08/06/2026
फिलिपिन्समा ७.८ म्याग्निच्युडको शक्तिशाली भूकम्प, दक्षिणी क्षेत्रमा ठूलो झट्का
फिलिपिन्सको दक्षिणी भागमा आज बिहान करिब ७.८ म्याग्निच्युडको शक्तिशाली भूकम्प गएको छ। भूकम्पले विशेषगरी मिन्दानाओ क्षेत्रका डाभाओ ओरिएन्टल र डाभाओ ओक्सिडेन्टल आसपासका क्षेत्रमा ठूलो झट्का दिएको बताइएको छ।
भूकम्पको मुख्य प्रभाव मालिता क्षेत्रस्थित महायाहाय एलेमेन्टरी स्कूलमा परेको देखिएको छ, जहाँ बिहानको झण्डा समारोह (फ्ल्याग सेरेमनी) भइरहेको समयमा भवन कडा रूपमा हल्लिएको थियो। त्यस क्रममा विद्यार्थी र शिक्षकहरूबीच भागदौड र त्रासको अवस्था सिर्जना भएको प्रत्यक्ष भिडियोहरूमा देखिन्छ।
प्रारम्भिक विवरणअनुसार भूकम्पको केन्द्र मिन्दानाओ आसपास रहेको र शक्तिशाली झट्काका कारण धेरै स्थानमा भवनहरू हल्लिएका तथा केही संरचनामा क्षति पुगेको छ। आपतकालीन अवस्था घोषणा गर्दै उद्धार तथा क्षति मूल्यांकनको काम जारी रहेको जनाइएको छ।
त्यसैगरी केही क्षेत्रमा सुनामीको सम्भावनालाई ध्यानमा राख्दै चेतावनीसमेत जारी गरिएको स्थानीय अधिकारीहरूले बताएका छन्।
हालसम्म मानवीय क्षति वा विस्तृत विवरण पूर्ण रूपमा सार्वजनिक भएको छैन भने उद्धार टोलीहरू प्रभावित क्षेत्रमा परिचालन भइरहेका छन्।
