09/01/2026
सरकारले आगामी फागुन २१ गते हुने गरी तय भएको प्रतिनिधिसभा निर्वाचनका लागि 'निर्वाचन प्रहरी'को भर्ना खुलाएको छ।
पुस २५ देखि माघ १ गतेसम्म बिदाको दिनसमेत सबै जिल्ला प्रहरी कार्यालयहरूमा आवेदन दिन सकिने प्रहरी प्रधान कार्यालयद्वारा बिहीवार जारी सूचनामा उल्लेख छ।
जम्मा एक लाख ३३ हजार नौ सय ८० जना प्रहरी ४० दिनका लागि भर्ती गर्ने सरकारको योजना छ।
आवेदन दिन १८ वर्ष पूरा भई ५४ वर्ष ननाघेको नेपाली नागरिक हुनुपर्ने छ। सुरक्षा निकायमा काम गरेको अनुभव भएकाहरूलाई प्राथमिकता दिइने सूचनामा उल्लेख छ।
छनोट प्रक्रिया आगामी माघ १२ गते सक्ने, माघ २४ सम्म तालिम दिने र त्यसपछि उनीहरूलाई कार्यक्षेत्रमा खटाउने सरकारी योजना छ।
छनोट हुने उम्मेदवारहरूले ४० दिनका लागि रु ३४,७७६ रुपैयाँ तलब पाउने छन्।
यसका अतिरिक्त खाद्यान्न तथा खाजा खर्च, तयारी खर्च र पोसाक खर्च पनि उपलब्ध गराइने छ।
