19/09/2026
Wọn fẹ̀sùn kàn Bilikisu pé ó pa ọkọ rẹ̀ nítorí ó fẹ́ fẹ́ ìyàwó kejì ní Kano
Ìṣẹ̀lẹ̀ burúkú kan ti ṣẹlẹ̀ ní Katsalle, Rogo, ní Ìpínlẹ̀ Kano, lẹ́yìn tí ọlọ́pàá ti mú obìnrin kan, Bilkisu Sani, lórí ẹ̀sùn pé ó ní ọwọ́ nínú ikú ọkọ rẹ̀, Hafizu Gausu.
Gẹ́gẹ́ bí Daily Trust ṣe ròyìn, àwọn aráàlú gbọ́ igbe Bilkisu tó ń ké fún ìrànlọ́wọ́ ní nǹkan bí aago méje ìrọ̀lẹ́ ọjọ́ Ẹtì. Nígbà tí wọ́n dé, wọ́n rí Gausu tó dùbúlẹ̀ sínú ẹ̀jẹ̀, tí wọ́n sì fura pé ohun tó wuwo ni wọ́n fi gbá a lórí.
Àwọn tó dé ibi ìṣẹ̀lẹ̀ náà tún sọ pé wọ́n rí àmì ìfarapa ní etí rẹ̀, kí wọ́n tó pe ọlọ́pàá. Ọlọ́pàá sì gbé òkú rẹ̀ lọ fún ìwádìí.
Ìròyìn náà sọ pé Gausu ń gbero láti fẹ́ obìnrin míì gẹ́gẹ́ bí ìyàwó kejì rẹ̀, èyí tó fa àìfohùnṣọ̀kan láàárín òun àti Bilkisu. A tún sọ pé àwọn àgbà ti gbìyànjú láti bá tọkọtaya náà yanjú ọ̀rọ̀ tẹ́lẹ̀, ṣùgbọ́n àìyedè náà ń bá a lọ.
Bilkisu ti wà lábẹ́ ìmú ọlọ́pàá gẹ́gẹ́ bí ẹni tí wọ́n ń fura sí, nígbà tí ìwádìí ń bá a lọ.
Gausu àti Bilkisu ti ṣe ìgbéyàwó fún nǹkan bí ọdún méje, wọ́n sì ní ọmọ méjì. Ìròyìn náà tún sọ pé Bilkisu lóyún nígbà tí ọkọ rẹ̀ kú.
Wọ́n sin Gausu ní òwúrọ̀ ọjọ́ Àbámẹ́ta ní Rogo, ní ìbámu pẹ̀lú àṣà ẹ̀sìn Islam.
