25/08/2026
GREEN HOUSE KATSINA TA GUDANAR DA MAULUDIN ANNABI MUHAMMADU (S.A.W)
A yau, 12 ga watan Rabi'ul Auwal, kamfanin Green House Katsina ya gudanar da taron Mauludin Fiyayyen Halitta, Annabi Muhammadu (S.A.W), cikin yanayi na farin ciki, ibada da tunatarwa, ƙarƙashin jagorancin shugaban kamfanin, Alhaji Shehu Namaska.
Taron ya samu halartar ma'aikata da sauran mahalarta daban-daban, inda aka gudanar da karatun Alƙur'ani Mai Girma da Ishiriniya Diwani, tare da majalisar nasiha da tunatarwa kan muhimmancin kyawawan ɗabi'u da kyakkyawar mu'amala.
A farkon taron, Manajan kamfanin Green House Katsina, Alhaji Salisu Shehu, ya yi maraba da mahalarta taron, tare da nuna farin cikinsa da wannan dama ta haɗuwa domin tunawa da rayuwa da koyarwar Ma'aikin Allah, Annabi Muhammadu (S.A.W).
A jawabinsa, shugaban kamfanin Alhaji Shehu Namaska ya jaddada muhimmancin kyawawan halaye a wajen aiki, inda ya ja hankalin ma'aikatan kamfanin da su riƙa mutunta tare da kyautata mu'amala da abokan hulɗarsu.
Ya bayyana cewa, abokin hulɗa ginshiƙi ne mai muhimmanci ga ci gaban kowace sana'a da kamfani, don haka ya kamata a riƙa girmama shi, sauraron buƙatunsa da kuma mu'amala da shi cikin mutunci da gaskiya.
Haka kuma, Alhaji Shehu Namaska ya shawarci ma'aikatan da kada su tsaya kawai kan abin da suke samu a yau, sai dai su san ci gaban kansu, su koyi aiki tukuru, tanadi da kyakkyawan tsarin rayuwa domin kyautata makomarsu.
Ya ce idan mutum ya yi aiki da jajircewa, gaskiya da hangen nesa, tare da yin tanadi yadda ya kamata, nan gaba shi ma zai iya zama mai zaman kansa kuma ya samar da guraben aikin yi ga wasu.
A jawabin kammala taron, Daraktan kamfanin Green House Katsina, Alhaji Sani Shehu, ya sake jaddada manufar kamfanin ta girmama da daraja abokan hulɗarsa, yana mai cewa nasarar kamfanin ba za ta cika ba tare da amincewa da goyon bayan abokan hulɗa ba.
Ya tabbatar da cewa Green House Katsina zai ci gaba da ɗaukar abokan hulɗarsa a matsayin muhimmin ɓangare na tafiyarsa, tare da yin iya ƙoƙarinsa wajen samar da kyakkyawar hidima da mu'amala mai inganci.
Taron Mauludin ya kasance wata muhimmiyar dama ta ƙarfafa zumunci, haɗin kai, kyawawan ɗabi'u da tunawa da koyarwar Annabi Muhammadu (S.A.W), tare da ƙara wa ma'aikata kwarin gwiwar yin aiki cikin gaskiya, mutunci da kishin ci gaban kamfanin.
Green House Katsina — ci gaba tare da girmama abokan hulɗa da kyautata hidima.
