31/07/2025
तक्षशिलाको ओरिन्टेसनमा विद्यार्थीहरूले खाए शपथ !
काठमाडौँ । टोखा नगरपालिका-७ खरिबोटस्थित तक्षशिला एकेडेमी एण्ड कलेजले कक्षा ११ मा उच्च शिक्षा अध्ययनका लागि भर्ना भएका तथा हुन इच्छुक विद्यार्थीहरूका लागि ओरिन्टेसन सम्पन्न गरेको छ। ओरिन्टेसन कार्यक्रममा भर्ना भएका विद्यार्थीहरूले कलेजको अनुशासन पालना गर्ने, अध्ययनमा मेहनत गर्ने, नियमित गृहकार्य गर्ने भौतिक क्षति नगर्ने लगायतका विषयमा शपथ ग्रहण गरे।
कार्यक्रममा विद्यार्थीहरूलाई तक्षशिला एकेडेमीको मूल्य–मान्यता, नियम, संस्कृति, शैक्षिक वातावरण तथा अध्ययन विधिका बारेमा विस्तृत जानकारी प्रदान गरिएको थियो। कार्यक्रममा कक्षा १२ का विद्यार्थीहरूले स्वागत नृत्य तथा सांगीतिक प्रस्तुतिहरू प्रस्तुत गरहेका थिए । नव-आगन्तुक विद्यार्थीहरूले पनि गीत-संगीत, नृत्य र हर्षोल्लासका साथ सहभागिता जनाएका एकेडेमीका प्रिन्सिपल नेत्रप्रसाद न्यौपानेले बताए । कार्यक्रमको प्रमुख अतिथि टोखा नगरपालिकाका मेयर प्रकाश अधिकारी तथा विशेष अतिथि नगर युवा, खेलकुद तथा शिक्षा विभाग प्रमुख बाबुराम गौतम रहनुभएको थियो ।
करीब २६ वर्षअघि शिक्षाविद् तथा पूर्वराजदूत प्रा.डा. जयराज आचार्यको नेतृत्वमा स्थापित तक्षशिला एकेडेमी पछिल्ला वर्षहरूमा राजधानीकै उत्कृष्ट शैक्षिक केन्द्रका रूपमा स्थापित हुँदै आएको छ। सामाखुसीस्थित रिङरोडबाट आफ्नै अत्याधुनिक शैक्षिक भवनमा स्थानान्तरण भएको एकेडेमीले गुणस्तरीय शिक्षाको पर्यायका रूपमा आफूलाई उभ्याएको छ।
'शेपिङ योर माइन्ड' भन्ने नारालाई आत्मसात गरी सञ्चालन भइरहेको एकेडेमीले कक्षा ११ तथा १२ मा विज्ञान, व्यवस्थापन, मानविकी, कानुन, बिजनेस स्टडीज, पत्रकारिता, होटल म्यानेजमेन्ट, कम्प्युटर साइन्स, ट्राभल एन्ड टुरिजम लगायतका विषयमा गुणस्तरीय शिक्षा प्रदान गर्दै आएको छ। स्नातक तहमा समेत अध्ययनको व्यवस्था रहेको एकेडेमीले जनाएको छ।
