05/10/2025
नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले अविरल वर्षा, बाढी र पहिरोको जोखिम बढ्दै गएको वर्तमान अवस्थालाई “राष्ट्रिय संकट” भन्दै सम्पूर्ण पार्टी संरचना र सरकारलाई युद्धस्तरमा जुट्न निर्देशन दिएका छन्।
शनिबार सामाजिक सञ्जालमार्फत वक्तव्य जारी गर्दै प्रचण्डले भने, “असोज १७ गतेदेखि सुरु भएको अविरल वर्षाका कारण बागमती, मधेश र कोशी प्रदेशका पहाडी क्षेत्रमा पहिरो खस्ने र तराईमा डुबानको समस्या तीव्र बनेको छ। कतिपय ठाउँमा वर्षाको मापन ३०० मिलिमिटरभन्दा माथि पुगेको छ, र यो क्रम अझै जारी छ।” उनले यसपटकको वर्षालाई “सामान्य नभई उच्च जोखिम बढाउने प्रकृतिको” भन्दै राज्य संयन्त्र र जनसंगठनहरूलाई तत्पर रहन निर्देशन दिएका छन्।
प्रचण्डले पार्टीका सबै नेता, कार्यकर्ता र जनसंगठनहरूलाई विपद् प्रभावित क्षेत्रमा उद्धार, राहत र सहयोगमा खटिन निर्देशन दिएका छन्। उनले लेखेका छन्, “माओवादी केन्द्रका सम्पूर्ण संरचना, युवा कम्युनिस्ट लिग (YCL), स्वयम्सेवक समूह तथा भातृ संस्थाहरू तत्काल खोज, उद्धार र राहतका काममा जुटून्। अहिले राजनीतिक बहस होइन, जनताको ज्यान र जीवन रक्षा प्राथमिकता हो।”
उनले देशका प्रमुख राजमार्गहरू अवरुद्ध हुँदा हजारौँ यात्रु बाटोमै अलपत्र परेका उल्लेख गर्दै स्थानीय सरकार र आम नागरिकलाई पनि सहयोग गर्न आग्रह गरे। “अलपत्र यात्रुहरूको खानबस्ने र सुरक्षाको व्यवस्था गर्नु हाम्रो सामूहिक जिम्मेवारी हो,” उनले भने।
प्रचण्डले संघ, प्रदेश र स्थानीय तहका सरकारहरूलाई युद्धस्तरमा समन्वय र नेतृत्व गर्न आग्रह गर्दै थपे, “मुलुक अहिले विशेष विपद्–परिस्थितिमा छ। यस्तो बेला राजनीतिक मतभेद बिर्सेर सबै दल, सामाजिक संघ–संस्था र नागरिक समाज एकजुट भएर जनताको सुरक्षामा खटिनुपर्छ।”
उनको भनाइमा, “यो समय राजनीति गर्ने होइन, जनताको जीवन जोगाउने हो। अहिले सरकार, सेना, प्रहरी, स्थानीय तह र नागरिक सबै मिलेर यो विपद्लाई पार गर्नुपर्छ।”
प्रचण्डको यो वक्तव्य अहिले सामाजिक सञ्जालमा तीव्र रूपमा भाइरल बनेको छ। उनका समर्थकहरूले “नेताको होइन, जिम्मेवार नागरिकको आवाज” भन्दै प्रशंसा गरिरहेका छन् भने कतिपयले यसलाई “राजनीतिक नेतृत्वबाट आएको समयानुकूल आह्वान” भनेर स्वागत गरेका छन्।
नेपालका धेरै ठाउँमा अहिले पनि वर्षा निरन्तर भइरहेको छ, बाढी–पहिरोका कारण सडक, विद्युत् र सञ्चार सेवा प्रभावित भएका छन्। उद्धारका लागि सेना, सशस्त्र प्रहरी र स्थानीय निकाय सक्रिय रहेका छन् भने प्रचण्डको यो निर्देशनले राहत र सहकार्य अभियानलाई थप बल दिने अपेक्षा गरिएको छ।
