03/04/2026
Kelimpah ari kitai Iban tok landik betenun, kitai Iban mega landik beranyam. Nyadi keresa anyam kitai Iban tok amat beguna dikena pengawa kitai seari-ari maya ke agi diau di rumah panjai kelia. Nyadi penerang ba kebaruh tu bekaul enggau keresa anyam ti dikembuan kitai Iban.
1. LANJI dikarang Petrus Eddy
Lanji tu pan sama mega digaga ari rutan. Selalu iya lanji tu tadi suah agi alai org nyimpan kerang padi (kerang padi tu,Padi ti agi enggau tangkai) tau ke kena mai buah lada.
2. SELABIT dikarang Deckers Tony
Bisi sebengkah menua nyebut keresa anyam tok Selabit, bisi sebengkah menua nyebut Seladan. Nyadi Selabit/Seladan. Selabit tu siti keresa ti chukup besai guna ba pengawa rumah panjai. Selabit tu diguna kena ngangkut utai ti berat ngambika chunto padi, jelu sereta utai ke bukai baka buah. Dulu kelia selabit tu sigi diguna bala ke laki Ngasu. Selabit tu digaga ari wi bertungkat ka danan tauka kayu ti kering tebelian.
3. SINTUNG dikarang Wellingson Kuling
Ba penemu aku enggau penemu ti dikunsi bala pengajar enggau aku, Sintung tok bisi dua bagi, Sintung dikena pengawa seari-ari enggau Sintung Berias ti dikena maya pengawa pengerami. Nyadi Sintung tok mega keresa ti dianyam kitai Iban. Enti suba, Sintung tok dikena kitai Iban maya pengawa betambak enggau pengawa ngetau. Maya padi nya diketau, diak meh padi nya tadi disimpan ba Sintung. Bisi sekeda besandik ke Sintung maya ngetau, bisi mega betanchang ke Sintung ba punggung nitih ke penyamai diri.
4. UYUT/RAGA dikarang Ara Bella
Dikena kitai iban maik perengka enti nurun ke kebun tauka nurun ke tanah. Ambika chunto baka bekal duku tauka keresa ti deka dikena betanam betupi. Uyut tu digaga ari Wi mit, tauka bisi digaga ari Bemban Batu alu berbingkaika Wi ti mit.
