19/11/2025
حاولت نجمع أهم النقط لخاص الواحد يعرفهم باش يدفع فيزا ديال أمريكا 🇺🇸. إجراءات الفيزا ساهلة بزاف، وحسن من بزاف دالفيزات اللي كاينين، حيث مكاينش بزاف لوراق، والشروط ديال الفيزا واضحين. وتيشدو لك باسبور غير ملي تتقبل لك الفيزا، إلا ترفض ليك الطلب كيرجعوه ليك فالبلاصة.
والحاجة الثانية إلا عطاوك الفيزا، كون متأكد غادي يعطيوها لك صالحة لمدة عشر سنوات، ماشي بحل شينغن تيعطيوك 15 يوم 😁 ونسبة القبول طالعة، ولكن خاص يتوفرو فيك شروط مثل: خدام، عندك شي تجارة، وحتى أنك تكون تتخدم عبر الانترنت…
- الخطوة الأولى: تعمّر الإستمار ديالDS-160
هذا الإستمار مهمة بزاف، وخود الوقت الكافي باش تعمرها، وديما دير Save قبل مدوز الخطوة الثانية 😅 باش حتى حاجة متمسح لك بالخطأ وتصدق معاود من الأول. خاصك تخصص وقت، حيث كتاخذ شي ساعتين أو أكثر، وممكن دير حفظ المعلومات وترجع مرة اخرى. وقبل متكمل ضروري خاصك شي عنوان ديال شي واحد في أمريكا 🇺🇸 ، وماشي ضروري تمشي عندو. هذا الشخص تيكون بحل إلا قدر الله وقعات لك شي حادثة يتاصلو به، وماشي ضروري تجلس معاه، أو تمشي تزورو.
- تصويرة
خاص تصوير تكون جديدة أقل من 6 أشهر
• الحجم 5×5 سم
• الخلفية بيضاء
• ميكونش فيها الفيلتر 😁
- حجز الموعد
ملي تسالي استمارة DS 160 راجع جميع المعلومات، حيت ملي غادي توقع ودير Submit ميمكنش لك تصحح شي حاجة. ولهذا راجع جميع المعلومات، وحاول متزيد والو من راسك.
غادي تمشي دير حساب في موقع غادي نخلي لك الرابط فالتعليق. وملي تكون تدير المعلومات ديالك غادي يطلبوك رقم DS 160 وغادي دخلو ملي تكون تتحجز الموعد. من بعد ما تدخل المعلومات، غادي يبان ليك رقم CGI قسيمة الدفع. هذا الرقم طبعو وسير لوكالة البنكية لغادي يقولو لك وخلص تكاليف الفيزا. وبعد 24 ساعة (مكاملاش)، دخل للموقع ودخل رقم لغادي يعطيوه لك ملي تخلص تكاليف الفيزا، ومن بعد شوف الموعد لغادي يناسبك باش دير مقابلة.
- نهار المقابلة
خاص تجيب معاك
• الباسبور
• تأكيد DS-160
• تصويرة
- لغة المقابلة
• العربية
• الفرنسية
• الإنجليزية
• الأمازيغية
- الأسئلة الشائعة
• سبب السفر
• الأماكن لغادي تزور
• فاش خدام
• واش مزوج واش عندك أولاد؟
• واش سافرت من قبل خارج المغرب؟
- وثائق ممكن ديهم معاك
تقدر تجيب وثائق مثل (شهادة العمل، كشف الحساب البنكي، عقود…)، ولكن قليل فين يطلبو لك هذا شي إلا في حالات شكو فيك، أو بقيتي تدخل وتخرج فالهدرة.
- استلام باسبور
يمكنك تختار تاخد باسبور ديالك
• أرامكس الدار البيضاء
• أرامكس الرباط
المهم حاولت نلخص كولشي، إلا كاين شي سؤال مرحبا 😎
#بوسحاق #السفر #أمريكا