https://hamrokhabarbardiya.com/

Hamro Khabar Bardiya हाम्रो खबर बर्दिया, Bardiya (2025)

09/09/2025

राजापुर नगरपालिका–८ लाई बाल विवाहमुक्त वडा घोषणा गर्ने तयारी, सरोकारवालासँग छलफल सम्पन्न
बर्दिया, राजापुर – सशक्त बालिका परियोजना कार्यक्रम अन्तर्गत राधा कृष्ण थारू जनसेवा केन्द्रको समन्वयमा राजापुर नगरपालिका–८ लाई बाल विवाहमुक्त वडा घोषणा गर्ने उद्देश्यले सरोकारवालासँग विशेष छलफल कार्यक्रम सम्पन्न गरिएको छ।वडा अध्यक्ष राजेश थारूको अध्यक्षतामा सम्पन्न कार्यक्रममा वडाघर, युवा क्लब, महिला सञ्जाल, शिक्षक, स्वास्थ्यकर्मी लगायत सरोकारवाला निकायको उल्लेखनीय सहभागिता रहेको थियो। कार्यक्रममा वडामा बाल विवाहको अवस्था, चुनौती, समाधान र बाल विवाहमुक्त वडा घोषणा सम्भव छ वा छैन भन्ने विषयमा गम्भीर छलफल गरिएको थियो।
छलफलमा सहभागीहरूले गाउँमा बाल विवाहबारे सचेतना फैलाउन जाँदा अभिभावकहरूबाट अवरोध हुने गरेको अनुभव सुनाउँदै, अबको दिनमा बाल विवाह गराउने गाउँलाई केही समयका लागि सरकारी सेवा तथा सुविधा कटौती गर्ने नीति अवलम्बन गर्नुपर्ने धारणा राखेका थिए।
कार्यपालिका सदस्य तथा वडा सदस्य कृष्णकला ढुङ्गनाले वडा स्तरीय बाल संरक्षण समितिले प्रभावकारी काम नगरेको उल्लेख गर्दै समितिलाई कागजमा मात्र सीमित नराखी समुदायमा सक्रिय बनाउनुपर्ने सुझाव दिइन्। उनले कानून कार्यान्वयनमा देखिएको लैंगिक विभेद (बालकलाई जेल हाल्ने, बालिकालाई घर पठाउने) लाई हटाएर समता मूलक कानुनी अभ्यास गर्नुपर्ने आवश्यकता औंल्याइन्।वडा सदस्य राजाराम थारूले अभिभावकहरूले आफ्ना बालबालिकाको गतिविधिमा निगरानी आवश्यक रहेको बताउँदै बाल विवाह रोकथामका लागि वडा कार्यालयले विभिन्न सचेतनामूलक कार्यक्रमहरू सञ्चालन गरिरहेको जानकारी गराए।
कार्यक्रम समापन गर्दै वडा अध्यक्ष राजेश थारूले वडामा बाल विवाहका कारण कुपोषण समस्या देखिएको उल्लेख गर्दै, अबदेखि बाल विवाह न्यूनीकरण र बाल विवाहमुक्त वडा घोषणाका लागि गाउँगाउँमा सचेतनामूलक कार्यक्रम, पोषणयुक्त लिटो वितरण, र सरोकारवालासहित प्रत्यक्ष संवादका कार्यक्रमहरू सञ्चालन गर्ने निर्णय गरी कार्यक्रम सम्पन गरिएको छ।

02/09/2025

गेरुवा गाउँपालिकामा तीनतारे विद्यालय घोषणा, शिक्षाको गुणस्तर सुधारमा जोड।
बर्दिया — बर्दियाको गेरुवा गाउँपालिका–५ स्थित श्री पशुपति माध्यमिक विद्यालयलाई तीनतारे विद्यालय घोषणा गर्दै आयोजित कार्यक्रममा संघीय सांसद तथा नेपाली कांग्रेसका सहमहामन्त्री किशोर सिंह राठौरले विद्यालयको भौतिक पूर्वाधारसँगै शिक्षाको गुणस्तरमा पनि समान रूपमा ध्यान दिनुपर्ने आवश्यकता औंल्याएका छन्।
कार्यक्रममा बोल्दै सांसद राठौरले भने, "सामुदायिक विद्यालयमा सरकारको ठूलो लगानी भइरहेको छ तर शिक्षाको गुणस्तर भने अपेक्षाअनुसार उकासिएको छैन, जुन दुःखद् कुरा हो। शिक्षक, विद्यालय परिवार र अभिभावक तीनै पक्षको साझा प्रयासले मात्र गुणस्तरमा सुधार ल्याउन सकिन्छ।"विद्यालय व्यवस्थापन समितिका अध्यक्ष खड्क बहादुर शाहको सभाध्यक्षतामा सम्पन्न कार्यक्रममा नेपाली कांग्रेसका जिल्ला सभापति अरुणप्रकाश सिंह राठौर, जिल्ला समन्वय समितिका सभापति सूर्य बहादुर खत्री, गेरुवागाउँपालिकाका अध्यक्ष जमान सिंह केसी, प्रमुख प्रसासकिय अधिकृत नर बहादुर चन्द ' विभिन्न राजनीतिक दलका प्रतिनिधिहरू, समाजसेवी, बुद्धिजीवी तथा स्थानीय शिक्षा प्रेमी विद्यार्थिहरूको उल्लेख्य उपस्थिति रहेको थियो।सभाध्यक्ष शाहले विद्यालयको वर्तमान अवस्था, चुनौती र आवश्यकताका बारेमा जानकारी गराएपछि प्रमुख अतिथिसहित अन्य वक्ताहरूले विद्यालय र क्षेत्रको शैक्षिक तथा भौतिक विकासका लागि निरन्तर सहयोग गर्ने प्रतिबद्धता व्यक्त गरेका थिए।कार्यक्रमले गेरुवा गाउँपालिकामा शिक्षाको स्तर उकास्नुपर्ने आवश्यकता र सामुदायिक विद्यालयप्रतिको सरोकारको प्रतिबिम्ब प्रस्तुत गरेको छ।

22/08/2025

राजापुरमा सङ्घीय शिक्षा ऐन विरुद्ध निजी विद्यालयहरुको शान्तिपूर्ण विरोध ।

सङ्घीय शिक्षा ऐनमा निजी विद्यालयहरू बन्द गर्ने जस्ता नीति ल्याउन लागिएको भन्दै बर्दियाको राजापुर नगरपालिकामा आज शान्तिपूर्ण विरोध कार्यक्रम सम्पन्न गरिएको छ।
प्यान्सन र नेशनल प्याब्सन बर्दियाको आयोजनामा सम्पन्न कार्यक्रममा बोल्दै नेशनल प्याब्सन बर्दियाका उपाध्यक्ष चन्द्र बहादुर विकले, सरकारले निजी विद्यालयहरूलाई कम्पनी दर्ता गराएर संचालन गर्न दिने अनि सबै सेवाहरू निःशुल्क दिनुपर्ने नीति ल्याउनु अनुचित रहेको बताउनुभयो।कार्यक्रममा पाँच बुँदे माग राखिएको छ"पूर्ण छात्रवृत्ति" भन्ने शब्द हटाइनुपर्ने।
पोशाक, स्टेशनरी, खाजा जस्ता सामग्री उपलब्ध गराउने प्रावधान खारेज गरिनुपर्ने।कम्पनी ऐनअनुसार दर्ता भएका विद्यालयहरूलाई 'गैर नाफामूलक' बनाउने नीति फिर्ता लिनुपर्ने।
छात्रवृत्ति वितरणको अधिकार विद्यालयमै रहने व्यवस्था गर्नुपर्ने।छात्रवृत्तिसम्बन्धी विभेदकारी ऐनका धाराहरू खारेज गरिनुपर्ने।उनीहरूले शिक्षा ऐन २०७७ को संशोधन र अन्य नियमावलीहरू सामुदायिक विद्यालयप्रति मात्र केन्द्रित भएकाले निजी विद्यालयमा अध्ययन गर्ने विद्यार्थीहरूलाई विभेद गरिएको आरोप पनि लगाएका छन्।कार्यक्रममा स्थानीय शिक्षक, अभिभावक तथा विभिन्न विद्यालयका प्रतिनिधिहरूको सहभागिता रहेको थियो। आयोजकहरूले तत्काल सरकारसँग संवादमार्फत समाधान खोजिने चेतावनी दिएका छन्।

19/08/2025

तीन वर्षदेखि सम्पर्कबिहीन सांसद लालवीर चौधरीप्रति जनगुनासो, विकास निर्माणमा पूर्णविराम ।
बर्दिया क्षेत्र नम्बर २ बाट प्रत्यक्ष निर्वाचित संघीय सांसद लालवीर चौधरी लगभग तीन वर्षदेखि जनसम्पर्कबाट टाढा रहेकाले स्थानिय बासिन्दाहरूमा गुनासो र निराशा बढेको छ।
२०८० सालको आमनिर्वाचनमा स्वतन्त्र उम्मेदवारका रूपमा विजयी भएका चौधरी केही समयपछि नागरिक उन्मुक्ति पार्टीमा आबद्ध भइ पार्टी अध्यक्षसमेत बनेका थिए। तर त्यसयता उनी बर्दियामा नफर्किएको र जनप्रतिनिधिको हैसियतमा स्थानीय समस्याप्रति पूर्ण बेखबर रहेको जनगुनासो छ।विशेषगरी राजापुर नगरपालिका लगायतका क्षेत्रहरूमा कर्णाली नदीको बाढी, डुबान र कटान जस्ता समस्याले प्रत्येक वर्ष जनतालाई सताइरहेको छ। तर संघीय सांसदबाट कुनै पहल नदेखिएको भन्दै विकास निर्माणमा पूर्णविराम लागेको स्थानीयको भनाइ छ।यसबाहेक, संघीय सांसदको नाममा बर्दिया हुँदै आएको विकास बजेट पनि कर्णाली नदी नियन्त्रणका लागि प्रयोग नगरिएको पाइएको छ। नाम नखुलाउने सर्तमा आयोजनाका एक कर्मचारीका अनुसार, उक्त रकम सांसद चौधरीले आफ्नो गृहजिल्ला कैलालीको शक्ति क्षेत्रमा लगानी गरेको खुलासा भएको छ।
स्थानीयहरूका अनुसार, सांसद चौधरीसँग सम्पर्क गर्न पटक–पटक फोन गरिए पनि फोन नउठाउने, जनसम्पर्क नगर्ने प्रवृत्तिले जनताको विश्वासमा धोका पुगेको छ।
अब जनतामा प्रश्न उठेको छ—बर्दियाले दिएको मतको सम्मान नगर्ने जनप्रतिनिधिको जवाफदेहिता कहिले सुनिश्चित हुन्छ? सांसद चोधरीको फोन नम्बर 9848613229

16/08/2025

राजापुरमा थारु समुदायद्वारा कृष्ण जन्माष्टमी भव्य रूपमा मनाउदै ।

राजापुर, बर्दिया | बर्दियाको राजापुर नगरपालिका लगायत थारु समुदायको बाक्लो उपस्थिति रहेका क्षेत्रहरूमा यस वर्षको कृष्ण जन्माष्टमी पर्व भव्य रूपमा धार्मिक आस्था र सांस्कृतिक परम्पराका साथ मनाउदै छन।
थारु समुदायले कृष्ण जन्माष्टमीलाई विशेष पर्वको रूपमा मनाउने चलन रहेको छ। अघिल्लो दिन ‘दर’ खाने चलन अनुसार पर्वको तयारी हुन्छ भने जन्माष्टमीको दिन बिहानैदेखि निराहार व्रत बसेर महिलाहरूले दिनभर पूजा–पाठ तथा नाचगान गर्ने गर्दछन्। साँझपख कृष्णको भजन–कीर्तन, पूजा र सांस्कृतिक कार्यक्रमहरू आयोजना गरिन्छ।
अधिकांश हिन्दू समुदायमा राति १२ बजे श्रीकृष्णको जन्मसमयमा व्रत सम्पन्न गरिने चलन भए पनि, थारु समुदायमा भने पर्वको समापन अर्को दिन बिहान मात्र गरिन्छ। भोलिपल्ट बिहान श्रद्धालुहरू खोला, नदी वा तलाउमा गई स्नान गरी बिसर्जन गर्ने परम्परा छ। स्नानपश्चात घर फर्किएर कृष्णको नाममा दाल, भात, तरकारी निकालेर खाने चलन रहेको छ। यसरी पर्वको व्रत समाप्त गरिन्छ।
पर्वको अवसरमा थारु समुदायका महिला–पुरुषहरू कृष्ण, राधा र गोपिनीहरूको भेषमा सजिएर, परम्परागत पहिरनमा पूजामा सहभागी भएका थिए। घर, मन्दिर र सार्वजनिक स्थलहरूमा कृष्णका तस्बिर, चित्रकला तथा झाँकीहरू राखेर पूजाआजा गरिएको थियो।
स्थानीयवासीहरूका अनुसार कृष्ण जन्माष्टमी थारु समुदायमा धार्मिक मात्र नभई सांस्कृतिक महत्त्व बोकेको पर्वका रूपमा मानिन्छ। सामूहिक नाचगान, भजन, कीर्तन र परम्परागत संस्कारमार्फत समुदायबीच एकता र सांस्कृतिक पहिचान झल्काउने अवसरका रूपमा यो पर्वले विशेष स्थान पाएको छ।

-

15/08/2025

राजापुर नगरपालिका २०८१/०८२ को वार्षिक प्रगति समीक्षा कार्यक्रम सम्पन्न ।

राजापुर नगरपालिकाको आर्थिक वर्ष २०८१/०८२ को वार्षिक प्रगति समीक्षा कार्यक्रम नगर प्रमुख दिपेश थारुको अध्यक्षतामा सम्पन्न भएको छ। कार्यक्रम उप–प्रमुख मनकलाकुमारी चौधरी, प्रमुख प्रशासकीय अधिकृत दशरथ बुढा, नगरका १० वटै वडाका अध्यक्षहरू, शाखा प्रमुखहरू तथा वडा सचिवहरूको उपस्थितिमा सम्पन्न भएको थियो।

कार्यक्रममा विभिन शाखाका शाखा प्रमुख र १० वटा वडाका सचिवहरूले आ–आफ्ना शाखा र वडाहरूको प्रगति विवरण प्रस्तुत गरेका थिए। प्राप्त प्रतिवेदनअनुसार, वडा कार्यालयहरू तथा विभिन्न शाखाहरूको भौतिक प्रगति १००% र वित्तीय प्रगति ९७% रहेको देखिएको छ। समग्र नगरपालिकाको सन्दर्भमा भने भौतिक प्रगति ९७% र वित्तीय प्रगति ९०% रहेको योजना शाखा प्रमुख रमेश पोखरेलले जानकारी दिनुभयो।
कार्यक्रममा विकास निर्माण, सामाजिक सेवा, शिक्षा, स्वास्थ्य, कृषि, पूर्वाधार लगायतका विविध क्षेत्रका उपलब्धिहरूको समिक्षा गरिएको थियो। साथै, बजेट कार्यान्वयनको अवस्था, स्रोत साधनको उपयोग, देखिएका समस्या र समाधानका उपायहरूबारे पनि विस्तृत छलफल गरिएको थियो।
नगर प्रमुख थारुले स्थानीय सरकारको सेवा प्रवाहलाई अझ प्रभावकारी बनाउन वडास्तरदेखि नगरस्तरसम्मको समन्वय, पारदर्शिता र जवाफदेहितालाई प्राथमिकता दिनुपर्नेमा जोड दिनुभयो। उप–प्रमुख चौधरीले महिला, बालबालिका, ज्येष्ठ नागरिक तथा विपन्न वर्गका लागि सञ्चालित कार्यक्रमहरूलाई निरन्तरता दिँदै गुणस्तरीय बनाउनेतर्फ ध्यान दिनुपर्ने बताउनुभयो।समग्रमा कार्यक्रम सकारात्मक वातावरणमा सम्पन्न भई आगामी वर्षलाई अझ प्रभावकारी बनाउने प्रतिबद्धता व्यक्त गरिएको थियो।

05/08/2025

राजापुर नगरपालिकामा बाढी पूर्वतयारी सम्पन्न, उच्च जोखिमयुक्त वडाहरूमा सेभ हाउसको व्यवस्था ।

राजापुर, बाढी तथा वर्षाजन्य सम्भावित विपदबाट हुने क्षति न्यूनीकरण गर्न राजापुर नगरपालिकाले सम्पूर्ण पूर्वतयारीहरू पूरा गरेको जनाएको छ।नगरप्रमुख तथा विपद् व्यवस्थापन समितिका संयोजक दिपेश थारुले मनसुन सक्रिय भएसँगै जल तथा मौसम विज्ञान विभागले यस वर्ष अत्यधिक वर्षा हुने अनुमान गरेपछि पालिकाले विशेष सतर्कता अपनाएको जानकारी दिनुभयो।नगरपालिकाले उद्धार कार्यका लागि आवश्यक सम्पूर्ण उद्धार सामग्रीहरूको व्यवस्थापन गरिसकेको छ। साथै, सशस्त्र प्रहरी बल, नेपाल प्रहरी, नगर प्रहरी, स्वयंसेवक तथा समुदायका सदस्यहरूलाई विपद् व्यवस्थापनसम्बन्धी तालिम प्रदान गरी तैनाथ गरिएको छ।
विशेषगरी बाढीको उच्च जोखिममा रहेका वडा नम्बर १, ३, ४, ७ र ९ का तटीय क्षेत्रका बासिन्दालाई सुरक्षित राख्नका लागि पालिकाले विभिन्न स्थानमा 'सेभ हाउस' तयार पारेको नगरप्रमुख थारुले जानकारी दिनुभयो। उहाँले जोखिममा रहेका महानुभावहरूलाई आफ्नो महत्त्वपूर्ण कागजातसहित सुरक्षित स्थानमा जान आग्रहसमेत गर्नुभएको छ।
राजापुर नगरपालिकाले बाढीको सम्भावित जोखिमलाई मध्यनजर गर्दै उद्धार, राहत तथा पुनःस्थापना योजनाहरूलाई प्राथमिकतामा राखी कार्य गरिरहेको जनाएको छ।

21/07/2025

राजापुर-४ अनन्तपुरमा मोटरसाइकलमा आगजनी: दुई जना पक्राउ ।
राजापुर नगरपालिका वडा नं. ४ अनन्तपुरमा गए राति करिब ११:३० बजे एक मोटरसाइकलमा आगजनी गर्ने घटनामा संलग्न दुई जनालाई प्रहरीले नियन्त्रणमा लिएको छ। भे १० प ६३ नम्बरको अपाचि आरटीआर मोटरसाइकल पूर्णरूपमा जलेर नष्ट भएको इलाका प्रहरी कार्यालय राजापुरले जनाएको छ।प्रहरी कार्यालयदेखि करिब ५०० मिटर टाढा रहेको स्थानमा रातिको समयमा भएको आगजनीले स्थानीय सुरक्षामा थप चुनौती खडा गरेको स्थानीयवासीहरूले बताएका छन्।
इलाका प्रहरी कार्यालय राजापुरका प्रवक्ता प्रहरी निरीक्षक नबिन थापा मगरका अनुसार, आगजनीमा संलग्न व्यक्तिहरूको पहिचान खुलेको छ। पक्राउ परेका व्यक्तिहरूमा राजापुर नगरपालिका वडा नं. ३ नङगापुरका २७ वर्षीय हेमन्त दहित र चितवनको भरतपुर महानगरपालिका वडा नं. २३ निवासी २६ वर्षीय पवन सुनार रहेका छन्।घटनामा जलेर नष्ट भएको मोटरसाइकलका धनी अरुण थारुले आफूसँग कसैसँग व्यक्तिगत रिसइबी नभएको बताउँदै, घटना रहस्यमय देखिएको प्रतिक्रिया दिएका छन्।हाल घटनाबारे थप अनुसन्धान जारी रहेको प्रहरीले जनाएको छ ।

21/07/2025

जोशिपुरका २३ सामुदायिक विद्यालयमा विशेष क्षमता भएका विद्यार्थीलाई शैक्षिक सामग्री वितरण
कैलाली, जोशिपुर —
अखिल समाजवादीका नेता तथा विद्यार्थी नेता लोकेश जोशीको पहलमा जोशिपुर गाउँपालिका अन्तर्गतका २३ वटा सामुदायिक विद्यालयमा अध्ययनरत ६७ जना विशेष क्षमता (अपांगता) भएका विद्यार्थीहरूलाई शैक्षिक सामग्री वितरण गरिएको छ।
नेता जोशीका अनुसार, "शैक्षिक सामग्री सानो भए पनि विशेष क्षमताका विद्यार्थीहरूको आत्मसम्मान उच्च राख्न र उनीहरूको मनोबल अझ बलियो बनाउने" उद्देश्यले उक्त रचनात्मक कार्यक्रम आयोजना गरिएको हो।
कार्यक्रममा जोशिपुर गाउँपालिकाका अध्यक्ष चित्र बहादुर चौधरी, अखिल समाजवादीका कोषाध्यक्ष बबरजङ्ग सिंह, केन्द्रीय सचिवालय सदस्य लोकेश जोशी, शिक्षा शाखाका प्रतिनिधि योगेश जोशी, २३ वटै विद्यालयका प्रमुख/शिक्षक प्रतिनिधिहरू, पत्रकार, साथै विद्यार्थीका अभिभावकहरूको समेत उल्लेख्य उपस्थिति रहेको थियो।
कार्यक्रमले समुदायमा समावेशी शिक्षाको सन्देश फैलाउनुका साथै विशेष आवश्यकताहरू भएका विद्यार्थीप्रति समाजको उत्तरदायित्वबोधलाई पनि बलियो बनाएको सहभागीहरूले बताएका छन्।

20/07/2025

भेरी माध्यमिक विद्यालय, राजापुर–८, धोबिनपुर, बर्दिया को सुचना ।
प्राविधिक शिक्षाको प्रवर्धन र विद्यालयको समुन्नत भविष्य सुनिश्चित गर्ने उद्देश्यले आयोजित महायज्ञ कार्यक्रममा सहभागी भई बोलकबोलमार्फत आर्थिक सहयोग गर्ने प्रतिवद्धता व्यक्त गर्नु भएका सम्पूर्ण सम्माननीय दाताहरूप्रति भेरी माध्यमिक विद्यालय परिवार हार्दिक आभार प्रकट गर्दछ।तर, केही दाताहरुबाट हालसम्म घोषणा गरिएको दान रकम प्राप्त हुन बाँकी रहेको हुँदा, विद्यालयको शैक्षिक तथा भौतिक विकास योजनाहरू अगाडि बढाउन कठिनाइ उत्पन्न भएको व्यहोरा समेत अवगत गराउन चाहन्छौं।अत सम्माननीय दाताज्यूहरूलाई यथाशीघ्र घोषित दान रकम विद्यालयमा बुझाइदिनुहुन हार्दिक अनुरोध गर्दछौं।
तपाईंको सानो सहयोगले विद्यालयको प्राविधिक शिक्षामा ठूलो परिवर्तन ल्याउन सक्नेछ।भेरी माध्यमिक विद्यालय परिवार
राजापुर–८, धोबिनपुर,

10/07/2025

राजापुर नगरपालिकाबाट आर्थिक प्रगति सार्वजनिक – चालू खर्चमा ८३.६% र पुँजीगतमा ९१.३३% प्रगति

आर्थिक वर्ष २०८१/०८२ का लागि स्वीकृत वार्षिक योजना तथा कार्यक्रम अन्तर्गत राजापुर नगरपालिकाले उत्कृष्ट आर्थिक प्रगति हासिल गरेको जनाएको छ। कार्यालयको विवरणअनुसार चालू तर्फ ८३.६ प्रतिशत र पुँजीगत तर्फ ९१.३३ प्रतिशत प्रगति हासिल भएको छ। औसत प्रगति ८५.६७ प्रतिशत रहेको छ।नगर प्रमुख, उप–प्रमुख, जनप्रतिनिधि, शाखा प्रमुख तथा कार्यालयका सम्पूर्ण कर्मचारीहरूको सक्रियता र समर्पणकै कारण योजनाहरू सफल रूपमा कार्यान्वयन भएको नगर कार्यपालिकाले जनाएको छ।उपभोक्ता समिति, विकास साझेदार, निर्माण व्यवसायी लगायत नगरवासीहरूद्वारा प्रदान गरिएको निरन्तर सहयोग, सुझाव र सतर्कताले योजना कार्यान्वयनमा थप मजबुती दिएको कार्यालयको भनाइ रहेको छ।
समयमै कारोबार भुक्तानी तथा योजनाहरू कार्यान्वयन गर्न सफल हुनुलाई नगरको समग्र समन्वय र साझेदारीको परिणामका रूपमा लिएको छौं,” वरिष्ठ लेखा अधिकृत बसन्त मल्लले बताए।प्रमुख प्रशासकीय अधिकृत दशरथ बुढाले भने, “विकासका कार्यक्रमहरू प्रभावकारी रूपमा कार्यान्वयन हुनुलाई हामीले सबैको साझा सफलता मानेका छौं। आगामी वर्षहरूमा अझ पारदर्शिता, जवाफदेहिता र कार्यकुशलता अभिवृद्धि गर्दै अघि बढ्नेछौं।”नगर कार्यपालिकाले आगामी दिनमा समेत योजनाहरूको कार्यान्वयनमा व्यापक सहभागीता, पारदर्शिता र अनुगमनलाई प्राथमिकता दिने जनाएको छ।

06/07/2025

नेपाल स्काउट लुम्बिनी प्रदेशद्वारा १४औं बीटीसी तथा ४५५औं पीटीसी आधारभूत स्काउट तालिम राजापुरमा सुरु
राजापुर, असार २२, २०८१ — नेपाल स्काउट लुम्बिनी प्रदेशको समन्वयमा सामाजिक विकास डिभिजन कार्यालय बाँकेद्वारा आयोजित १४औं बेसिक ट्रेनिङ कर्पस (बीटीसी) तथा ४५५औं प्रोग्राम ट्रेनिङ कर्पस (पीटीसी) आधारभूत स्काउट तालिम बर्दिया जिल्लाको राजापुरस्थित अमर शहीद बहुमुखी क्याम्पसमा सुरु भएको छ।
६ दिने उक्त तालिमको उद्घाटन लुम्बिनी प्रदेशका सामाजिक विकास मन्त्री जन्मजय तिमिल्सिनाले एक विशेष समारोहका बीच गर्नुभयो। उद्घाटन मन्तव्यमा मन्त्री तिमिल्सिनाले स्काउट आन्दोलनले युवामा अनुशासन, जिम्मेवारी र सेवाभावको विकास गर्ने उल्लेख गर्दै समाजमा नेतृत्वदायी भूमिका निर्वाह गर्नुपर्नेमा जोड दिनुभयो।
“शिक्षा विकासको मेरुदण्ड हो। शिक्षा बिना कोही पनि पछाडि पर्नु हुँदैन,” मन्त्री तिमिल्सिनाले भन्नुभयो।
कार्यक्रममा प्रमुख जिल्ला अधिकारी सुरेन्द्र पौडेलले स्काउट आन्दोलनले राष्ट्र निर्माणमा पुर्‍याएको योगदानको चर्चा गर्दै स्काउट जीवनपद्धति अनुशासन र सेवाभावमा आधारित भएको बताउनुभयो।
त्यस्तै, प्रजिअ पोखराले अनुशासित, इमान्दार र सेवामुखी नागरिक उत्पादनमा स्काउटको भूमिकालाई विशेष महत्व दिनुपर्ने धारणा राख्नुभयो।
तालिममा लुम्बिनी प्रदेशका बर्दिया र बाँके जिल्लाबाट आएका शिक्षक प्रशिक्षार्थीहरूले स्काउट सिद्धान्त, व्यवहारिक ज्ञान, अनुशासन, तथा नेतृत्व विकास सम्बन्धी प्रशिक्षण लिनेछन्। र आफ आफ्नो विद्यालय हरु मा स्काउट संचालन गर्ने बताईएको छ।
कार्यक्रम सामाजिक विकास डिभिजन कार्यालय बाँकेका प्रमुख उद्दव श्रेष्ठको अध्यक्षतामा सञ्चालन गरिएको हो।

Hamro Khabar Bardiya हाम्रो खबर बर्दिया

09/09/2025

02/09/2025

22/08/2025

19/08/2025

16/08/2025

15/08/2025

05/08/2025

21/07/2025

21/07/2025

20/07/2025

10/07/2025

06/07/2025

Address

Telephone

Website

Alerts

Contact The Business

Shortcuts

Share

Category