13/03/2026
Babban Daraktan Cibiyar Kula da Nagartar Ayyuka ta Ƙasa (NPC) Ya Kaddamar da Kwamitin Gudanar da Tsarin Auna Ingancin Aiki (PMS)
A yammacin wannan rana ta Alhamis 12-03-2026. Babban Daraktan Cibiyar Kula da Nagartar Ayyuka ta Ƙasa (NPC), Dr. Baffa Babba Dan’agundi, ya kaddamar da kwamitin ƙwararru na cibiyar da zai jagoranci aiwatar da Tsarin Auna Ingancin Aiki (Performance Management System – PMS). An gudanar da wannan taro a ofishin Babban Daraktan inda Daraktoci, Shugabannin Sassa (HODs) da manyan jami’an gudanarwa s**a halarta.
A cikin jawabinsa na buɗe taron, Dr. Baffa Babba Dan'agundi ya bayyana cewa shirin PMS an ƙirƙire shi ne domin ƙara inganta yawan aiki da nagartar ayyuka a cikin cibiyar. Ya tabbatar wa mambobin kwamitin cikakken goyon bayansa, tare da ƙarfafa musu gwiwa da su sadaukar da kansu wajen tabbatar da an aiwatar da tsarin yadda ya kamata.
Da yake jawabi a wajen taron, Daraktan Sashen Gudanar da Harkokin Ma’aikata, Malam Shuaibu Zakari Atte, ya yaba da hangen nesa da kuma jagorancin Babban Daraktan, wanda ya ce shi ne ginshiƙin da ya haifar da wannan shirin na PMS.
Haka kuma, Mista Olabintan Olatunji wanda shi ne wakilin PMS daga Ma’aikatar Kwadago da Ayyukan Yi ta Tarayya, ya nuna godiyarsa ga Babban Daraktan bisa goyon bayan da yake bayarwa. Ya bayyana cewa bayan horo da takardar shaidar ƙwarewa da za a bai wa mambobin kwamitin, za a dora musu alhakin kula da ci gaban aikin ma’aikatan cibiyar, tare da jaddada muhimmancin su ɗauki aikin da muhimmanci.
Shi ma Mista Nwachukwu John Ikechukwu daga Ofishin Kula da Ci gaban Ayyukan Ma’aikata na Ofishin Shugaban Ma’aikatan Gwamnatin Tarayya, ya bayyana cewa kafa wannan kwamitin ƙwararru an yi shi ne domin taimaka wa shugabancin cibiyar wajen haɗa kai da aiwatar da tsarin PMS yadda ya kamata.
A ƙarshe, Daraktar Sashen Tsare-tsare da Nazarin Manufofi, Hajiya Omotayo Akingbade, wadda ta gabatar da jawabin godiya, ta yi kira ga dukkan Daraktoci da Shugabannin Sassa da su ba da cikakken goyon baya domin tabbatar da nasarar aiwatar da wannan sabon tsari.
Ayuba Jarimi
SSA MEDIA TO THE DG NPC
Alhamis 12th March 2026.
