06/08/2026
DA ƊUMI ƊUMI: Gwamna Buni Ya Bayyana Dalilan Naɗin Dr. Mohammed Goje A Matsayin Cikakken SSG
Gwamnan Jihar Yobe, Hon. Mai Mala Buni, CON, COMN, ya bayyana cewa naɗin Dr. Mohammed Goje a matsayin cikakken Sakataren Gwamnatin Jiha (SSG) ya samo asali ne daga ƙwarewarsa, jajircewarsa da irin yadda ya gudanar da aikinsa tun lokacin da aka naɗa shi a matsayin mukaddashin SSG.
A cewar Gwamnan, Dr. Goje ya nuna babban matakin jajircewa, aminci, saurin gudanar da aiki da kuma ƙwarewar shugabanci, lamarin da ya sa ya cancanci ci gaba da riƙe muƙamin.
Gwamna Buni ya kuma bayyana cewa gwamnatin sa na haɗa gogaggun ma'aikata da matasa masu ilimi da ƙwarewar fasahar zamani domin inganta ayyukan gwamnati da daidaita jihar da sauye-sauyen zamani.
Ya ƙara da cewa ofishin Sakataren Gwamnatin Jiha muhimmin ginshiƙi ne na daidaita ayyukan gwamnati, tare da tabbatar da haɗin gwiwa tsakanin ma'aikatu, hukumomi da sauran masu ruwa da tsaki domin inganta ayyukan gwamnati da hidimtawa al'umma.
Potiskum Media News
