09/03/2026
लोकतान्त्रिक मूल्य–मान्यताप्रति सम्मान व्यक्त गर्दै आफ्नो अमूल्य विवेक प्रयोग गरी मतदान गर्नु हुने सम्पूर्ण इलाम क्षेत्रका आदरणीय मतदाताहरूमा म हार्दिक धन्यवाद व्यक्त गर्दछु। तपाईंहरूको सचेत सहभागिता र जिम्मेवार निर्णयले हाम्रो लोकतन्त्रलाई अझ सुदृढ, जीवन्त र अर्थपूर्ण बनाएको छ।
यस ऐतिहासिक निर्वाचनमा विजय हासिल गर्नु भएका जननिर्वाचित युवा उम्मेदवार मित्र निकल राई लाई हार्दिक बधाई तथा सफल कार्यकालको शुभकामना व्यक्त गर्दछु। यस्तो जटिल र चुनौतीपूर्ण समयमा प्राप्त यो विजय केवल व्यक्तिगत जित मात्र होइन—यो हाम्रो लोकतन्त्र, संविधान र विगतमा देशका लागि बलिदान दिनु भएका पुर्खाहरूको सपनाको विजय हो। साथै, यो जित देशको उज्ज्वल भविष्य बोकेका युवाहरूको आशा, आत्मविश्वास र सम्भावनाको पनि विजय हो।
इलामेली जनताले दुईवटै क्षेत्रमा युवा उम्मेदवारहरूलाई विजयी गराएर देखाएको विश्वास, साहस र दूरदृष्टिका लागि सम्पूर्ण इलामवासीलाई विशेष बधाई दिन चाहन्छु। तपाईंहरूको यो निर्णयले परिवर्तन, नयाँ ऊर्जा र नयाँ सोचप्रतिको जनताको भरोसा कति बलियो छ भन्ने कुरा स्पष्ट रूपमा प्रमाणित गरेको छ।
यसैगरी, उल्लेखनीय मत प्राप्त गरी प्रतिस्पर्धामा दोस्रो र तेस्रो स्थानमा रहनु भएका उम्मेदवारहरू विनोद लिम्बु, काजिमान कागते लगायत सम्पूर्ण उम्मेदवारज्यूहरूलाई पनि सम्मानपूर्वक धन्यवाद व्यक्त गर्दछु। तपाईंहरूले प्राप्त गर्नुभएको प्रत्येक मत अत्यन्तै महत्वपूर्ण छ। लोकतान्त्रिक व्यवस्थामा विजय एक जनाको मात्र हुने व्यवस्था भए पनि जनताले तपाईंहरूलाई पनि उत्तिकै माया, विश्वास र समर्थन गरेको कुरा यस परिणामले स्पष्ट रूपमा देखाएको छ।
अब चुनावी प्रतिस्पर्धाको समय समाप्त भएको छ। निर्वाचन अवधिमा देखिएका चर्का–चर्की, प्रतिस्पर्धा, जित र हार—यी सबै लोकतन्त्रका सुन्दर अभ्यासहरू मात्र हुन्। यसले कसैको मान–सम्मानमा आघात नपरोस् भन्ने कामना गर्दै अब हामी सबै पुनः सामान्य जीवनतर्फ फर्किएर एकताबद्ध भएर देश निर्माणको महान यात्रामा अघि बढौं।
आउनुहोस्,
लोकतन्त्रको सम्मान गरौं, एकता कायम गरौं, र समृद्ध नेपालको निर्माणका लागि सबै मिलेर अघि बढौं।
धन्यवाद। 🇳🇵✊
