13/09/2025
Nanuka Adhikari म प्रेम आचार्यकी पत्नी,आज मेरो शब्दहरू आँसु बनेर झरिरहेका छन्,मेरो आत्मा चिच्याइरहेको छ तर सुनिदिने कान कतै छैन।म अझै पनि सम्झिरहेकी छु त्यो दिन,जब मेरो श्रीमानले पेट्रोल हालेर आफ्नै शरीरलाई आगो लाउनुभयो।त्यो आगो केवल वहाँ को शरीर जलाउने मात्र थिएन,त्यो आगोले मेरो सपनाहरू,मेरो भविष्य,मेरो घरको खुसी र मेरो जीवनको आधारलाई पनि भस्म गरिदियो।प्रेम केवल मेरो श्रीमान मात्र होइनन्,उनी मेरो सास,मेरो अर्धाङ्ग, आत्माको आधार र मेरो छोरी हरु को बाबा थिए।तर यो भ्रष्ट,पापी र निर्दयी प्रणालीले उनलाई यति निराश बनायो कि आफ्नो आवाज सुनाउन आफ्नै प्राण बलिदान गर्नु पर्यो।
उहाको हातले लेखिएको त्यो नोट अझै मेरो आँखाभित्र जलिरहेको छ।त्यो नोटमा रगतको अक्षरले लेखिएको थियो–“म यो भ्रष्टाचारको साम्राज्यविरुद्ध आगो बनेर उभिन्छु।”वहाँ को शब्दले मेरो आत्मालाई थिचेको थियो र त्यही शब्दले देशलाई हल्लायो पनि।तर म प्रश्न गर्छु–के मेरो श्रीमानको आगो केवल केही दिनको समाचार मात्र हो?के नेताहरूको भाषण र श्रद्धाञ्जलीपछि फेरि सबै पुरानै भ्रष्ट प्रणालीमा फर्किने हो?मेरो पीडा केवल व्यक्तिगत होइन,यो लाखौँ नेपालीहरूको पीडा हो,जसले वर्षौँदेखि न्यायको खोजी गरिरहेका छन्।
Zen G को बलिदानले यो भूमिमा स्वतन्त्रताको बीउ रोपे,सुशिला कार्की पहिलो महिला प्रधानमन्त्री बनेर यो भूमिमा नारी नेतृत्वको फूल फुलाइन्,तर मेरो श्रीमान प्रेम आचार्यको बलिदानले यो भूमिमा सत्य,शुद्धता र ईमानको आगो सल्काएको छ।यी तीन अध्याय फरक भए पनि एउटै सत्य बोल्छन्–नेतृत्व बिना दिशा छैन,बलिदान बिना शक्ति छैन,र ईमान बिना राष्ट्र छैन।
म आफ्ना छोरीहरु लाई हेर्छु,उनीहरूको आँखामा प्रश्न हुन्छ–“हाम्रो बाबा किन फर्केर आउनुहुन्न?”मसँग जवाफ छैन,तर म चाहन्छु उनीहरूले भविष्यमा बाबाको बलिदानलाई व्यर्थ देखून् भनेर भन्नु नपरोस्।म चाहन्छु उनीहरूले न्यायपूर्ण समाजमा हुर्कून्,जहाँ कुनै बाबाहरूले आफ्नो शरीर जलाएर भ्रष्टाचारविरुद्ध सन्देश दिन नपरोस्।म चाहन्छु उनीहरूले एउटा यस्तो नेपाल देखून् जहाँ नेताहरूले भाषण होइन,कर्म गरेर राष्ट्र निर्माण गर्छन्।
आज मेरो स्वर चिच्याइरहेको छ–कृपया मेरो श्रीमानको बलिदानलाई इतिहासको धुलोमा पुरेर नथुनिदिनुहोस्।यसलाई प्रतिज्ञा,संकल्प र क्रान्तिको दीप बनाइदिनुहोस्।आज यदि तपाईंहरू चुप बस्नुभयो भने,भोलि फेरि अर्को प्रेम आचार्य जन्मिनेछ,फेरि अर्को आगो सल्किनेछ,फेरि अर्को परिवार ध्वस्त हुनेछ।
मेरो जीवन अब अधुरो छ,मेरो घर अब चिहान बनेको छ,तर मेरो श्रीमानको सपना अझै बाँकी छ।वहाँ को बलिदान केवल मृत्यु होइन,यो एउटा चेतावनी हो,यो एउटा क्रान्ति हो,यो एउटा आवाज हो जसलाई दबाउन सकिँदैन।मसँग श्रीमान हुनुहुन्न,तर देशसँग अझै वहाँ को सपना बाँकी छ ।
सुशिला कार्कीज्यू,तपाईं नेपालको पहिलो महिला प्रधानमन्त्री बन्नु भएको यो ऐतिहासिक क्षणले देशलाई नयाँ दिशा दिन्छ भन्ने मेरो अपेक्षा छ।कृपया मेरो श्रीमान प्रेम आचार्यको अनि अन्य धेरै साथी हरुको बलिदानलाई केवल स्मरणमा सीमित नगर्नुहोस्।यसलाई प्रतिज्ञा,संकल्प र सुधारको आधार बनाउनुहोस्।भ्रष्टाचारविरुद्ध कठोर कदम चाल्नुहोस्,सिस्टमलाई पारदर्शी र उत्तरदायी बनाउनुहोस्,ताकि भविष्यमा कुनै पनि परिवारलाई मेरो जस्तै पीडा भोग्न नपरोस्।यदि तपाईं सफल हुनुभयो भने,त्यो केवल तपाईंको विजय मात्र होइन मेरो श्रीमान जस्ता सत्यका योद्धाहरूको वास्तविक श्रद्धाञ्जली हुनेछ।🙏
