08/05/2026
शीर्षक: “आँधीको बिहान, मनको कामना”
मौसम बदलिँदैछ यहाँ,
वातावरणमा अनौठो हलचल छ,
आज आकाश गर्जिरहेको छ
जस्तो लाग्छ, कुनै भयंकर कथा लेखिँदैछ।
कालो बादल मडारिँदै दौडिरहेका छन्,
वेगवान हावाले रुखका हाँगाहरू
एकआपसमा पाखुरा बजारिरहेझैं
प्रकृतिको आफ्नै संघर्ष झल्किरहेको छ।
गुँड छाडी चारोको खोजीमा उडेकी मैना चरी,
अब आफ्नै बासस्थानतर्फ फर्किँदैछ
बेगले पखेटा फिजाउँदै
सुरक्षाको खोजीमा, आफ्ना बचेराका लागि।
बादलहरू एकआपसमा ठोक्किँदा,
बिस्तारै फुट्दैछन् पानीका फोका,
बिहानीपख क्याम्पस परिसरमा
आँधीबेहरीले आफ्नै संगीत बजाइरहेछ।
डिग्रीका विद्यार्थीहरू
कक्षा बाहिर निस्केर,
परिवर्तित मौसमलाई नजिकबाट नियाल्दै
क्षणलाई कैद गर्न व्यस्त छन्।
लाग्छ आज
भगवान् श्री इन्द्र रिसाएका छन्,
रिसको आवेगमा
सारा आकाशलाई अँध्यारो बनाउँदै,
औँसीको रातझैं बिहानै ढाकिदिएका छन्।
पानी
जस्तो लाग्छ, सारा ब्रह्माण्डको भण्डार
यतै खन्याउन खोजिएको छ,
हेर्दाहेर्दै, जलमग्न हुँदैछ वरिपरि सबथोक।
तर,
मौसमसँगै अर्को चिन्ता पनि बढ्दैछ
हिजो जस्तै गर्मी होला भनी
आज न चिटर लगाएँ,
न त छाता नै बोकेँ साथमा।
प्रकृतिले च्यालेन्ज गरेपछि,
चिया नपिउने म पनि
तातो चियाको चुस्की खोज्दैछु आज
शीतलतामा सान्त्वना पाउन।
काश,
यो आँधी फेरि शान्त भइदियोस्,
सबैजना सुरक्षित
आ-आफ्नो घर पुगून्
त्यही नै आजको सबैभन्दा ठूलो कामना।
— आकृति रानी ✍️
