04/08/2025
मेरो पहिलो निर्वाचन २०४८ सालमा ४३ हजार रुपैयाँ साथीहरूले चन्दा उठाएका थिए । २१ हजार निर्वाचनमा खर्च भयो । बसको छतमा बसेर हिँड्दा साथीहरू खसे । दुई जनाको उपचार गर्दा १२ हजार खर्च भयो । १० हजार रुपैयाँ चुनाव पछि पार्टीकै कोषमा जम्मा गर्दिएँ ।
उक्त चुनाव हुने बेलामा हाम्रो पार्टीको महासचिव माधव कुमार नेपालले बाटो खर्च भनेर २ सय रुपैयाँ दिनुभएको थियो, चुनावमा जाँदा १ सय ८० रुपैयाँ बस भाडा र बीचमा खाना खानका लागि २० रुपैयाँ । एउटा साथी भेटियो, तपाईँले खाको तिर्नु पर्दैन मैले तिर्छु भनेर खानाको पैसा पनि उसैले तिर्यो । २० रुपैयाँ बच्यो ।
चुनाव सकिएपछि ५/७ जना साथीहरू भेट भएको थियो । तपाईंले एक कप चिया पनि नखुवाइ चुनाव सक्ने र विजयी भएर जाने, यो त ज्यादती नै भयो भने। मलाई पार्टीले दिएको २० रुपैयाँ मेरो खल्तीमा सुरक्षित नै छ भनेँ । पाँच सात जनालाई चिया खान पुग्छ भनेर हामीले चिया खाएका थियौं । त्यतिबेला एक रुपैयाँ कप चिया पाइन्थ्यो ।
- प्रधानमन्त्री केपी शर्मा ओली
