12/09/2025
शान्ति र लोकतन्त्रको लागि पेशागत सञ्जाल
प्रेस विज्ञप्ति
जेन्जी समूहले गत भाद्र २३ र २४ मा गरेको भ्रष्ट्राचार र बेथिति विरुद्धको आन्दोलनका क्रममा भएको मानवीय र भौतिक क्षतिप्रति पापड, दोलखा गहिरो दुःख व्यक्त गर्दछ र उक्त आन्दोलनमा सहादत भएका व्यक्तिहरु प्रति हार्दिक श्रदाञ्जली व्यक्त गर्दै घाइतेहरुको शीघ्र स्वाथ्य लाभको कामना गर्दछ ।
देशको लोकतन्त्रको संस्थागत गर्न, विधिको शासन, न्याय, समानता, मानव अधिकार एवम् नेपाली जनताको सार्वभौम सत्ताको संरक्षणका लागि पापडले सशक्त आवाज उठाउँदै आएको छ । जेन्जी समूहले देशमा विद्यमान बेथिति र भ्रष्ट्राचार अन्त्य गर्दै सुशानका लागि स्वतः स्फूर्त रुपमा सुरु गरेको अभियानमा पापड, दोलखा ऐक्यवद्धता जाहेर गर्दछ । आन्दोलका क्रममा देशको सर्वाेच्च प्रशासनिक केन्द्रका रुपमा रहेको सिंहदरबार, संसद् भवन, सर्वोच्च अदालत, राष्ट्रपति एवम् प्रधानमन्त्री कार्यालय लगायत दर्जनौँ सरकारी कार्यालय र व्यक्तिगत धन सम्पत्तिमा भएको आगजनी, तोडफोड र विध्वंसक क्रियाकलापले उक्त आन्दोलन जेन्जी समूहको नियन्त्रणभन्दा बाहिर रहेको स्वतः पुष्टि भएको छ । यस्ता अवाञ्छित गतिविधिले देशको पुरातात्विक, ऐतिहासिक सम्पदा समेत ध्वस्त भएका छन् र देशलाई अपूरणीय क्षति हुन पुगेको छ । यस दुःखद् घटनाप्रति पापड, दोलखा निन्द व्यक्त गर्दछ र घटनाका दोषीउपर कानुनी कार्वाहीको जोडदार मागसमेत गर्दछ ।
जेन्जीको आन्दोलनपश्चात देशमा विषम परिस्थिति सिर्जना भएको छ । मौजुदा सरकारको विस्थापनसँगै नयाँ सरकारको गठन प्रक्रियामा अन्योलता छाएको छ । पछिल्लो समयमा विकसित घटनाक्रमले सर्वसाधारण जनतामा भय, आशङ्का र चिन्ता उत्पन्न भएको छ । अतः नेपालको राष्ट्रिय एकता र सार्वभौमसत्ता अक्षुण्ण राख्न, विधिको शासन सञ्चालन गर्न, संवैधानिक एवम् लोकतान्त्रिक विधिबाट शीघ्रातिशीघ्र नयाँ सरकार गठन गरेर जनतामा उत्पन्न अन्योल र निराशा अन्त्य गर्नका लागि हार्दिक अपिल गर्दछौ ।
नेपाल बार एसोयिसन, दोलखा
नेपाल पत्रकार महासंघ, दोलखा
नेपाल प्रध्यापक संघ, दोलखा
नेपाल इन्जिनियर एसोसियसन, दोलखा
नेपाल शिक्षक महासंघ, दोलखा
नेपाल चिकित्सक संघ, दोलखा
गौसस महासंघ, दोलखा
इन्सेक, दोलखा
२०८२/५/२७
