https://www.facebook.com/975595385645587/

Rasfaru Online, Male’, Male (2026)

26/08/2026

‏ނޭޝަންޗެޓް މިރޭ 21:00 ގައި ޕީއެސްއެމް ނިއުސްއިން

17/08/2026

އއ. ރަސްދޫގައި ގާއިމުކުރާ ޒަމާނީ އައުޓްޑޯ ޖިމްގެ އިކުއިޕްމަންޓްތައް އެ ރަށަށް ގެންގޮސްފި

އއ. ރަސްދޫގައި ދުޅަހެޔޮ މުޖުތަމައެއް ބިނާކުރުމަށްޓަކައި އެ ރަށުގައި ގާއިމުކުރުމަށް ހަމަޖެހިފައިވާ ޒަމާނީ އައުޓްޑޯ ޖިމަށް ބޭނުންވާ ސާމާނު (އިކުއިޕްމަންޓްސް) މިއަދު އެ ރަށަށް ގެންގޮސްފިއެވެ.

ރަސްދޫ ކައުންސިލުން މައުލޫމާތު ދެއްވި ގޮތުގައި، ރަށުގެ ރައްޔިތުންނާއި ޒުވާނުންގެ ސިއްހީ ދުޅަހެޔޮކަން އިތުރުކޮށް، ކަސްރަތު ކުރުމުގެ ފުރުސަތު ފަހިކޮށްދިނުމުގެ ގޮތުން ގާއިމުކުރާ މި އައުޓްޑޯ ޖިމްގެ ސާމާނު މިހާރު ވަނީ އެ ރަށަށް ލިބިފައެވެ. އަދި މާތް ﷲ ގެ ވާގިފުޅާއެކު، ވަރަށް އަވަހަށް މި އިކުއިޕްމަންޓްތައް އިންސްޓޯލްކޮށް (ހަރުކޮށް) ބޭނުންކުރަން ފެށުމުގެ އަމަލީ މަސައްކަތްތައް ކުރިއަށްދާނެ ކަމަށް ވެސް ކައުންސިލުން ބުނެފައިވެއެވެ.

ރަސްދޫގައި މިފަދަ ޒަމާނީ ފެންވަރުގެ އައުޓްޑޯ ޖިމެއް ގާއިމުކުރެވިގެން ދިއުމަކީ ރަށުގެ ހުރިހާ އުމުރުފުރައެއްގެ މީހުންނަށް ވެސް ދުޅަހެޔޮ ސިއްހަތެއްގައި ދެމިތިބުމަށް މަގުފަހިވެ، ކަސްރަތު ކުރުމުގެ ރީތި އާދަ އަށަގެންނެވުމަށް ލިބިގެންދާނެ ވަރަށް ބޮޑު ހިތްވަރެކެވެ. މި ޖިމްގެ މަސައްކަތް ނިމުމުން، ރަށުގެ ގިނަ އަދަދެއްގެ ރައްޔިތުންނަށް މި ތަނުގެ ފައިދާ ލިބިގެންދާނެއެވެ.

15/08/2026

ރަސްދޫގައި ފަތަން ދަސްކޮށްދިނުމާއި މޫދު ކަސްރަތު ޕްރޮގްރާމެއް ފަށަނީ

ރަސްދޫ ކައުންސިލުން އިސްނަގައިގެން، އެ ރަށު ސްކޫލްގެ ދަރިވަރުންނަށާއި ބެލެނިވެރިން އަދި މުދައްރިސުންނަށް ޚާއްޞަކޮށްގެން ފަތަން ދަސްކޮށްދިނުމާއި މޫދު ކަސްރަތު ޕްރޮގްރާމެއް ހިންގުމަށް ނިންމައިފިއެވެ.

މި ޕްރޮގްރާމަކީ ރަސްދޫ ސްކޫލުގެ ގްރޭޑް 1 އިން ފެށިގެން 9 ގެ ދަރިވަރުންނަށް އަމާޒުކޮށްގެން ފަތަން ދަސްކޮށްދިނުމަށް ކުރިއަށްގެންދާ ޚާއްޞަ ޕްރޮގްރާމެކެވެ. މި ޕްރޮގްރާމްގެ ކްލާސްތައް ނަންގަވައިދެއްވާނީ ސްވިމިންގ އެސޯސިއޭޝަންގެ އިންސްޓްރަކްޓަރެއް ކަމަށްވާ ނައުފަލް އެވެ.

ދަރިވަރުންގެ އިތުރުން، ބެލެނިވެރިންނާއި މުދައްރިސުންނަށް ޚާއްޞަކޮށްގެން ފަތަން ދަސްކޮށްދިނުމާއި މޫދު ކަސްރަތު ކުރުމުގެ ފުރުޞަތު ވެސް މިހާރު ވަނީ ހުޅުވާލާފައެވެ. މި ޕްރޮގްރާމްގައި ބައިވެރިވާން އެދޭ ފަރާތްތަކުން 9655235 އަށް ގުޅުއްވައިގެން ނަން ނޯޓުކުރުމުގެ ފުރުޞަތު، 18 އޮގަސްޓް 2026 ވާ އަންގާރަ ދުވަހުގެ 14:00 އާ ހަމައަށް ވަނީ ހަމަޖެހިފައެވެ.

ޖުމްލަ 10 ދުވަހުގެ މުއްދަތަކަށް ކުރިއަށްގެންދާ މި ޕްރޮގްރާމްގައި ބައިވެރިވާ ކޮންމެ ބެލެނިވެރިއަކަށާއި މުދައްރިސަކަށް، ސްވިމިންގ އެސޯސިއޭޝަންގެ ފަރާތުން ހަނދާނީ ފިލައެއް ދިނުމަށް ވަނީ ނިންމާފައެވެ. މީގެ އިތުރުން، މި ޕްރޮގްރާމްގެ ތެރެއިން އެންމެ ބޮޑަށް ބަރުދަން ލުއިކުރާ ފަރާތްތަކުގެ މެދުގައި ވާދަވެރިކަން އުފެއްދުމުގެ ގޮތުން 1 ވަނަ، 2 ވަނަ އަދި 3 ވަނަ ހޮވައި އިނާމު ދިނުމަށް ވެސް ވަނީ ހަމަޖެހިފައެވެ.

މި ޕްރޮގްރާމާ ގުޅޭގޮތުން "ރަސްފަރު އޮންލައިން" އަށް މަޢުލޫމާތު ދެއްވަމުން ކައުންސިލް މެންބަރު ޒީނިޔާ ޢަބްދުއްސައްތާރު ވިދާޅުވީ، މި ޕްރޮގްރާމަކީ ރަށުގެ ދަރިވަރުންނާއި އާންމު ރައްޔިތުންގެ މެދުގައި ދުޅަހެޔޮ ޞިއްޙަތެއް ޤާއިމުކުރުމަށާއި، ފަތަން ނޭނގޭ ފަރާތްތަކަށް އެ ހުނަރު ދަސްކޮށްދިނުމުގެ މަޤްޞަދުގައި ކުރިއަށްގެންދާ މުހިންމު ޙަރަކާތެއް ކަމަށެވެ.

14/08/2026

"ދެވި" ފިލްމުގެ އިންތިޒާރު މާދަމާއަށް - ކައުންޓްޑައުން ފެށިއްޖެ!

ދިވެހި ފިލްމީ ދާއިރާގައި ފަހަކަށް އައިސް އެންމެ ބޮޑު އިންތިޒާރެއް ކުރެވެމުންދާ އެއް ފިލްމު ކަމަށްވާ "ދެވި"ގެ މުހިންމު އަޕްޑޭޓަކަށް ފޭނުން ތިބީ ކެތްމަދުވެފައެވެ. ދެވި ޓީމުން އިން މިއަދު އާންމުކޮށްފައިވާ މައުލޫމާތުތަކަށް ބަލާއިރު، މި ފިލްމާ ގުޅޭ ހާއްސަ ކަމެއް މާދަމާ ހާމަކުރާނެކަން މިވަނީ ކަށަވަރުވެފައެވެ.

ފިލްމުގެ ޕްރޮމޯޝަނަލް ޓީމުން މިއަދު ސޯޝަލް މީޑިއާގައި ބުނެފައިވަނީ، މާދަމާ ހަވީރު 16:00 ގައި ވަރަށް ހާއްސަ ކަމެއް ފެނިގެންދާނެ ކަމަށެވެ. "ދަ ކައުންޓްޑައުން އިޒް ގެޓިން ރިއަލް" ގެ ނަމުގައި ފަށާފައިވާ މި ކައުންޓްޑައުންއާއެކު، ފިލްމަށް އިންތިޒާރުކުރާ ގިނަ ބައެއްގެ މެދުގައި ވަނީ ބޮޑު ޝައުގުވެރިކަމެއް އުފެދިފައެވެ.

"އަހަރެމެން މިތިބީ މާދަމާއަށް ކެތްމަދުވެފައި. ދެވި ފިލްމުގެ އޮފިޝަލް ޕޭޖުން ހިއްސާކޮށްފައިވާ މެސެޖުގައިވެއެވެ.

މި ފިލްމަކީ ތަފާތު ރަހަތަކެއް އެކުލެވޭ، ދިވެހި ސިނަމާއަށް އާ އުންމީދުތަކެއް ގެނެސްދޭނެ ފިލްމެއް ކަމަށް ބެލެވެއެވެ. މާދަމާ ހަވީރު 16:00 ގައި އާންމުކުރާނީ ފިލްމުގެ ޓްރެއިލާ ނުވަތަ ރިލީޒްކުރާ ތާރީހު ކަމަށް ގިނަ ބަޔަކު ދަނީ ލަފާކުރަމުންނެވެ.

"ދެވި" ފިލްމުގެ ޓީމުން ބުނާ ގޮތުގައި، މި ފިލްމަކީ ބެލުންތެރިން ސިއްސުވާލާނެ ފަދަ މޮޅު މަސައްކަތްތަކެއް ފެނިގެންދާނެ ފިލްމެކެވެ. އެހެންކަމުން، މާދަމާ ހަވީރުގެ ވަގުތަކީ ފިލްމީ ދާއިރާއަށް ލޯބިކުރާ އެންމެހާ ފަރާތްތަކުން ސަމާލުކަން ދޭންޖެހޭ ވަގުތެކެވެ.

14/08/2026

ވޭސްޓް މެނޭޖްމަންޓް ކޯޕަރޭޝަން (ވޭމްކޯ) ގެ ޚިދުމަތް އަތޮޅުތެރެއަށް ފުޅާކުރުމަށް ބޭނުންވާ އުޅަނދުތައް ހަވާލުކޮށްފި

ރަށްރަށުގެ ކުނި މެނޭޖްކުރުމުގެ ނިޒާމު ހަރުދަނާކޮށް، ވޭސްޓް މެނޭޖްމަންޓް ކޯޕަރޭޝަން (ވޭމްކޯ) ގެ ޚިދުމަތްތައް އަތޮޅުތެރެއަށް ފުޅާކުރުމަށްޓަކައި ބޭނުންވާ ޚާއްޞަ އުޅަނދުތަކެއް މިއަދު (ވޭމްކޯ) ހަވާލުކޮށްފިއެވެ.

މި މަޝްރޫޢުގެ މައިގަނޑު މަޤްޞަދަކީ ރަށްރަށުގައި އުފެދޭ ކުނި ރައްކާތެރިގޮތުގައި ނައްތާލުމުގެ އިންތިޒާމު ފަސޭހަކޮށްދިނުމެވެ. އަލަށް ހަވާލުކުރެވުނު އުޅަނދުތަކާއެކު، ވޭމްކޯގެ ޚިދުމަތް ރަށްރަށުގައި ދިނުމަށް އިތުރު ލުއިފަސޭހަތަކެއް ލިބިގެންދާނެއެވެ. މީގެ ކުރިން ބައެއް ރަށްރަށުގައި ކުނި އުފުލުމަށް ދިމާވެފައިވާ ދަތިތަކަށް މި އުޅަނދުތަކުގެ ސަބަބުން ހައްލެއް ލިބޭނެ ކަމަށް ވޭމްކޯއިން މަޢުލޫމާތުދެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދެނީ ރަށްރަށުގެ ސާފުތާހިރުކަން ދަމަހައްޓައި، ޒަމާނީ ވަސީލަތްތަކާއެކު ކުނި މެނޭޖްކުރުމުގެ ޚިދުމަތް ހުރިހާ ރަށަކަށް ފޯރުކޮށްދިނުމަށެވެ. މިގޮތުން، މިހާރުވެސް ގިނަ ރަށްތަކެއްގައި ވޭމްކޯއިން ދަނީ ކާމިޔާބުކަމާއެކު ޚިދުމަތް ދެމުންނެވެ.

މި އުޅަނދުތައް ހަވާލުކުރުމުގެ ސަބަބުން، ރަށްރަށުގެ މަގުތަކާއި ގޯތިގެދޮރުން ކުނި ނެގުމުގެ މަސައްކަތް އަވަސްވެ، ރަށުގެ ތިމާވެށީގެ ހާލަތު ރަނގަޅުވެގެންދާނެ ކަމަށް ބެލެވެއެވެ. ސަރުކާރުގެ އަމާޒަކީ ކުރިއަށް އޮތް ތަނުގައި އިތުރު ރަށްތަކަށް މިފަދަ ވަސީލަތްތައް ފޯރުކޮށްދީ، މުޅި ރާއްޖެއަށް ވޭމްކޯގެ ޚިދުމަތް ފުޅާކުރުމެވެ.

14/08/2026

ޤައުމީ ދުވަހުގެ ދިދަނެގުމުގެ ޚާއްޞަ އިޙްތިފާލުގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގެންފި

މާލެ، ދިވެހިރާއްޖެ - މިއަހަރުގެ ޤައުމީ ދުވަސް ފާހަގަކުރުމުގެ ގޮތުން ބޭއްވި ދިދަނެގުމުގެ ޚާއްޞަ އިޙްތިފާލުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ބައިވެރިވެވަޑައިގެންފިއެވެ.

މިއަދު ހެނދުނު 06:00 ގައި ޖުމްހޫރީ މައިދާނުގައި ބޭއްވުނު މި ރަސްމިއްޔާތަށް ރައީސުލްޖުމްހޫރިއްޔާގެ ދެކަނބަލުން ވަޑައިގަތުމުން އެ ދެކަނބަލުންނަށް މަރުޙަބާ ދެންނެވީ މިނިސްޓަރ އޮފް ދިފާޢީ ހާޝިމް އަޙްމަދާއި، މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އާދަމް ނަޞީރު އިބްރާހީމެވެ.

މި އިޙްތިފާލުގައި ރައީސުލްޖުމްހޫރިއްޔާގެ ދެކަނބަލުންގެ އިތުރުން، ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފާއި، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ގެ އިތުރުން ދައުލަތުގެ ވަޒީރުންނާއި އިސް ވެރިން ބައިވެރިވެވަޑައިގެންނެވިއެވެ.

ޤައުމީ ދުވަހުގެ ދިދަނެގުމުގެ މި ރަސްމިއްޔާތަކީ ކޮންމެ އަހަރަކުވެސް ރާއްޖޭގެ މިނިވަންކަމާއި ސިޔާދަތުގެ ރަމްޒު ކަމުގައިވާ ޤައުމީ ދިދައަށް އިޙްތިރާމް އަދާކުރުމާއި، ޤައުމީ ބަތަލު އައްސުލްޠާން މުޙައްމަދު ތަކުރުފާނުލް އައުޡަމް ކުރެއްވި ޖިހާދުގެ ހަނދާންތައް އާކުރުމުގެ މަޤްޞަދުގައި ބޭއްވޭ ރަސްމިއްޔާތެކެވެ.

މި ރަސްމިއްޔާތުގައި ދިދަ ނެގުމަށްފަހު، އިސްލާމީ މަރުކަޒުގެ އިމާމު ވަނީ ޤައުމީ ދުވަހާ ގުޅޭ ޚާއްޞަ ދުޢާއެއް ކޮށްފައެވެ. މި ދުޢާގައި ޤައުމުގެ މިނިވަންކަމާއި އިސްލާމީ ވަޙްދަތު ދެމެހެއްޓުމަށާއި، ރާއްޖެއަށް އަމާންކަމާއި ފާގަތިކަން މިންވަރުކޮށްދެއްވުން އެދި ދުޢާކޮށްފައިވެއެވެ.

ޤައުމީ ދުވަސް ފާހަގަކުރަނީ ކޮންމެ އަހަރެއްގެ ރަބީޢުލްއައްވަލް މަހުގެ 1 ވަނަ ދުވަހުއެވެ. މިއީ ޕޯޗުގީޒުންގެ އަޅުވެތިކަމުން ދިވެހިރާއްޖެ ސަލާމަތްކުރި ތާރީޚީ ކާމިޔާބީ ފާހަގަކުރުމުގެ ގޮތުން ބާއްވާ ދުވަހެކެވެ.

14/08/2026

ރަސްދޫ ކައުންސިލްގެ ނައިބު ރައީސް އަހުމަދު ވަޖީހު "ރަސްފަރު އޮންލައިން" އަށް މައުލޫމާތު ދެއްވައިފި

ރަސްދޫގެ ތަރައްޤީއާއި ރަށަށް ދިމާވެފައިވާ އެކި މައްސަލަތަކާ ގުޅޭގޮތުން އެ ރަށު ކައުންސިލްގެ ނައިބު ރައީސް އަހުމަދު ވަޖީހު "ރަސްފަރު އޮންލައިން" އަށް މައުލޫމާތު ދެއްވައިފިއެވެ.

މިއަދު ދެއްވި މި ބަސްދީގަތުމުގައި، ނައިބު ރައީސް ވަޖީހު ވަނީ ރަސްދޫގެ ރައްޔިތުންގެ ލާބައާއި މަންފާއަށްޓަކައި ކައުންސިލުން ކުރަމުންދާ މަސައްކަތްތަކުގެ ތަފްސީލު ހިއްސާކުރައްވާފައެވެ. ޚާއްޞަކޮށް ރަށުގެ އިޖުތިމާޢީ އަދި އިޤްތިޞާދީ ދާއިރާއިން ކުރިއަށްދާ މަޝްރޫޢުތަކާ ގުޅޭގޮތުން އޭނާ ވާހަކަދެއްކެވިއެވެ.

މީގެ އިތުރުން، ރަށުގެ ތަރައްޤީއަށްޓަކައި ސަރުކާރާ ގުޅިގެން ކުރެވެމުންދާ މަސައްކަތްތަކުގެ މައްޗަށް އަލިއަޅުވާލައްވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ ތަރައްޤީއަށް ދެއްވާ އަހަންމިއްޔަތުކަން ވަޖީހު ފާހަގަކުރެއްވިއެވެ. އަދި ރަށުގެ ރައްޔިތުންނަށް ދިމާވެފައިވާ ގޮންޖެހުންތައް ހައްލުކުރުމަށް ކައުންސިލުން މެދުނުކެނޑި މަސައްކަތް ކުރަމުންދާނެ ކަމުގެ ޔަގީންކަން ވެސް އޭނާ ދެއްވިއެވެ.

ރަސްދޫ ކައުންސިލުން މަސައްކަތް ކުރަމުންދަނީ ރަށުގެ އެންމެހާ ރައްޔިތުންނަށް ބޭނުންވާ އަސާސީ ޚިދުމަތްތައް ފުރިހަމައަށް ފޯރުކޮށްދީ، ރަށަކީ އަމާން އަދި ތަރައްޤީވެފައިވާ ރަށަކަށް ހެދުމަށް ކަމަށްވެސް ވަޖީހު ވިދާޅުވިއެވެ.

13/08/2026

ގުޅީފަޅުން ބިން ލިބުނު ފަރާތްތަކަށް ބިން ހަވާލުކުރަން ނުގުޅާ ސަބަބު ބަލައިދެއްވާނެކަމަށް ރައީސް ވިދާޅުވެއްޖެ

ގުޅީފަޅުން ގޯތި ލިބުނު ފަރާތްތަކުގެ ތެރެއިން ބައެއް ފަރާތްތަކަށް ބިން ހަވާލުކުރުމުގެ ކަންކަމުގައި ގުޅަންޖެހޭ ފަރާތްތަކުން ނުގުޅާ އޮތް މައްސަލަ ބައްލަވައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.

ރައީސް މިހެން ވިދާޅުވީ، އާންމުންގެ ސުވާލުތަކަށް ސީދާ ރައީސުލްޖުމްހޫރިއްޔާ ޖަވާބުދެއްވުމަށް ކުރިއަށްގެންދާ "ރައީސްގެ ޖަވާބު" ސިލްސިލާގެ ތެރެއިން، އާންމު ރައްޔިތަކު ކުރި ސުވާލަކަށް ޖަވާބު ދެއްވަމުންނެވެ.

ގުޅީފަޅުން ގޯތި ލިބިފައިވާ ފަރާތްތަކުގެ ތެރެއިން ބައެއް މީހުންނަށް ބިން ހަވާލުކުރުމުގެ އެއްބަސްވުމުގައި ސޮއިކުރުމަށާއި، ބިން ދެއްކުމަށް ހައުސިންގް މިނިސްޓްރީން ނުގުޅާތީ އެކަމުގެ ޝަކުވާ ގިނަ ބަޔަކު ދަނީ ކުރަމުންނެވެ. މިކަމާ ގުޅޭގޮތުން ރައީސް ވިދާޅުވީ، ސަރުކާރުގެ ސިޔާސަތަކީ ގޯތި ލިބިފައިވާ ހުރިހާ ފަރާތްތަކަށް ވީ އެންމެ އަވަހަކަށް ބިން ހަވާލުކުރުން ކަމަށެވެ. އަދި ބައެއް ފަރާތްތަކަށް ނުގުޅާ އޮތީ ކީއްވެގެންތޯ ބައްލަވައި، އެކަން އަވަސްކޮށްދެއްވާނެ ކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ، ގުޅީފަޅުގެ ބިން ހިއްކުމުގެ މަޝްރޫއު ބާރަށް ކުރިއަށްދާ ކަމަށާއި، ބިން ހިއްކާ ނިމުނު ވަރަކުން އެ ސަރަހައްދުތަކުން ގޯތި ކަނޑައި، ލިޔެކިޔުންތައް ހަވާލުކުރުމުގެ މަސައްކަތް ހުއްޓުމެއް ނެތި ކުރިއަށްދާނެ ކަމަށެވެ. މީގެ އިތުރުން، ކުރީ ސަރުކާރުން ދޫކޮށްފައިވާ ގޯތިތަކާއި ފްލެޓްތައް އޭގެ ހައްގުވެރިންނަށް ދިނުމަކީ މި ސަރުކާރުގެ މުހިންމު ވައުދެއްކަންވެސް ރައީސް ފާހަގަކުރެއްވިއެވެ.

މި ސަރުކާރުން އަންނަނީ މާލެ ސަރަހައްދުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށްޓަކައި ގުޅީފަޅާއި، ގިރާވަރުފަޅު އަދި ހުޅުމާލެ ފޭސް 3 ތަރައްގީކުރުމުގެ މަސައްކަތް ބާރުސްޕީޑުގައި ކުރަމުންނެވެ.

12/08/2026

ރާއްޖޭގެ އެކި ރަށްރަށުގައި "ޖަންނަތު" އަށް ބޮޑު ތަރުހީބެއް؛ ޝޯތައް ސެޕްޓެމްބަރު 3 އާ ހަމައަށް ކުރިއަށް

ޑާކް ރެއިން އެންޓަޓައިންމަންޓުން އުފައްދާފައިވާ ކާމިޔާބު ފިލްމު "ޖަންނަތު" ރާއްޖޭގެ އެކި ކަންކޮޅުތަކުގައި ދައްކަމުންދާއިރު، ފިލްމަށް ލިބެމުންދާ ތަރުހީބު އިތުރުވެ ޝޯތައް ކުރިއަށް އޮތް ސެޕްޓެމްބަރު މަހާ ހަމައަށް ތާވަލުކޮށްފިއެވެ.

މި މަހުގެ 6 ވަނަ ދުވަހުން ފެށިގެން ރާއްޖޭގެ އެކި ރަށްރަށުގައި މި ފިލްމުގެ ޝޯތައް ދައްކަން ފަށާފައިވާއިރު، ނިމިދިޔަ ހަފްތާ ބަންދުގައިވެސް ގިނަ އަދަދެއްގެ ރަށްރަށުގައި ވަނީ ކާމިޔާބުކަމާއެކު ޝޯތައް ކުރިއަށް ގެންގޮސްފައެވެ. އައިލެންޑް ސިނަމާ (Island Cinema) މެދުވެރިކޮށް އަތޮޅުތަކުގެ ރަށްރަށަށް ފިލްމު ގެންގޮސްދެމުންދާއިރު، ބެލުންތެރިންގެ ފަރާތުން ފިލްމަށް އަންނަނީ ވަރަށް ބޮޑު ތަރުހީބެއް ލިބެމުންނެވެ.

ފިލްމު އަޅުވާފައިވާ ރަށްރަށުގެ ތަރުހީބަށް ބަލައި، ކުރިއަށް އޮތް ހަފްތާ ބަންދުގެ އިތުރުން ސެޕްޓެމްބަރު މަހުގެ 3 ވަނަ ދުވަހާ ހަމައަށް ގިނަ ރަށްތަކެއްގައި ޝޯތައް ބޭއްވުމަށް މިހާރު ވަނީ ތާރީޚްތައް ފައިނަލްކޮށްފައެވެ. މިގޮތުން ޝޯތައް ބޭއްވުމަށް ހަމަޖެހިފައިވާ ރަށްރަށުގެ ޓިކެޓްތައް މިހާރު ވަނީ ވިއްކަން ފަށާފައެވެ.

"ޖަންނަތު" އަކީ ޢާއިލީ ގުޅުންތަކާއި ލޯބީގެ މައްޗަށް ބިނާކޮށް އުފައްދާފައިވާ އަސަރުގަދަ ފިލްމެކެވެ. ރާއްޖޭގެ ސަގާފަތާއި އާދަކާދަތަކާ ގުޅޭގޮތަށް ތައްޔާރުކޮށްފައިވާ މި ފިލްމު ރަށްރަށުގައި ދެއްކުމުގެ މައިގަނޑު މަޤްޞަދަކީ، މާލެއާ ދުރުގައި ދިރިއުޅޭ ރައްޔިތުންނަށްވެސް ފެންވަރު ރަނގަޅު ދިވެހި އުފެއްދުންތައް ބަލާލުމުގެ ފުރުޞަތު ފަހިކޮށްދިނުމެވެ.

ޑާކް ރެއިން އެންޓަޓައިންމަންޓުން މަޢުލޫމާތު ދޭ ގޮތުގައި، ގިނަ ރަށްރަށަކުން މި ފިލްމު ބަލަން ބޭނުންވެގެން ރިކުއެސްޓްތައް ލިބެމުންދާ ކަމަށާއި، ވީހާވެސް ގިނަ ރަށްރަށެއްގައި ފިލްމު ދެއްކުމަށް މަސައްކަތް ކުރަމުންދާ ކަމަށެވެ

12/08/2026

ޒުވާނުންގެ ދުވަހުގެ ޚާއްޞަ ސެޝަންތަކަށް ޕްރޮވިޝަނަލް ސައިކޮލޮޖިސްޓް ފާޠިމަތު ޝައިފާ ރަސްދުއަށް ވަޑައިގެންފި

މިއަހަރުގެ ޒުވާނުންގެ ދުވަހުގެ މުނާސަބަތުގައި ރަސްދޫގައި ކުރިއަށް ގެންދިއުމަށް ރޭވިފައިވާ ހޭލުންތެރިކުރުމުގެ ޚާއްޞަ ސެޝަންތައް ނަގައިދެއްވުމަށް، ޕްރޮވިޝަނަލް ސައިކޮލޮޖިސްޓް ފާޠިމަތު ޝައިފާ މިއަދު އެރަށަށް ވަޑައިގެންފިއެވެ.

މި ދަތުރުފުޅާ ގުޅޭގޮތުން "ރަސްފަރު އޮންލައިން" އަށް މައުލޫމާތު ދެއްވަމުން ރަސްދޫގެ އ.ތ.މ ކޮމެޓީގެ މެންބަރ އައިމިނަތު އަނޫސާ ވިދާޅުވީ، ޒުވާނުންގެ ދުވަހުގެ މުނާސަބަތުގައި ކުރިއަށް ގެންދިއުމަށް ޝެޑިއުލް ކުރެވިފައިވާ އެވެއަރނެސް ސެޝަން ކުރިއަށް ގެންގޮސްދެއްވުމަށް ވަޑައިގެން ޕްރޮވިޝަނަލް ސައިކޮލޮޖިސްޓް ފާޠިމަތު ޝައިފާއަށް ރަސްދޫގެ ފަރާތުން ވަރަށް ހޫނު މަރުހަބާއެއް ދަންނަވާ ކަމަށެވެ.

އަނޫސާ އިތުރަށް ފާހަގަކުރެއްވި ގޮތުގައި، މި ސެޝަންތަކަކީ ރަށުގެ ޒުވާނުންގެ ނަފްސާނީ ދުޅަހެޔޮކަމަށް އަމާޒުކޮށްގެން، އެކި ކަހަލަ އިޖުތިމާއީ ގޮންޖެހުންތަކުން އަރައިގަތުމަށް ބޭނުންވާ މައުލޫމާތު ފޯރުކޮށްދިނުމަށް ބާއްވާ ވަރަށް މުހިންމު ހަރަކާތެކެވެ. ރަސްދޫ ކައުންސިލްގެ ފަރާތުން އިންތިޒާމުކުރާ މި ސެޝަންތަކުގައި ޝައިފާގެ ތަޖުރިބާގެ އަލީގައި ޒުވާނުންނަށް ބޭނުންތެރި އިރުޝާދުތަކެއް ލިބިގެންދާނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވިއެވެ.

މި ދަތުރުފުޅަކީ ރަސްދޫ ކައުންސިލުން އިސްނަގައިގެން، ރަށުގެ ޒުވާނުންނަކީ ހޭލުންތެރި ބަޔަކަށް ހެދުމަށް ކުރަމުންދާ މަސައްކަތްތަކުގެ ތެރެއިން ކުރިއަށްދާ ކަމެކެވެ.

Rasfaru Online

26/08/2026

17/08/2026

15/08/2026

14/08/2026

14/08/2026

14/08/2026

14/08/2026

13/08/2026

12/08/2026

12/08/2026

Address

Website

Alerts

Shortcuts

Share

Category

Listing takedown request