10/09/2026
An Hallaka Dan Shagamu, Mai Sharhin Kafafen Sada Zumunta a Kano
Wani mashahurin mai sharhi kan al’amuran siyasa da zamantakewa a kafafen sada zumunta, Ibrahim Khalil Dan Shagamu, mai shekaru 54, ya rasa ransa bayan wasu mutane da ba a tantance ko su wanene ba sun kutsa gidansa tare da hallaka shi a yankin Gaida, Ƙaramar Hukumar Kumbotso a Kano.
An gano gawarsa a cikin gidan da sanyin safiyar Laraba, inda iyalansa s**a ce an kai masa hari ne bayan wasu mutane sun shiga gidansa.
’Yar’uwarsa, Aisha Muhammad Lawal, ta shaida wa Daily Trust cewa an kira ɗanta da misalin ƙarfe 12:30 na dare aka sanar da shi cewa an kai wa Dan Shagamu hari. Ta ce ’yan sanda sun isa wurin kafin a kai shi asibiti, inda daga bisani aka miƙa gawarsa ga iyalansa da misalin ƙarfe 2:30 na dare.
Ta ce iyalan ba sa zargin wani mutum kai tsaye, amma suna kira ga hukumomi da su gudanar da bincike tare da tabbatar da cewa an yi adalci.
Dan Shagamu, wanda ke gudanar da harkokinsa ƙarƙashin suna Dan Shagamu International, ya shahara wajen wallafa bidiyo da yin sharhi kan siyasa, addini da al’amuran al’umma.
Kafin rasuwarsa, ya taɓa wallafa wani bidiyo yana neman taimakon Gwamnan Kano, Sarkin Kano da ’yan sanda, inda ya yi zargin cewa yana fuskantar barazanar kisa daga wasu makwabtansa. Ya kuma ce yaran wasu makwabta suna jifan gidansa da duwatsu tare da yi masa barazana.
Gwamnan Kano, Abba Kabir Yusuf, ya yi Allah-wadai da kisan, inda Kakakinsa na Yaɗa Labarai, Mustapha Muhammad, ya bayyana lamarin a matsayin “rashin imani.” Ya yi kira ga jami’an tsaro da su gudanar da cikakken bincike tare da hukunta duk wanda aka samu da hannu.
Shi ma Kakakin Rundunar ’Yan Sandan Kano, CSP Abdullahi Haruna Kiyawa, ya tabbatar da k**a wasu mutane biyu a yankin dangane da lamarin. Ya ce bincike na gudana, yana mai cewa bayanan farko da aka samu ba su nuna alaƙa tsakanin kisan da ayyukan Dan Shagamu na kafafen sada zumunta ba, sai dai zargin hassada da ƙiyayya tsakanin makwabta.
Tsohon Gwamnan Kano kuma ɗan takarar mataimakin shugaban ƙasa na NDC, Rabiu Musa Kwankwaso, ya yi Allah-wadai da kisan, tare da kira ga Gwamnatin Jihar Kano da ta kafa kwamitin bincike domin gano musabbabin kisan da kuma gurfanar da waɗanda s**a aikata shi.
Haka kuma, ƙungiyar kare haƙƙin bil’adama ta Amnesty International ta yi Allah-wadai da kisan, tana mai kira ga hukumomi da su gudanar da cikakken bincike tare da tabbatar da cewa an hukunta waɗanda ake zargi da hannu.
Ƙungiyar ta ce a tsarin dimokuraɗiyya, masu s**a da bayyana ra’ayinsu ya k**ata a saurare su, ba a kashe su ba.
