11/05/2026
SHAWARA ZUWA GA DUK WANI USTAZI
Da zarar ka tsinci kanka a harkar koyarwa, to ka saka ranka harkar Nan tadan wani lokaci zakiyita Komai gaskiya Aiki ne mai wahala, kuma mai buƙatar haƙuri. Saboda haka tun daga farko ka gyara niyyarka tsakaninka da Allah, ka haɗa aikinka da addu’ar Allah ya karɓa maka. Amma akwai wasu abubuwa da idan ka kula da su, za su taimaka maka sosai a rayuwar malunta.
1. Ka kare mutuncinka a ko da yaushe.
Mutuncin ustazi shi ne babban jarinsa. Da zarar ya zube, komai zai iya lalacewa. Ka yi taka-tsan-tsan a suturarka, hukuncinka, yadda kake zama da tashi, yadda kake magana da ɗalibai, da yadda kake mu’amala da iyaye. Ka rufe kowace ƙofa da za a samu hujja a kanka. Domin wasu iyayen yara ba neman gyara s**a zo ba, suna jiran ƙaramar kafa su samu su ci mutuncin malami. Wasu ma islamiyyar ba damuwarsu ba ce, kawai dai sun haifi yara ne. Saboda irin waɗannan mutane, ka ƙara haƙuri da kamewa.
2. Kada ka ɗora rai a taimakon iyayen ɗalibai. Wani lokacin zuciyar ustazi kan raya masa cewa “wannan ɗalibin ubansa mai kuɗi ne”, ko “wannan iyayen za su taimaka min”. Amma mafi yawan lokaci abin ba haka yake ba. Da ace iyayen ɗalibai suna bai wa malamai abin da ya dace, da yanzu tsofaffin malamai su ne s**a fi kowa walwala. Saboda haka ka yi aikinka saboda Allah, ka jira sakamako daga gare Shi, ba daga hannun mutane ba.
3. Kada ka yi tsananin saka ɗalibi a rai.
Kar ka nuna wa wani ɗalibi soyayya ko kulawa fiye da kima har ka fara jin kamar babu shi makaranta ba za ta tafi ba. Ka so su gaba ɗaya, amma ka san iyaka. Domin yaron da kake taƙama da shi yau, wata matsala kaɗan za ta sa a canja masa makaranta gobe. Wani lokaci ma iyaye kan sauya makaranta saboda ƙaramin hukunci ko rashin jituwa. Saboda haka ka maida hankali wajen yi wa kowa adalci.
4. Ka zama wayayye da sanin matsayinka. Kar ka yaudari kanka saboda kana koyarwa ka ji kamar ka fi kowa sani ko daraja. Ka yi iya abin da za ka iya cikin nutsuwa. Haka kuma ka kula da yawan sakewa da ɗalibai.
