31/05/2026
हस्तेखोप ग्रामीण खानेपानी योजना उपभोक्ता समिति गठन, नव निर्वाचित कार्यसमितिको सपथ ग्रहण सम्पन्न
हस्तेखोप ग्रामीण खानेपानी योजना उपभोक्ता समिति बुद्धशान्ति ४को नव निर्वाचित कार्यसमितिले सपथ ग्रहण गरेको छ।बुद्धशान्ति गाउँपालिका–४ बर्नेस्थित ज्येष्ठ नागरिक चौतारीको सभाहलमा आयोजित एक कार्यक्रमबीच उक्त कार्यक्रम सम्पन्न भएको हो।
निर्वाचन समितिका संयोजक गुणराज अर्यालको अध्यक्षतामा सम्पन्न कार्यक्रममा बुद्धशान्ति गाउँपालिका–४ का वडाध्यक्ष शेरबहादुर राय प्रमुख अतिथिका रूपमा उपस्थित हुनुहुन्थ्यो। कार्यक्रममा गाउँ कार्यपालिकाका सदस्य दुर्गा पोख्रेल ढुङ्गेल, एकीकृत खानेपानी आयोजना तथा बर्ने स्किमका अध्यक्ष फौदराज शेर्मा , हचुसावका अध्यक्ष राजन लिम्बू, युनिटी युथ क्लबका अध्यक्ष डिल्ली माबो, समाजसेवी रत्न फेम्बु, निवर्तमान सचिव सन्तोष शेर्मा (अमर), सुरेन्द्र शेर्मा, निर्वाचन समिति सदस्य श्री परियार ज्येष्ठ नागरिक चौतारीका कोषाध्यक्ष डम्बर भुर्तेल लगायतको उपस्थिति रहेको थियो।
हालै सम्पन्न साधारण सभाबाट अध्यक्षमा लक्ष्मी प्रसाद माबो, उपाध्यक्षमा पदम बहादुर न्यौपाने, सचिवमा सोनुहाङ लिम्बू, सहसचिवमा भिमबहादुर लिम्बू माबो, कोषाध्यक्षमा सन्ध्या परियार तथा सदस्यमा गहिरीगाउँ टोलका शिवलाल थापा मगर ,डाडागाउ टोलबाट तिलाअर्याल निर्वाचित हुनुभएको छ। समितिका अनुसार अन्य पाँच सदस्यलाई क्षेत्रगत प्रतिनिधित्व तथा समावेशी सिद्धान्तका आधारमा पछि मनोनयन गरिने जानकारी गराइएको छ।
कार्यक्रममा नव निर्वाचित पदाधिकारी तथा सदस्यहरूलाई सपथ ग्रहण गराउनुका साथै प्रमाणपत्र वितरण गरिएको थियो। नवगठित कार्यसमितिको तर्फबाट अध्यक्ष लक्ष्मी प्रसाद माबोले आफ्नो भावी कार्ययोजना, प्राथमिकता र प्रतिबद्धताबारे धारणा राख्दै खानेपानी योजनाको दिगो संरक्षण, स्रोत व्यवस्थापन, पारदर्शी आर्थिक प्रशासन, नियमित मर्मत–सम्भार तथा उपभोक्तालाई गुणस्तरीय सेवा उपलब्ध गराउने विषयलाई उच्च प्राथमिकतामा राखेर काम गर्ने प्रतिबद्धता व्यक्त गर्नुभयो। उहाँले उपभोक्ता, सरोकारवाला निकाय तथा स्थानीय समुदायको सहकार्यबाट योजनालाई अझ प्रभावकारी र व्यवस्थित बनाइने बताउनुभयो।
कार्यक्रममा बोल्ने अतिथिहरूले नवगठित कार्यसमितिलाई सफल कार्यकालको शुभकामना दिँदै योजनाको प्रभावकारी सञ्चालन र दीर्घकालीन व्यवस्थापनमा सक्रिय भूमिका निर्वाह गर्न आग्रह गरेका थिए।
निवर्तमान लेखा समिति संयोजक तथा निर्वाचन समिती सदस्य रुद्र बहादुर भण्डारीले सञ्चालन गर्नुभएको कार्यक्रम सौहार्दपूर्ण वातावरणमा सम्पन्न भएको थियो।
