29/06/2025
अपाङ्ग व्यक्तिमाथि सामूहिक कुटपिट: तीन जनाविरुद्ध गम्भीर आरोप
रौतहट जिल्लाको कटहरिया नगरपालिका वडा नं. ७ बगही टोलमा असार १२ गते दिउँसो करिब ४:३० बजे सामूहिक कुटपिटको घटना सार्वजनिक भएको छ । स्थानीय लाल बिहारी साह (उमेर करिब ५० वर्ष), जो शारीरिक रूपमा अपाङ्ग छन्, माथि तीन जनाले अति अमानवीय ढंगले कुटपिट गरी गम्भीर चोट पुर्याएको पीडित पक्षले आरोप लगाएको छ ।
पीडितको अनुसार विपक्षीहरू विल्टु मियाँ धोबी, अलि अकबर मियाँ धोबी, र इन्ताज आलम मियाँ धोबी ले श्रमिक प्रयोग गरी पीडितको नाममा रहेको जग्गा अतिक्रमण गरी अवैध रूपमा भवन निर्माण गर्न खोजेको बताइएको छ ।
जब पीडित लाल बिहारी साहले उक्त कार्यको विरोध गरे, विपक्षीहरू रिस उठाई अपशब्द बोलेर गालीगलौज गरेका र पछि सामूहिक रूपमा लात, घुँसा, मुक्का तथा फलामको जी.आई. पाइप प्रयोग गरी आक्रमण गरेको पीडितले आरोप लगाएको छ । आक्रमणबाट साहको बायाँ खुट्टाको हड्डी भाँचिएको, बायाँ हातमा फ्र्याक्चर भएको र पहिल्यै अपाङ्ग रहेको दाहिने हातमा समेत चोटपटक लागेर उनी अचेत अवस्थामा पुगेका थिए ।
स्थानीयको सहयोगमा घाइतेलाई तत्काल एम्बुलेन्समार्फत गरुडा स्थित बेटर नेपाल मल्टिस्पेशालिस्ट अस्पताल लगिएको थियो, डाक्टरले उनको खुट्टामा स्टील राखिएको र हातमा प्लास्टर लगाउनुपर्ने अवस्था रहेको बताएका छन् ।
पीडित परिवारले दोषीहरूलाई कानुनी दायरामा ल्याई हदैसम्मको सजायको माग समेत गरेका छन । इलाका प्रहरी कार्यालयमा ज्यादा मुद्दा दर्ता नगरी उल्टै विपक्षीलाई पक्राउ गरेको व्यक्तिलाइ छोडेका पीडित पक्षले आरोप लगाएका छन । एक महिना पहिला पनि विपक्षीले वडा अध्यक्षको अगाडि कुटपिट गरेको पीडित लाल बिहारी साहलको श्रीमतीले आरोप लगाएको छ ।
