07/01/2026
नेपाल सरकारले पेट्रोलमा १० प्रतिशत इथानोल मिसावट (ब्लेन्डिङ) गर्न स्वीकृति दिएको छ । इन्धन आयात घटाउने, स्वदेशी उत्पादनलाई प्रोत्साहन गर्ने र वातावरणमैत्री ऊर्जाको प्रयोग बढाउने उद्देश्यसहित मन्त्रिपरिषद्ले “इथानोल मिसावट गरिएको पेट्रोल प्रयोगसम्बन्धी आदेश, २०८२” स्वीकृत गरेको हो । यससँगै नेपाल आयल निगम (एनओसी) ले देशभर इथानोल मिसाइएको पेट्रोल मिश्रण तथा बिक्री गर्न पाउनेछ ।
इथानोल ऊखु, पराल तथा सुक्खा घाँसजस्ता कच्चा पदार्थबाट उत्पादन गर्न सकिने भएकाले यसले वार्षिक करिब ७३ मिलियन लिटर पेट्रोल आयात घटाउन सक्ने अनुमान गरिएको छ । यसबाट करिब ६ अर्ब २० करोड रुपैयाँ बराबरको विदेशी मुद्रा बचत हुनुका साथै किसानलाई थप आम्दानी र रोजगारीका अवसर सिर्जना हुने अपेक्षा गरिएको छ । एनओसीका प्रबन्ध निर्देशक डा. चण्डिका प्रसाद भट्टका अनुसार इथानोल प्रयोगले इन्जिनबाट निस्कने प्रदूषण कम गर्छ र कार्बन डाइअक्साइड उत्सर्जन गर्दैन ।
हाल नेपालमा दैनिक करिब २० लाख लिटर पेट्रोल खपत हुने गरेको छ । पेट्रोलमा १० प्रतिशत इथानोल मिसावट गर्दा दैनिक करिब ४ लाख लिटर पेट्रोलको खपत घटाउन सकिने बताइएको छ । यस नीतिले इन्धन आयातमा निर्भरता कम गर्ने, विदेशी मुद्रा बचत गर्ने, वातावरण संरक्षण गर्ने र विद्युतीय सवारी साधनजस्ता वैकल्पिक ऊर्जासम्बन्धी पहललाई पूरक सहयोग पुर्याउने लक्ष्य लिएको छ ।
