11/06/2026
जिनेभामा ASPAG मन्त्रीस्तरीय बैठकलाई नेपालको सम्बोधन : सुरक्षित श्रम आप्रवासन र युवाका लागि मर्यादित रोजगारीमा जोड
जिनेभा, जुन ९ — माननीय युवा, श्रम तथा रोजगार मन्त्री श्री रामजी यादव ले एसिया–प्रशान्त समूह (ASPAG) को मन्त्रीस्तरीय बैठकलाई सम्बोधन गर्दै सुरक्षित, व्यवस्थित र मर्यादित श्रम आप्रवासनको प्रवर्द्धन, सामाजिक न्यायको सुनिश्चितता तथा युवाका लागि मर्यादित रोजगारीका अवसर सिर्जना गर्न क्षेत्रीय सहकार्यलाई अझ सुदृढ बनाउनुपर्ने आवश्यकता औंल्याउनुभएको छ।
स्विट्जरल्यान्डको जिनेभास्थित पाले दे नासियोँ (Palais des Nations) मा आयोजित बैठकमा मन्त्री यादवले श्रम बजारका बदलिँदा चुनौती, आप्रवासन व्यवस्थापन तथा युवा रोजगारीका सवालमा एसिया–प्रशान्त क्षेत्रका देशहरूबीच अनुभव आदानप्रदान र साझा प्रयासको महत्त्वमाथि जोड दिनुभयो।
सम्बोधनका क्रममा उहाँले आप्रवासी श्रमिकहरूको अधिकार संरक्षण, समावेशी विकासको प्रवर्द्धन तथा श्रम र रोजगारीसम्बन्धी साझा चुनौतीहरूको समाधानका लागि अन्तर्राष्ट्रिय समुदायसँग सहकार्य, साझेदारी र संवादलाई थप सुदृढ गर्ने नेपालको प्रतिबद्धता पुनः व्यक्त गर्नुभयो।
मन्त्री यादवले श्रम आप्रवासनलाई सुरक्षित, नियमित र मानवअधिकारमैत्री बनाउन बहुपक्षीय सहकार्य आवश्यक रहेको उल्लेख गर्दै सामाजिक सुरक्षा, सीप विकास र रोजगारीका अवसर विस्तारमार्फत युवाहरूलाई सशक्त बनाउने नेपाल सरकारको प्राथमिकताबारे पनि जानकारी गराउनुभयो।
बैठकमा एसिया–प्रशान्त क्षेत्रका विभिन्न देशका मन्त्री तथा उच्चस्तरीय प्रतिनिधिहरूको सहभागिता रहेको थियो। कार्यक्रममा श्रम, रोजगार, सामाजिक न्याय तथा आप्रवासन व्यवस्थापनसँग सम्बन्धित क्षेत्रीय तथा अन्तर्राष्ट्रिय मुद्दामाथि छलफल गरिएको थियो ।
