18/09/2026
१३ देशका लागि नयाँ राजदूत सिफारिस, भारत–चीन–अमेरिका पनि सूचीमा
सरकारले भारत, चीन र अमेरिकासहित विभिन्न १३ देशका लागि नयाँ राजदूत सिफारिस गरेको छ। शुक्रबार बसेको मन्त्रिपरिषद् बैठकले विभिन्न देशमा रिक्त रहेका राजदूत पदमा नियुक्तिका लागि नाम सिफारिस गर्ने निर्णय गरेको हो।
सरकारले सिफारिस गरेका राजदूतमध्ये भारतका लागि निश्चलनाथ पाण्डे, चीनका लागि कल्याणराज शर्मा र अमेरिकाका लागि चिरनजंग थापा रहेका छन्। यस्तै, बेलायतका लागि गौरव शमशेर जंगबहादुर राणा, जापानका लागि जिग्यानकुमार थापा र इजरायलका लागि सुरेशकुमार कर्णलाई सिफारिस गरिएको छ।
त्यसैगरी स्पेनका लागि प्राप्ति शेरचन, जर्मनीका लागि शारू जोशी, ओमानका लागि डा. पद्माक्षी राणा, मलेसियाका लागि चूडामणि खरेल, दक्षिण कोरियाका लागि प्रा. डा. सङ्गम श्रेष्ठ, श्रीलंकाका लागि डा. मञ्चल झा र साउदी अरेबियाका लागि गिरीबहादुर सुनारको नाम सिफारिस भएको छ।
सिफारिस भएका राजदूतहरू :
१. निश्चलनाथ पाण्डे — भारत
२. कल्याणराज शर्मा — चीन
३. चिरनजंग थापा — अमेरिका
४. गौरव शमशेर जंगबहादुर राणा — बेलायत
५. जिग्यानकुमार थापा — जापान
६. सुरेशकुमार कर्ण — इजरायल
७. प्राप्ति शेरचन — स्पेन
८. शारू जोशी — जर्मनी
९. डा. पद्माक्षी राणा — ओमान
१०. चूडामणि खरेल — मलेसिया
११. प्रा. डा. सङ्गम श्रेष्ठ — दक्षिण कोरिया
१२. डा. मञ्चल झा — श्रीलंका
१३. गिरीबहादुर सुनार — साउदी अरेबिया
सरकारको निर्णयसँगै अब सिफारिस भएका व्यक्तिहरूको संसदीय सुनुवाइ हुनेछ। त्यसपछि सम्बन्धित मुलुकबाट एग्रिमो (सहमति) प्राप्त गर्नुपर्नेछ। संसदीय सुनुवाइ र एग्रिमोको प्रक्रिया पूरा भएपछि राष्ट्रपतिबाट औपचारिक रूपमा राजदूत नियुक्त हुने संवैधानिक प्रक्रिया अघि बढ्नेछ।
यससँगै नेपालका प्रमुख छिमेकी तथा अन्तर्राष्ट्रिय साझेदार मुलुकहरूमा नयाँ राजदूत पठाउने प्रक्रिया अघि बढेको छ। विशेषगरी भारत, चीन र अमेरिकाजस्ता महत्वपूर्ण कूटनीतिक साझेदार मुलुकका लागि गरिएको सिफारिसलाई आगामी कूटनीतिक कार्यदिशाका दृष्टिले पनि महत्वपूर्ण मानिएको छ।
