20/06/2026
Gwamnatin Jihar Bauchi Ta Yaye Sama da Jami’an Tsaron Sai-Kai da Kare Daji 2,000,
Makarantar Horar da ‘Yan Sanda ta Bauchi ta karɓi waɗannan matasa lafiyayyu da aka zabo daga ƙananan hukumomi ashirin na Jihar Bauchi, inda aka yaye su tare da ɗaukar su aiki a Hukumar Tsaron Sai-Kai da Kare Daji ta Jihar Bauchi bayan sun kammala horo mai tsanani na tsawon makonni biyu.
Gwamna Bala Mohammed ya samu wakilcin Mataimakinsa, Alhaji Mohammed Auwal Jatau, a wajen bikin, inda ya kasance jami’in da ya karɓi faretin waɗanda aka yaye. Ya bayyana cewa a matsayinsu na ma’aikatan Gwamnatin Jihar Bauchi, za su gudanar da ayyuka biyu masu muhimmanci: kare manyan dazuzzuka da gonakin noma na jihar tare da taimakawa wajen samar da tsaro ga al’umma.
Gwamna Bala Mohammed ya umarce su da su gudanar da ayyukansu bisa tanadin doka, sannan ya yi kira ga hukumomin tsaro na gargajiya da su haɗa kai da gwamnatin jihar domin tabbatar da zaman lafiya mai ɗorewa da kwanciyar hankali.
Kwamishinan ‘Yan Sanda na Jihar, CP Sani Aliyu Omolorin, wanda Mataimakin Kwamishinan ‘Yan Sanda, DCP Musa Bulus ya wakilta, tare da Kwamandan Makarantar Horar da ‘Yan Sanda ta Bauchi, ACP Abdullahi Umar, sun yaba wa Gwamna Bala Mohammed kan wannan ƙoƙari. Sun bayyana cewa sama da masu gadin dazuzzuka dubu biyu sun samu horon tsaro da ya dace wanda zai ba su damar yin aiki tare da hukumomin tsaro wajen cimma nasarori.
Babban Mai Ba Gwamna Bala Mohammed Shawara Kan Harkokin Tsaro, DIG Sani Mohammed (mai ritaya), a nasa jawabin ya sanar da mahalarta taron cewa sama da jami’an Tsaron Sai-Kai da Kare Daji dubu biyu da gwamnatin jihar ta ɗauka aiki za su taimaka matuƙa wajen ƙarfafa ƙoƙarin Gwamnatin Tarayya na magance matsalolin tsaro da ƙasar ke fuskanta. Haka kuma ya yaba wa Gwamna Bala Mohammed bisa goyon baya da kulawar da yake bai wa harkokin tsaro.
