09/02/2026
Yadda matasan APC su ka yi wa Jobe ihu a taron raba tallafi na dan gidan Ganduje a Kano
Ana zargin matasan jam'iyyar APC da yi wa dan majalisar tarayya mai wakiltar Dawakin-Tofa, Tofa da Rimin Gado, Engr. Abdulkadir Jobe ihu a jihar Kano.
DAILY NIGERIAN HAUSA ta tattaro cewa an yi wa Jobe ihun ne a yayin da ya ke jawabi a taron raba tallafi da Abba Ganduje ya shirya a jihar Kano, a jiya Lahadi.
Wata majiya da ke wajen lokacin da lamarin ya faru ta shaidawa DAILY NIGERIAN HAUSA cewa magoya bayan APC ne s**a yi ihun, yayin da wakilin Jobe, wanda shi ne daraktan yaƙin neman zaɓen sa ke jawabi a madadinsa a taron.
Majiyar ta kara da cewa tun daga lokacin da mai gabatar da taro ya ambaci sunan Jobe, aka rude da ihun "Ba ma yi", "Ba ma yi !!!", duk da cewa ba dan majalisar ba ne da kan sa, wakilin sa ne.
Ko da wakilin na Jobe ya fara jawabi, sai matasan s**a ci gaba da ihun "Ba ma yi".
Majiyar ta kara da cewa a jawabin da wakilin Joben, wanda ya ce zai yi ne a madadinsa, ya sake jaddada neman afuwar al'ummar Dawakin Tofa, Tofa da Rimin Gado idan ya saba musu, amma duk da haka bai sha ba, inda matasan s**a rude da "Ba mu yafe ba", "Ba mu yafe ba !!!".
Wakilin ya kuma jaddada godiyar Jobe ga Allah ya ce ya kafa tarihin zama dan majalisar tarayya da ya yi hawa biyar a yankin.
DAILY NIGERIAN HAUSA ta rawaito cewa daga karshe dai, bayan an taushi matasan, sai su ka sun yi shiru har wakilin na Jobe ya kammala jawabin na sa.
Za a iya kwasar ƴan kallo a takarar kujerar majalisar wakilai ta Dawakin-Tofa, Tofa da Rimingado duba da cewa Jobe, wanda shi ne mai ci, da Sanusi Bature Dawakin-Tofa da Abba Ganduje duk suna harin kujerar a zaben 2027.
A yanzu dai za a iya cewa ba a san maci tuwo ba sai miya ta kare.
Duk wani yunƙuri na tuntubar Hon. Jobe abin ya ci tura domin ba a same shi a wayar tarho da wakilinu ta rika kira har zuwa lokacin wallafa wannan labari ba.
Ult Media.
