29/09/2024
देवकुमार नेपालीलाई (सी आइबी)ले नेपाल ल्याएको छ..
सहकारी ठगीमा फरार इमेज बचत तथा ऋण सहकारी संस्थाका अध्यक्ष तथा ढोरपाटन नगरपालिकाका नगरप्रमुख देवकुमार नेपालीलाई नेपाल प्रहरीको केन्द्रीय अनुसन्धान ब्यूरो (सीआइबी) ले नेपाल ल्याएको छ ।
भारतीय प्रहरीको सहयोगमा नेपालीलाई भारतको नयाँ दिल्लीबाट पक्राउ गरिएको थिए ।
नेपालीलाई शुक्रबार नेपाल प्रहरीले दिल्लिमै पुगेर नियन्त्रणमा लिएको थियो ।
नेपालीलाई शनिबार नेपाल ल्याइएको जिल्ला प्रहरी कार्यालय बागलुङका प्रहरी उपरीक्षक ऋषिराम कँडेलले नयाँ विश्वलाई जानकारी दिनुभयो ।
सिआइबीमार्फत पक्राउ परेपनि हस्तान्तरण नभएको र हस्तान्तरणपछि मात्रै बागलुङ ल्याइने कँडेलले बताउनु भयो।
२०८० माघमा नेपाल प्रहरीको अनुरोधमा इन्टरपोलले नेपालीविरुद्ध ‘रेड कर्नर नोटिस’ जारी गरेको थियो ।
नेपाल प्रहरीले भारतस्थित नेपाली दूतावासमार्फत समन्वय गरेर उनलाई नेपाल ल्याइएको हो ।
सहकारी ठगीमा अध्यक्ष नेपालीसहित सञ्चालकविरुद्ध कास्कीका ५२४ र बागलुङका एक हजार ५४३ बचतकर्ताले गत वर्ष जेठमै उजुरी दिएका थिए।
सहकारीका कार्यवहाक अध्यक्ष डोरबहादुर परियारसहित पाँच जना पुर्पक्षका लागि थुनामा छन्।
सहकारीका बचतकर्ताको करिब दुई अर्ब बचत रकम हिनामिना गरी विसं २०८० जेठ ५ मा उनी बुर्तिबाङ बजारबाट सपरिवार फरार भएका थिए।
नेपालीले इमेजका बागलुङ बजारमा केन्द्रीय कार्यालय सहित, बुर्तिवाङ, गलकोटमा सेवा केन्द्र र कास्कीको पोखरामा शाखा कार्यालय सञ्चालनमा ल्याएका थिए ।
२०८१ साउन १६ गते अध्यक्ष नेपालीले सहकारी संस्थाका बचत रकम दुरुपयोग सम्बन्धमा गठित संसदीय छानविन विशेष समितिलाई पत्र लेखेर आफूले सबै सम्पत्ति बेचेर भए पनि बचतकर्ताको रकम फिर्ता गर्न तयार रहेको लिखित जवाफ पठाएका थिए।
उनीसहित ११ जनाविरुद्ध २०८० असार २५ गते जिल्ला सरकारी वकिलको कार्यालय बागलुङले जिल्ला अदालतमा दायर गरेको मुद्दा विचाराधीन छ ।