01/09/2026
🇳🇵🙏 धनपति भण्डारी बुबा - ७८ वर्षको उमेरमा पनि देशका लागि एउटा प्रेरणादायी उदाहरण। ❤️
आज धनपति बुबा सिंहदरबार पुग्नुभयो - सरकारसँग केही माग्न होइन, आफ्नो व्यक्तिगत खाताबाट चेक काटेर राहत कोषमा सहयोग गर्न।
भदौ १४ गते दिउँसो २ बजे सिनामङ्गलबाट सिंहदरबार पुग्नुभएका ७८ वर्षीय धनपति बुबाले दक्षिण गेटमा पुगेर प्रहरीलाई भन्नुभयो,
“प्रधानमन्त्री राहत कोषमा पैसा दिन आएको हुँ, मलाई पैसा बुझाउने ठाउँमा पठाइदिनूस्।”
त्यसपछि उहाँलाई अर्थ मन्त्रालय पुर्याइयो। केही समयको पर्खाइपछि धनपति बुबा अर्थमन्त्री डा. स्वर्णिम वाग्लेको कार्यकक्षमा पुग्नुभयो।
अर्थमन्त्रीले उहाँलाई सोध्नुभयो,
“यत्रो रकम, यो उमेरमा तपाईं व्यक्तिगत रूपमै सहयोग गर्न चाहनुहुन्छ?”
धनपति बुबाको सरल जवाफ थियो -
“हो।”
जीवनको लामो समय भारतमा नोकरी गरेर बिताउनुभएका धनपति बुबा छोराछोरीलाई पढाएर हुर्काएपछि बुटवल फर्किनुभएको रहेछ। छोराछोरीले प्रगति गर्दै काठमाडौंमा राम्रो प्रबन्ध गरेपछि उहाँ पनि काठमाडौंमा बस्दै आउनुभएको रहेछ।
तर देशमा ठूलो संकट पर्दा धनपति बुबा चुप लागेर बस्नुहुन्न। आफ्नो व्यक्तिगत खाताबाट चेक काटेर आफैं सिंहदरबार पुग्नुहुन्छ।
यो पटकसहित धनपति बुबाले सरकारलाई गर्नुभएको सहयोग तेस्रो पटक रहेछ। अझ रोचक कुरा, उहाँले प्रत्येक पटक सहयोग गर्नुभएको रकम उस्तै छ - रु. ७,७७,७७७
अर्थात् ७ लाख ७७ हजार ७ सय ७७ रुपैयाँ। 🙏
धनपति बुबाले हस्तान्तरण गर्नुभएको चेक स्वीकार गर्दै अर्थमन्त्रीले यो रकम गलत ठाउँमा नजाने प्रतिबद्धता व्यक्त गर्नुभयो। उहाँका अनुसार उक्त रकम रसुवाका बाढीपीडितको हितमा खर्च हुने गरी जिल्लाका पालिकाहरूमा पठाइनेछ।
अर्थमन्त्रीलाई चेक हस्तान्तरण गरेपछि धनपति बुबाले भन्नुभयो -
“हजुरलाई दिएपछि म ढुक्क भएँ, त्यही भएर त खोज्दै–खोज्दै आएको।” ❤️
७८ वर्षको उमेरमा पनि देश र दुःखमा परेका नागरिकप्रति उहाँले देखाउनुभएको जिम्मेवारी, उदारता र मानवता साँच्चिकै प्रेरणादायी छ।
धनपति बुबालाई हृदयदेखि नमन।
यस्ता नागरिक नै देशका अमूल्य सम्पत्ति हुन्।
