29/05/2026
प्रेस विज्ञप्ति
मिति २०८३ जेष्ठ १५
नेपाल पत्रकार महासंघ, पर्सा शाखामा कायम सदस्यहरूको शुद्धीकरणको विषयलाई लिएर गठन भएको भनिएको ‘सदस्यता शुद्धीकरण संघर्ष समिति’को नाममा शाखा कार्यालयमा गरिएको तालाबन्दीबारे सामाजिक सञ्जालमार्फत सार्वजनिक भएका सूचनाप्रति हाम्रो गम्भीर ध्यानाकर्षण भएको छ ।
नेपाल पत्रकार महासंघ, पर्सा शाखा कुनै एक व्यक्ति वा समूहको मात्र संस्था होइन । यो पर्साका सम्पूर्ण सञ्चारकर्मीहरूको साझा भरोसा, साझा सम्पत्ति र वर्षौंदेखि बनेको प्रतिष्ठाको प्रतीक हो । यस्तो संस्थालाई कुनै औपचारिक जानकारी नै नदिई सार्वजनिक बिदाको दिन कार्यालय बन्द रहेको बेला केही व्यक्तिहरूले ताला लगाएर सामाजिक सञ्जालमार्फत प्रदर्शन गरिएको गतिविधि अत्यन्त दुःखद, आपत्तिजनक र संस्थाको गरिमामाथिको प्रत्यक्ष प्रहार हो । यस्ता गतिविधिले पर्सेली पत्रकारिताको एकता, विश्वास र साखमा गम्भीर चोट पु¥याएको महसुस हामीले गरेका छौं ।
सदस्यता शुद्धीकरणको सवालमा नेपाल पत्रकार महासंघ, पर्सा शाखा पूर्ण रूपमा प्रतिबद्ध छ । तर, शुद्धीकरण कुनै व्यक्तिगत आग्रह, आवेग वा दबाबमा हुने विषय होइन । यो संस्थाको विधि, विधान र विगतका निर्णयहरूको अध्ययन तथा सहमतिका आधारमा मात्रै अगाडि बढ्नुपर्ने जिम्मेवार प्रक्रिया हो ।
यसै सन्दर्भमा शाखा नेतृत्वले तत्कालीन अध्यक्ष श्री अनुप तिवारीज्यूलाई २०८३ साल जेठ ७ गते औपचारिक पत्राचार गरी ३ दिनभित्र संस्थाको निर्णय पुस्तिका, सदस्यताको अभिलेख र आर्थिक हरहिसाबलगायतका आवश्यक कागजात बुझाइदिन आग्रह गरेको थियो । तर, कागजात उपलब्ध गराएर प्रक्रिया सहज बनाउनुको सट्टा उहाँकै नेतृत्वमा संस्थाको कार्यालयमा तालाबन्दी हुनु केवल दुःखदमात्रै होइन, नियतप्रति गम्भीर प्रश्न उठाउने खालको घटना बनेको छ ।
शाखामा अहिले कायम सदस्यता निवर्तमान नेतृत्वकै कार्यकालमा कायम भएको यथार्थ एकातिर छ भने त्यही सदस्यहरूको मताधिकारबाट नेतृत्वसमेत परिवर्तन भइसकेको अवस्थामा वर्तमान कार्यसमितिलाई हस्तान्तरण गर्नुपर्ने निर्णय पुस्तिका, आर्थिक विवरण र अन्य अभिलेख अहिलेसम्म नबुझाइनु अत्यन्त चिन्ताजनक विषय हो । अझ साधारणसभा गर्ने तयारी भइरहेका बेला त्यसलाई प्रभावित पार्ने गरी भइरहेका गतिविधिले थप आशंका पैदा गरेका छन् ।
कार्यसमितिको पदस्थापनकै दिन निर्णय पुस्तिका हस्तान्तरण नगरिनु, पटकपटक आग्रह गर्दा बहाना बनाइरहनु, पहिलो बैठकले ३० दिनभित्र हरहिसाब बुझाउने निर्णय गर्दा पनि त्यसलाई बेवास्ता गरिनु, हरहिसाब साधारणसभामा बुझाउँछौं भन्दै बलमिच्याइँ गर्नु र साधारणसभाको मिति तय गर्न बैठक बोलाउँदा बारम्बार अवरोध सिर्जना हुनु, यी सबै घटनाले शुद्धीकरणको नाममा संस्थालाई अन्योल र असहजतामा राख्ने प्रयास भइरहेको हाम्रो ठहर छ ।
त्यसैले महासंघको निर्णय पुस्तिकालगायत सम्पूर्ण हरहिसाब तत्काल शाखालाई बुझाई सदस्यता शुद्धीकरण प्रक्रियामा सहयोग गर्न र शाखा कार्यालयमा लगाइएको तालाबन्दी तत्काल खोलेर संवादमा आउन पुनः आग्रह गर्दछौं । नेपाल पत्रकार महासंघ, पर्सा शाखा सदैव संवाद, सहकार्य र संस्थाको हितमा उभिएको छ । तर, संस्थाको गरिमा, पत्रकारहरूको साझा प्रतिष्ठा र कानूनी अधिकारमाथि निरन्तर प्रहार भइरहेमा शाखा आवश्यक कानूनी उपचारको बाटो रोज्न बाध्य हुने जानकारी गराउँदछौं ।
