06/06/2026
रास्वपा झपा-५ को क्षेत्रीय सम्योजकमा धिरज न्यौपाने को उम्मेदवारी
जेठ २२/दमक
राष्ट्रिय स्वतन्त्र पार्टी (रास्वपा) को प्रथम जिल्ला अधिवेशन नजिकिँदै गर्दा झापा क्षेत्रीय सम्योजक पदमा नेतृत्व चयनको बहस तीव्र बन्दै गएको छ। यसैक्रममा दमक नगरपालिका–५ निवासी जुझारु युवा धिरज न्यौपाने क्षेत्रीय सम्योजक पदमा उम्मेदवारी घोषणा गरेका छन्।
यही जेठ २३ गते बिर्तामोडमा आयोजना हुने रास्वपाको प्रथम जिल्लाअधिवेशनमार्फत नयाँ नेतृत्व चयन गरिने तयारी भइरहेका बेला न्यौपानेले क्षेत्रीय सम्योजक पदका लागि आफ्नो उम्मेदवारी दर्ता गराएका हुन्।
न्यौपाने युवाको नेतृत्व विकास, सामाजिक परिचालन तथा संगठन सुदृढीकरणलाई प्राथमिकतामा राखेर उम्मेदवारी दिएको बताएका छन्। पार्टीलाई जनतासँग अझ नजिक बनाउने, युवाको अर्थपूर्ण सहभागिता सुनिश्चित गर्ने तथा संगठनलाई प्रभावकारी र परिणाममुखी ढंगले सञ्चालन गर्ने आफ्नो लक्ष्य रहेको उनको भनाइ छ।
रास्वपाको संगठन विस्तार तथा चुनावी अभियानमा सक्रिय भूमिका खेल्दै आएका न्यौपाने पछिल्लो प्रतिनिधिसभा निर्वाचनमा झापा -५ बाट निर्वाचित प्रधानमन्त्री बालेन्द्र शाह (बालेन) को चुनावी अभियानमा समेत महत्वपूर्ण जिम्मेवारीमा रहेका थिए। उनले निर्वाचनका क्रममा सचिवालय सदस्यको भूमिका निर्वाह गर्दै कार्यकर्ता तथा समर्थक परिचालनमा नेतृत्वदायी भूमिका खेलेका थिए।
आगामी क्षेत्रीय अधिवेशनलाई संगठन सुदृढीकरण, नेतृत्व हस्तान्तरण तथा पार्टीको आधार विस्तार गर्ने महत्वपूर्ण अवसरका रूपमा हेरिएको छ। अधिवेशनबाट चयन हुने नेतृत्वले स्थानीय तहसम्म संगठनलाई मजबुत बनाउने, जनताका मुद्दा प्रभावकारी रूपमा उठाउने तथा पार्टीलाई थप गतिशील बनाउने अपेक्षा गरिएको छ।
उम्मेदवारी घोषणा गर्दै न्यौपाने क्षेत्रीय प्रतिनिधि, पार्टी सदस्य तथा शुभेच्छुकहरूसँग आफ्नो पक्षमा मतदान गर्न आग्रह गरेका छन्। सक्षम, पारदर्शी र जनउत्तरदायी नेतृत्वमार्फत संगठनलाई नयाँ उचाइमा पुर्याउने प्रतिबद्धता व्यक्त गर्दै उनले पार्टीको मूल मर्मअनुसार सुशासन, पारदर्शिता र जवाफदेहितालाई व्यवहारमा उतार्ने अठोट व्यक्त गरेका छन्।
