30/05/2026
चितवन, जेठ १६ गते । लायन्स क्लब अफ चितवन माउण्ट एभरेष्टको १० औं अधिवेशनबाट लायन वर्ष २०२६/२०२७ को लागि अध्यक्ष पदमा लायन कृष्ण खरेल सर्वसम्मत निर्वाचित हुनुभएको छ। आज भरतपुरमा सम्पन्न क्लबको अधिवेशनबाट नयाँ कार्यसमिति सर्वसम्मत रूपमा चयन गरिएको हो, जसको प्रथम उपाध्यक्षमा लायन ठम बहादुर गुरूङ्ग (राजेश), सचिवमा लायन गणेश भण्डारी र कोषाध्यक्षमा MJF लायन गोविन्द अर्याल निर्वाचित हुनुभएको छ। लायन वर्ष २०२५/२०२६ का अध्यक्ष लायन पदमराज भट्टराईको अध्यक्षतामा सम्पन्न सो अधिवेशनमा MJF लायन दुर्गा लक्ष्मी श्रेष्ठले निर्वाचन संयोजकको भूमिका निर्वाह गर्नुभएको थियो भने कार्यक्रमको व्यवस्थापन एवं सञ्चालन क्लबका सचिव लायन रामजी पाण्डेले गर्नुभएको थियो।
अध्यक्ष पदमा निर्वाचित भएपछि लायन कृष्ण खरेलले क्लबभित्र एकता, मित्रता, पारदर्शिता र सहकार्यको वातावरण सिर्जना गर्दै सबै सदस्यहरूको भावना, सुझाव र सहभागितालाई सम्मानपूर्वक समेटेर अगाडि बढ्ने प्रतिबद्धता व्यक्त गर्नुभयो। उहाँले आफूमाथि गरिएको विश्वासलाई उच्च सम्मान गर्दै क्लबको गरिमा, उद्देश्य तथा लायन्सको अन्तर्राष्ट्रिय आदर्श वाक्य “We Serve” (हामी सेवा गर्छौँ) लाई आत्मसात् गरी समाजसेवाका क्षेत्रमा अझ प्रभावकारी र परिणाममुखी कार्यहरू गर्ने प्रण समेत गर्नुभयो।
अधिवेशनका अवसरमा क्लबका संस्थापक अध्यक्ष MJF लायन पुरन थापा मगरले नव निर्वाचित कार्यसमितिलाई सफल कार्यकालको हार्दिक शुभकामना व्यक्त गर्नुभयो। शुभकामना दिँदै उहाँले लायन्स क्लबको मूल उद्देश्य “हामी भन्दा कम भाग्यमानीको सेवा गरौँ” भन्ने भावनालाई आत्मसात गर्दै समाजमा लायनिज्मको सकारात्मक छाप छोड्न नव निर्वाचित टिमलाई विशेष उत्प्रेरणा र सन्देश प्रदान गर्नुभएको थियो।