23/02/2026
DUNIYA BA TA SAN GWANI BA...
Lokaci yana tafiya, shekaru suna wucewa. Akwana a tashi, yau ya cika shekara guda cif da rasuwar babban malami, jagora kuma uba ga al’umma, Sheikh Sa’eedu Hassan Jingir.
Rasuwarsa babban gibi ne ba ga iyalai kaɗai ba, har ma da ɗaukacin al’ummar Musulmi. Malami ne wanda rayuwarsa ta kasance cikin hidimar addini, wa’azi, tarbiyya da tsayawa kan gaskiya. Mimbari ya shaida muryarsa, makarantu sun shaida kokarinsa, zukatan dalibai da mabiyansa sun shaida tasirin tarbiyyarsa.
Hakika duniya ba ta san gwani ba sai idan ta rasa shi. Yayin da yake raye, mutane da dama suna amfana da iliminsa da shawararsa. Amma yau, babu abin da ya rage mana sai addu’a da tuna kyawawan ayyukansa.
Muna roƙon Allah Maɗaukakin Sarki Ya jikansa da rahama, Ya sa kabarinsa ya zama cikin dausayin aljanna, Ya gafarta masa kura-kuransa, Ya saka masa da alkhairi bisa hidimar da ya yi wa Musulunci.
Allah Ya sa mutuwa hutuce gare shi, tare da sauran ‘yan uwa Musulmai da s**a riga mu gidan gaskiya. Allah Ya ba mu ikon yin koyi da kyawawan halayensa, Ya sa ƙarshenmu ma ya zama alheri.
Ibn Muhammad Muhammad ✍️
