06/07/2026
05/7/26 IZALA
An shawarci al'ummar Musulmi su yi aiki da koyarwar Alkur'ani Mai girma da Hadisan manzon tsira SAW wajen gudanar da ibada da Kuma rayuwar su ta yau da kullum.
Sheikh Sabo Musa Hassan ne yayi wannan bukatar a lokacin da yake gabatar da nasiha Mai Taken riko da Sunnah Bidi'a Sam ga daruruwan musulmi a masallacin Sunnah na garin Kila a yankin K/H Gwaram.
Sheikh Sabo Musa Hassan Katsina Wanda Kuma shi ne Mai bawa Gwamnan Jihar Katsina shawara kan al'amuran addini, ya ce aiki da koyarwar Alkur'ani mai girma da Hadisan manzon tsira, ita ce hanyar samun rahama ga kowane musulmi a duniya.
Malamin Wanda ya dauki lokaci Mai tsawo ya na karanto ayoyin Alkur'ani Mai girma da Hadisai, ya hori al'ummar musulmi su guji Sanya bidi,'oi cikin addini domin gudun gamuwa da fushin Allah a ranar lahira.
Sheikh Sabo Musa Hassan Katsina Wanda har wayau shi ne Sakataren kungiyar IZALA na Jihar, ya bukaci musulmi, musamman Matasa su tashi tsaye wajen neman ilimin addini domin kaucewa fadawa cikin bidi'oi da sunan addini.
Tun farko sai da babban Limamin masallacin Sunnah na Gwaram-Sabuwa, Ustaz Adamu Isah ya gabatar da malamin tare da wadanda suke rufa masa baya.
