22/08/2025
जयपृथ्वी एफएम बझाङले आफ्नो स्थापनाको चार वर्ष पूरा गरी भोलीदेखि पाँचौं वर्षमा प्रवेश गर्ने भएको छ । मानवतावादी राजा तथा राष्ट्रिय विभूति जयपृथ्वी बहादुर सिंहको स्मृतिमा २०७८ साल भदौ ७ गते स्थापित यस एफएमले शुरुदेखिनै शिक्षा, संस्कृति, चेतनामूलक कार्यक्रम तथा जनजीविकासँग जोडिएका मुद्दाहरूलाई प्राथमिकताका साथ प्रसारण गर्दै आएको छ ।
वार्षिकोत्सवका अवसरमा एफएमले जयपृथ्वी नगरपालिकास्तरीय कविता प्रतियोगिता आयोजना गर्नेछ भने विभिन्न जनचेतनामूलक सन्देश र अन्तरक्रियामूलक कार्यक्रमहरू प्रसारण गरिने जनाएको छ । त्यस्तै, नेपालकै पहिलो पत्रकारका रूपमा परिचित तथा मानवतावादी सिद्धान्त बोकेका राजा जयपृथ्वी बहादुर सिंहको विचार, योगदान र दर्शनबारे विज्ञ, इतिहासकार र सञ्चारकर्मीबीच विशेष बहस कार्यक्रम पनि प्रसारण हुनेछ ।
यससँगै जयपृथ्वी बहादुर सिंहको १४९ औँ जन्मजयन्ति पनि भोलीकै दिन विशेष रूपमा मनाइनेछ । उहाँले नेपाली भाषा, शिक्षा र पत्रकारिताको जग बसाल्दै मानव सेवा र चेतनाको मूल्यमान्यतालाई स्थापित गर्न जीवन समर्पण गर्नुभएको इतिहासविद्हरू बताउँछन् ।
जयपृथ्वी एफएम बझाङले स्थानीय मुद्दा, कृषि, स्वास्थ्य, शिक्षा, संस्कृति, सन्देशमूलक तथा मनोरञ्जनात्मक कार्यक्रममार्फत् समाज रुपान्तरणमा भूमिका खेल्दै आएको छ । पाँचौं वर्ष प्रवेशको यस अवसरमा रेडियोले अझै जिम्मेवार, प्रभावकारी र समुदायमुखी प्रसारणमा जोड दिने प्रतिबद्धता जनाएको छ ।
