын болон биеийн өндрийн хувьд тодорхой шалгуур тавьж элсэлтийг зохион байгуулсан. Тухайлбал биеийн жингийн зохистой харьцааг хангасан, эрэгтэй 170 см, эмэгтэй 165 см дээш өндөртэй, 17-22 насны иргэдийг элсүүллээ. Зөвхөн энэ онд гэхэд ЦНС-д элсэгчдийн ЭЕШ-ын дундаж оноо 40 нэгжээр ахисан байна.
📌“Цэргийн анхан шатны бэлтгэл” сургалтад хамрагдаж цэргийн тангаргаа өргөсөн залуус сэтгэл хангалуун байгаа нь анзаарагдсан.
-Тэгэлгүй яах вэ. “Цэргийн анхан шатны бэлтгэл” сургалт амжилттай явагдаж, Цэргийн нэгдсэн сургууль, Цэргийн хөгжмийн политехникийн коллеж, Ахлагчийн политехникийн коллежид шинээр элссэн сонсогчид болон гадаадын улс орнуудын цэргийн их, дээд сургуульд суралцах суралцагчид, Батлан хамгаалах яамны харьяа байгууллагуудад офицер, ахлагчийн албан тушаалд энгийнээр ажиллаж байгаа алба хаагчид хамрагдаж Монгол Улсын Цэргийн тангараг өргөн, өндөр босгыг давж цэргийн албанд орлоо.
📌Та бүхний цаашдын зорилго юу вэ?
-Цаашид салбарт хэрэгцээтэй мэргэжлийн хөтөлбөрүүдийг үе шаттайгаар нэмэгдүүлэх, гадаад, дотоодын их дээд сургуультай хамтарсан хөтөлбөрүүдийг хэрэгжүүлж, салбарын ирээдүйг тодорхойлогч өндөр мэдлэг, ур чадвар, ёс зүйтэй офицер, ахлагчийг бэлтгэх талаар үе шаттай ажлуудыг зохион байгуулж байна. Тухайлбал ҮБХИС-д бэлтгэх боломжгүй боловч салбарт нэн шаардлагатай эрх зүйч, эмч, сувилагч, нарийн мэргэжлийн инженерүүд зэрэг хөтөлбөрийг дотоодын тэргүүлэх их, дээд сургуулиудтай хамтран хэрэгжүүлэх бэлтгэл ажлыг эхлүүлээд байна. Ингэснээр ирэх хичээлийн жилээс 1-2 хамтарсан хөтөлбөрийг нээх, цаашид жил бүр тогтмол нэмэх юм. Зэвсэгт хүчинд шаардлагатай байгаа барилга, зам гүүр, механик болон электроникийн инженерийн тэнхимийг нээх замаар инженерийн хөтөлбөрийг тасралтгүй нэмэгдүүлнэ.
Ярилцсан танд баярлалаа. Эрдэм мэдлэг түгээж, эх орноо батлан хамгаалах дайчдаа бэлтгэх их үйлсэд нь амжилт хүсье.
Дэслэгч П.СИЙЛЭГМАА
