05/05/2026
ZINA TA YI ARHA, AURE YA YI TSADA.
Yau idan kana da N500,000 a aljihunka, da wuya wannan kuɗin su ishe ka ka yi aure saboda tsadar al'ada, kayan lefe, da shirye-shiryen biki da muka kakaba wa kanmu. Amma abin takaici da tashin hankali; da N50,000, N10,000, ko ma kalaman daɗin baki kawai, zaka iya kai yarinyar mutane ɗakin hotel domin ka biya buƙatar haram. Subhanallah...
Mun wayi gari a cikin wata al'umma da muka tsananta abin da Allah Ya sauƙaƙa (Aure), sannan muka sauƙaƙa abin da Allah Ya haramta (Zina).
Wannan gaskiya ce mai ɗaci wacce dole ne mu fuskance ta ta fuska uku:
1. Zuwa Ga Iyaye:
Don Allah a duba tsarin da ake ɗora wa matasa masu neman aure. Yawan buƙatun maƙudan kuɗaɗe da gasar biki sune suke tsoratar da samari masu kishi da natsuwa. Wannan matsin lissafin shine yake sa yara mata su daɗe a gida har shaiɗan ya samu damar jefa su a halaka. Sauƙaƙa aure shine babbar garkuwar al'umma daga rushewa.
2. Zuwa Ga 'Yan Mata:
'Yar uwa, ki san darajar kanki, Jikinki da mutuncinki sun fi ƙarfin N50k, shawarma, ko sayen sabuwar wayar hannu. Kada ki yarda wani ɓataccen namiji ya sayi lahirarki da ɗan abin duniya da zai ƙare a rana ɗaya. Duk namijin da ba zai iya zuwa wajen iyayenki ya neme ki da aure ba, baya ƙaunarki, yaudararki kawai zai yi ya watsar.
3. Zuwa Ga Samari:
Dan'uwa, ka ji tsoron Allah, Kuɗin da kake ɓatarwa wajen kai matan mutane hotel, idan ka tara su wallahi zasu iya yi maka aure na halas ka samu natsuwa a rayuwarka. Ka tuna cewa duk abin da ka yi wa 'yar wani, akwai wanda shima yake jiran 'yarka ko ƙanwarka a gaba.
Dole ne mu farka daga wannan baccin, mu koma kan tsarin addininmu kafin musiba ta gama mamaye mu gaba ɗaya.
Allah Ya sauƙaƙa mana al'amuran aure, Ya raba mu da kowace irin hanyar alfasha.
