Haske daga Alƙur’ani da Sunnah

19/07/2026

SHIN KO KUN SAN DALILIN DA YA SA ƊUMAMAR YANAYI (GLOBAL WARMING) KE DA HAƊARI?

Shin kun san cewa kusan kashi saba'in da ɗaya cikin ɗari (71%) na doron Duniya ruwa ne, yayin da kashi ashirin da tara cikin ɗari (29%) kawai ne ƙasa?

A cikin hikimar Allah, wani ɓangare na wannan ruwa ya daskare ya zama manyan duwatsun ƙanƙara (Polar Ice Caps) a ɓangarorin Arewa da Kudu na Duniya.

Ɗumamar yanayi (Global Warming) na nufin ƙaruwan matsakaicin zafin Duniya na tsawon lokaci. Wannan ƙarin zafin yana sa wasu sassan waɗannan manyan ƙanƙara su fara narkewa.

Yayin da ƙanƙarar ke narkewa, ruwan da ke shiga tekuna yana ƙaruwa, wanda ke sa ruwan teku ya ƙaru/tashi (Rise in Sea Level). Hakan na iya haddasa ambaliya (Flood) a wasu yankuna dake kusa da teku, tare da lalata gidaje, gonaki, da sauran abubuwan more rayuwa.

Bugu da ƙari, ɗumamar yanayi na haifar da sauyin yanayi (Climate Change), wanda zai iya jawo tsananin zafi (Heat Waves), tsananin sanyi (extreme cold), sauyin yanayin ruwan sama (Changes in Rainfall Patterns), fari (Drought) da ambaliyar ruwa (Flood), waɗanda ake kira (Extreme Weather Conditions).

Kare muhalli, rage gurɓata iska, da amfani da albarkatun ƙasa cikin hikima na daga cikin matakan da za su taimaka wajen rage tasirin ɗumamar yanayi da kare Duniyarmu.

Kimiyya tana taimaka mana mu fahimci yadda Duniyarmu ke aiki, domin mu kare ta daga irin waɗannan haɗurra.

05/07/2026

Wannan shafi yana da matuƙar amfani ga ɗaliban kimiyya (science). Domin akwai fa'idodi masu waya a tattare da shi.

MENENE ELECTROLYSIS?
(Kashi na ɗaya)

Electrolysis hanya ce ta amfani da lantarki (Direct Current - DC) domin raba wani sinadari zuwa sassa ko sinadarai da s**a haɗa shi.

Wannan canji na sinadari (chemical change) ba ya faruwa da kansa, sai an samar masa da wutar lantarki.

A ina Electrolysis ke faruwa?

Electrolysis yana faruwa ne a cikin wani na'ura da aka tsara na musamman mai suna Electrolytic Cell.

A cikin wannan Electrolytic Cell ne ake zuba narkakken sinadari (molten electrolyte) ko ruwan da aka narkar da sinadari a ciki (aqueous electrolyte) domin a gudanar da electrolysis.

Electrolytic Cell ya ƙunshi abubuwa kamar haka:

- Electrolyte - Sinadarin da za a raba ta amfani da lantarki.

- Anode - Turaku mai cajin lantarki na ƙari (+).

- Cathode - Turaku mai cajin lantarki na ragi (-).

- Source of Direct Current (DC) - Wutar lantarki ta DC.

- Connecting Wires - Wayoyin haɗa lantarki.

A post na gaba za mu yi bayanin kowane ɗaya daga cikin waɗannan, domin fahimtar yanda Electrolysis ke gudana cikin sauƙi.

Ku ci gaba da kasancewa tare da Shafin Kimiyya a Harshen Hausa.

04/07/2026

Ko ka taɓa mamakin dalilin da ya sa ake kiran iskar Nitrous Oxide (N₂O) da suna "Iskar Dariya" (Laughing Gas)"? Ko kuma yaya take aiki a jikin ɗan Adam?

An samo wannan suna ne saboda yadda mutane da yawa kan ji bayan sun shaƙi iskar. Cikin ɗan lokaci kaɗan, tana iya sa mutum ya ji annashuwa, ya sami natsuwa, kuma fargabarsa ta ragu. Saboda haka, wasu kan fara murmushi, dariya har da ma ƙyaƙyatawa ba tare da sun shirya ba.

Yaya take aiki a jikin ɗan Adam?

Da zarar mutum ya shaƙi iskar Nitrous Oxide, tana shiga cikin huhu, daga nan ta shiga cikin jini, sannan ta isa ƙwaƙwalwa cikin sauri. A can ne take yin tasirinta ta hanyoyi daban-daban.

1. Tana ƙara jin daɗi da annashuwa

Iskar tana taimakawa wajen ƙara tasirin wasu sinadarai a ƙwaƙwalwa, kamar dopamine da endorphins. Waɗannan sinadarai suna da alaƙa da jin daɗi, farin ciki, da kuma rage jin zafi na ɗan lokaci.

2. Tana rage fargaba da sanya natsuwa

Nitrous Oxide tana rage yawan saƙonnin da wasu jijiyoyin kwakwalwa ke aikawa. Hakan yana sa mutum ya ji natsuwa, ya daina jin tsoro sosai, kuma ya kasance cikin yanayi na annashuwa.

3. Tana rage jin zafi

Iskar tana rage yadda ƙwaƙwalwa ke karɓa da fassara saƙonnin ciwo da ke fitowa daga jiki. Wannan ne ya sa likitocin haƙora da wasu ma'aikatan lafiya suke amfani da ita wajen rage jin zafi da tsoro yayin wasu ƙananan ayyukan jinya.

Dukkan waɗannan tasirin suna farawa cikin sauri bayan an shaƙi iskar. Haka kuma, suna gushewa cikin ɗan lokaci bayan an daina shaƙarta, musamman idan mutum ya ci gaba da shaƙar iskar oxygen ta al'ada.

Saboda haka, duk da cewa ana kiranta "Iskar Dariya", ba wai tana sa kowa dariya ba ne. Tasirinta na iya bambanta daga mutum zuwa mutum, kuma ya kamata a yi amfani da ita ne kawai ƙarƙashin kulawar ƙwararrun ma'aikatan lafiya.

Shin kun taɓa shaƙar iskar Nitrous oxide?

11/01/2026

Allah yasa mu gane gaskiya.

゚