13/05/2026
DA DUMI-DUMI ll Nijeriya za ta ƙaddamar da sabon tsarin watsa shirye-shiryen talbijin daga analog zuwa dijital a Yuni - Idris
Ministan Yaɗa Labarai da Wayar da Kai, Alhaji Mohammed Idris, ya bayyana cewa shirin nan da aka daɗe ana jira na sauya tsarin watsa shirye-shiryen talbijin daga analog zuwa dijital (wato Digital Switch Over, DSO) a Nijeriya, an kammala shi tsaf, sai ƙaddamarwa a watan gobe.
Ministan ya bayyana haka ne lokacin da ya kai ziyarar musamman a cibiyoyin aiki na NIGCOMSAT da ke Cibiyar Sararin Samaniya ta Obasanjo a Abuja ranar Laraba.
Da yake bayyana wannan cigaban a matsayin wani muhimmin sauyi a fannin watsa shirye-shirye a Nijeriya, Ministan ya bayyana lamarin da wani babban cigaba a ajandar gyaran da Shugaba Bola Ahmed Tinubu yake yi a fannin yaɗa labarai.
Ya ce: “Ina ganin wannan wata sabuwar alfijir ce ga ƙasar mu. Alƙawarin da Shugaba Tinubu ya yi na gyaran dukkan fannoni yanzu ana ganin yadda ake aiwatar da shi a masana’antar watsa shirye-shiryen talbijin.”
Ya ƙara da cewa bayan shekaru masu yawa ana jinkiri, yanzu Nijeriya ta shirya kammala sauya tsarin daga analog zuwa dijital, yana mai cewa za a ƙaddamar da tsarin na DSO ne a ranar 17 ga Yuni, 2026.
Da yake bayani kan alfanun sabon tsarin, Ministan ya ce: “Wannan zai kawo fa’idoji masu yawa ga gidajen watsa shirye-shirye, masu kallo, da masu talla. Idan ana kallon wata tasha ta musamman, za a san su wanene ke kallo, abin da suke kallo, da kuma yawan masu kallon.”
A cewar sa, sabon tsarin zai samar da ingantattun bayanai da nazarin masu kallo, wanda zai taimaka wa masu talla da gidajen watsa shirye-shirye wajen yanke shawara mai kyau kan shirye-shirye da zuba jari, tare da inganta isar da abubuwan kallo ga ’yan Nijeriya.
Idris ya jaddada tasirin wannan shiri ga tattalin arziki da fasaha, yana mai cewa tsarin zai ƙara haifar da gasa a masana’antar watsa shirye-shirye, ya faɗaɗa damar kallon talbijin kyauta, tare da ɗaga ingancin kallo a Nijeriya da yankin Afrika mai hamadar Sahara.
Ya ce: "An karya tsarin mamayar kamfani guda a fagen. Kowa zai shiga gasa. Abubuwan kallo za su ƙaru, masu kallo za su ƙaru, kuma Nijeriya yanzu tana komawa daga SD zuwa HD wajen watsa shirye-shirye.”
Ya ƙara da cewa yanzu ’yan Nijeriya za su more ingantaccen siginar talbijin ta satalayit, wato tauraron ɗan'adam, da kuma manhajojin wayar hannu da fasahar NIGCOMSAT take samarwa.
A nasa jawabin a yayin ziyarar, Darakta-Janar na Hukumar Kula da Watsa Shirye-shiryen Rediyo da Talbijin ta Ƙasa (NBC), Mista Charles Ebuebu, ya ce an yi sabon tsarin DSO ne domin ya dace da sababbin fasahohi da yadda mutane suke kallon shirye-shirye a wannan zamani.
Ya bayyana cewa sabon tsarin yana amfani da watsa shirye-shiryen satalayit da manhajojin wayar hannu domin tabbatar da cewa jama’a a ko’ina za su iya samun damar amfani da shi, ba kamar tsohon gwajin DSO da ya tsaya a wasu birane kaɗai ba.
Ya ce: “Za mu fara da tashoshi 100 a ranar ƙaddamarwa, ko ma fiye da haka, domin masu samar da abubuwan kallo da dama suna tattaunawa da mu. Muna son samar da kasuwa guda da dandali guda ga Nijeriya.”
Ya bayyana cewa an kafa cibiyoyin samar da shirye-shirye na yankuna daban-daban da cibiyoyin tallafin kwastomomi masu harsuna daban-daban a faɗin ƙasar nan.
Ita ma da take jawabi yayin ziyarar, Manajar Darakta kuma Shugabar NIGCOMSAT, Jane Egerton-Idehen, ta bayyana haɗin gwiwar NIGCOMSAT da NBC a matsayin dabarar haɗin kai mai ƙarfi da ta inganta ayyuka da ɗaga ƙa’idojin aiki a fannin watsa shirye-shiryen dijital a Nijeriya.
A cewar ta, zuba jari da ake ci gaba da yi da kuma shirye-shiryen faɗaɗa ayyukan satalayit a ƙarƙashin wannan gwamnati za su tabbatar da ingantaccen cigaba da bayar da gamsasshen sabis.
Ta ce, “Aikin fa yanzu ne kawai ya fara. Aikin fa yanzu ne kawai ya soma."
Daga cikin waɗanda s**a raka Ministan a ziyarar akwai Darakta Janar na Hukumar Talbijin ta Nijeriya (NTA), Salihu Abdullahi Dembos; Darakta Janar na Muryar Nijeriya (VON), Jibrin Baba Ndace; Darakta Janar na Gidan Rediyon Tarayyar Nijeriya (FRCN), Mohammed Bulama, da Darakta Janar na Hukumar Wayar da Kai (NOA), Lanre Issa-Onilu, tare da sauran manyan jami’an gwamnati da manyan baƙi.
